ବ୍ରହ୍ମପୁର,୨୭ା୫(ସୁବାସ ଚନ୍ଦ୍ର ପାଢ଼ୀ): ଜଣେ ନାବାଳିକାଙ୍କୁ ବଳାତ୍କାର କରିବା ଓ ଫଟୋଗୁଡିକୁ ସୋସିଆଲ ମିଡ଼ିଆରେ ଭାଇରାଲ କରିଥିବା ଅଭିଯୋଗରେ ବଡ଼ବଜାର ଥାନା ପୋଲିସ ଜଣେ ଯୁବକଙ୍କୁ ଗିରଫ କରିଛି। ସେ ହେଲେ ଉକ୍ତ ଥାନା ଅଞ୍ଚଳର ରୋଶନ ମୁଦଙ୍ଗିଆ ଓରଫ ତ୍ରିନାଥ(୨୦)।
ଥାନା ଅଧିକାରୀ ପ୍ରଶାନ୍ତ ମଲ୍ଲିକଙ୍କ ସୂଚନା ଅନୁଯାୟୀ, ଜଣେ ନାବାଳିକାଙ୍କ ସହ ୪ବର୍ଷ ପୂର୍ବେ ରୋଶନଙ୍କର ବନ୍ଧୁତା ହେବା ପରେ ଉଭୟଙ୍କ ମଧ୍ୟରେ ଫୋନରେ କଥାବାର୍ତ୍ତା ଚାଲିଥିଲା। ବିଭିନ୍ନ ସମୟରେ ନାବାଳିକା ରୋଶନଙ୍କ ସହ ବୁଲିବାକୁ ଯାଇଥିଲେ । ଏହି ସମୟରେ ରୋଶନ ନାବାଳିକାଙ୍କ ସହ କିଛି ଫଟୋ ଉଠାଇଥିଲେ । ଏହି ଫଟୋର ଫାଇଦା ନେଇ ରୋଶନ ନାବାଳିକାଙ୍କୁ ଭୟଭୀତ କରି ତାଙ୍କ ସହ ଶାରୀରିକ ସମ୍ପର୍କ ରଖିଥିଲେ। ଏହାପରେ ଉଭୟଙ୍କ ମଧ୍ୟରେ ଝଗଡା ହୋଇଥିଲା ।
ସମ୍ପର୍କ ନ ରଖିଲେ ଫଟୋ ଭାଇରାଲ କରିବାକୁ ଧମକ ଦେଇଥିଲେ । ନାବାଳିକା ଜଣକ କଥା ନ ଶୁଣିବାରୁ ରୋଶନ ସୋସିଆଲ ମିଡ଼ିଆରେ ଫଟୋ ଭାଇରଲ କରିଥିଲେ। ନାବାଳିକା ଏହି ଘଟଣାକୁ ନେଇ ପରିବାରକୁ କହିବା ପରେ ପରିବାର ପକ୍ଷରୁ ଗତ ୨୪ତାରିଖରେ ବଡ଼ ବଜାର ଥାନାରେ ଅଭିଯୋଗ କରାଯାଇଥିଲା । ପୋଲିସ ରୋଶନଙ୍କୁ କାବୁ କରିବା ପାଇଁ ଏକ ଟିମ ଗଠନ କରି ତାଙ୍କ ମୋବାଇଲ ଟ୍ରାକିଂ କରିଥିଲା। ରୋଶନଙ୍କୁ ଗିରଫ ପରେ କୋର୍ଟ ଚାଲାଣ କରିବା ସହ ତାଙ୍କ ମୋବାଇଲ ଫୋନ ପୋଲିସ ଜବତ କରିଛି ।
