ଛତ୍ରପୁର: ମଧ୍ୟପ୍ରଦେଶର ଜଣେ ଦୋକାନୀ ସମୋସା ପ୍ଲେଟ୍ରେ ପରିବେଷଣ ନ କରିବା ଏବଂ ଚାମଚ ନ ଦେବାରୁ ଜଣେ ଗ୍ରାହକ ଉତ୍କ୍ଷିପ୍ତ ହୋଇ ସିଧାସଳଖ ମୁଖ୍ୟମନ୍ତ୍ରୀଙ୍କ ହେଲ୍ପଲାଇନକୁ ଫୋନ ଲଗାଇଥିଲେ। ଛତ୍ରପୁର ବସ୍ଷ୍ଟାଣ୍ଡରେ ଥିବା ‘ରାକେଶ ସମୋସା’ ନାମକ ଜଳଖିଆ ଦୋକାନ ନାଁରେ ଅଭିଯୋଗ ଦାଏର ଲାଗି ସେ ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟକୁ କହିଥିଲେ। ଅଭିଯୋଗରେ ଯୁବକ ଜଣକ ଦର୍ଶାଇଛନ୍ତି, ସେ ଜଳଖିଆ ଦୋକାନରୁ ସମୋସା କିଣିଥିଲେ ମଧ୍ୟ ଦୋକାନୀ ତାଙ୍କୁ ପ୍ଲେଟ୍ ଓ ଚାମଚରେ ତାହା ପରିବେଷଣ କରିବାକୁ ମନା କରିଦେଇଥିଲେ। ଅଭିଯୋଗକାରୀଙ୍କ ନାମ ବଂଶ ବାହାଦୁର ବୋଲି ଜଣାପଡ଼ିଛି। ଏଠାରେ ସମୋସା ପ୍ୟାକେଟରେ ଦିଆଯାଉଥିବାରୁ ଦୋକାନୀ ପ୍ଲେଟ୍ କିମ୍ବା ଚାମଚ ଦେଉନାହାନ୍ତି। ଏହି ସମସ୍ୟାର ଯଥାଶୀଘ୍ର ସମ୍ଭବ ସମାଧାନ କରାଯାଉ ବୋଲି ଯୁବକ ଜଣକ ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟକୁ ଅନୁରୋଧ କରିଛନ୍ତି।