ନୟାଗଡ଼,୨୧।୮(ଲୋକନାଥ ମିଶ୍ର):ନୟାଗଡ଼ ସଦର ଥାନା ବାଲୁଗଁା ଅଞ୍ଚଳର ଏକ ହାଇସ୍କୁଲରେ ୫ ଜଣ ଦଶମ ଶ୍ରେଣୀ ଛାତ୍ରୀଙ୍କ ଫଟୋକୁ ମୁହଁ ଅସଲି ରଖି ଶରୀରକୁ ଉଲଗ୍ନ କରି ଭାଇରାଲ କରାଯାଇଛି। ଗୋଟିଏ ମୋବାଇଲରୁ ଅନ୍ୟ ମୋବାଇଲକୁ ଏହା ଘୁରି ବୁଲୁଛି। ମୋବାଇଲ ଆପ୍ରେ ଫଟୋ ଏଡିଟିଂ କରାଯାଇ ଏପରି ଭାଇରାଲ ହୋଇଛି। ଏ ସଂକ୍ରାନ୍ତରେ ନୟାଗଡ଼ ସଦର ଥାନାରେ ଅଭିଯୋଗ ହେବା ପରେ ପୋଲିସ ଦଶମ ଶ୍ରେଣୀରେ ପଢ଼ୁଥିବା ୨ ଛାତ୍ରଙ୍କୁ ଅଟକ ରଖି ପଚରାଉଚୁରା କରୁଛି। ଏହି ୨ ଛାତ୍ର ଫଟୋକୁ ଏଡିଟିଂ କରିଥିବାବେଳେ ଅନ୍ୟ ୫ଜଣ ସବୁ ଜାଣି ଚୁପ ରହିଥିଲେ। ଅନ୍ୟପକ୍ଷେ ପ୍ରଧାନଶିକ୍ଷକ ଏହି ଘଟଣା ସମ୍ପର୍କରେ କିଛି ନ କହି ଏଡାଇ ଯାଇଥିଲେ। ଉକ୍ତ ଘଟଣାକୁ ଚାପି ଦେବାକୁ ସେ ପ୍ରୟାସ କରିଥିଲେ ବୋଲି ଅଭିଯୋଗ ହୋଇଛି। ସମ୍ପୃକ୍ତ ପ୍ରଧାନଶିକ୍ଷକଙ୍କୁ ସସ୍ପେଣ୍ଡ କରିବା ପାଇଁ ଦାବି ହେଉଛି। ସେହିପରି ଘଟଣା ପ୍ରଘଟ ପରେ ଛାତ୍ର ଜଣକ ଜଣେ ଭାଜପା ନେତାଙ୍କ ଘରେ ଲୁଚି ରହିଥିଲେ। ସେହି ଭାଜପା ନେତା ଉକ୍ତ ଘଟଣାକୁ ଚାପି ଦେବାକୁ ଜୋରଦାର ଉଦ୍ୟମ କରିଥିବା ଚର୍ଚ୍ଚା ହେଉଛି।
ଏନେଇ ଜଣେ ଅଭିଭାବକ କହିଛନ୍ତି, ହାଇସ୍କୁଲରେ ଚାରା ରୋପଣଠାରୁ ଆରମ୍ଭ କରି ବିଭିନ୍ନ କାର୍ଯ୍ୟକ୍ରମ ହୁଏ। ମୋ ଝିଅ ପରି ଅନ୍ୟ ଛାତ୍ରୀମାନେ ସେହିସବୁ କାର୍ଯ୍ୟକ୍ରମରେ ଭାଗ ନେଇଥିଲେ। ହେଲେ ସେମାନଙ୍କ ଫଟୋକୁ ମୋବାଇଲ ଆପ୍ରେ ଅଶ୍ଲୀଳ କରି ଛଡା ଯିବା କଥାକୁ ଆମେ କେମିତି ଜାଣିବୁ। ମୋ ଝିଅ ପରି ୫ ଜଣ ଝିଅଙ୍କୁ ବଦନାମ କରିବାକୁ ଚେଷ୍ଟା କରାଯାଇଛି। ଝିଅର ମୁହଁ ଫଟୋ ଅସଲି ଥିବାବେଳେ ଅନ୍ୟ କାହାର ଉଲଗ୍ନ ଫଟୋକୁ ସେଥିରେ ଯୋଡ଼ା ଯାଇଛି। ୧୫ ଦିନ ତଳୁ ଏହି ଘଟଣା ଘଟିଲାଣି। ହେଲେ ପ୍ରଧାନ ଶିକ୍ଷକ ଘଟଣାକୁ ଚାପି ଦେବାକୁ ଉଦ୍ୟମ କରିଥିଲେ। ବାରମ୍ବାର ଅଭିଯୋଗ ପରେ ପ୍ରଧାନଶିକ୍ଷକ ମୋତେ ଡକାଇ ଥିଲେ। ଯେଉଁ ପିଲାମାନେ ଏଭଳି କାଣ୍ଡ ଘଟାଇଛନ୍ତି ସେମାନଙ୍କ ଅଭିଭାବକଙ୍କୁ ଡାକିଥିଲେ। ଘଟଣା ଚାପି ଦେବାକୁ ମୋ ଉପରେ ଚାପ ପକାଇଲେ। ମୁଁ ରାଜି ନ ହେବାରୁ ଖରାପ ବ୍ୟବହାର କରିଥିଲେ। ଅନ୍ୟ ଜଣେ ମହିଳା କହିଛନ୍ତି, ନ୍ୟାୟ ନ ପାଇବାରୁ ମୁଁ ନୟାଗଡ଼ ସଦର ଥାନାରେ ଅଭିଯୋଗ କରିଛି। ନୟାଗଡ଼ ସଦର ଥାନା ଆଇଆଇସି ଅନିତା ସାହୁ କୁହନ୍ତି, ଏମିତି ଏକ ଲଜ୍ୟାଜନକ ଘଟଣା ଘଟିଛି। ତେବେ ଏହି ଘଟଣା ସମ୍ବେଦନଶୀଳ ହୋଇଥିବାରୁ କିଛି କହି ହେବନି। ପୋଲିସର ତଦନ୍ତ ଜାରି ରହିଛି।