ସବୁ ମଣିଷ ଭିତରେ କିଛି ନା କିଛି କଳା ରହିଥାଏ। କିଏ ଭଲ ଡ୍ୟାନ୍ସ କରେ ତ, କିଏ ଭଲ ଗୀତ ଗାଇପାରେ, ଭଲ ଚିତ୍ରଟିଏ ଆଙ୍କିପାରେ ତ ଆଉ କିଏ ଭଲ ଫଟୋଗ୍ରାଫି କରିପାରେ। ସମସ୍ତଙ୍କୁ ଭଗବାନ ଭିନ୍ନ ରୂପେ ତିଆରି କରିଛନ୍ତି। ଅନେକ ଥର ନିଜର ଭଲ ଗୁଣ ପାଇଁ ଲୋକମାନେ ଚର୍ଚ୍ଚାକୁ ଆସିଥାନ୍ତି। ବେଳେବେଳେ ଏହି କଳା ସେମାନଙ୍କୁ ଏଭଳି ପ୍ରଭାବିତ କରିଥାଏ ଯେ, ଲୋକେ ଏହାକୁ ପାଗଳାମିର ଆଖ୍ୟା ଦେଇଥାନ୍ତି। କିଛି ଏଭଳି କଳା ଦେଖିବାକୁ ମିଳିଛି ଜଣେ ଫଟୋଗ୍ରାଫରଙ୍କ ମଧ୍ୟରେ। ସେ ଫଟୋଗ୍ରାଫି ପ୍ରତି ଏତେ ପ୍ରଭାବିତ ହୋଇଛନ୍ତି ଯେ, ନିଜ ଘରକୁ କ୍ୟାମେରା ଷ୍ଟାଇଲ୍ରେ ନିର୍ମାଣ କରିଛନ୍ତି। କେବଳ ସେତିକି ନୁହେଁ କ୍ୟାମେରା ନାଁ ଅନୁସାରେ ସେ ନିଜ ପିଲାଙ୍କ ନାମ ମଧ୍ୟ ରଖିଛନ୍ତି।
ସୂଚନାଯୋଗ୍ୟ, କର୍ନାଟକ ବେଲଗାମରେ ରହୁଥିବା ରବି ହୋଙ୍ଗଲ ପେଶାରେ ଜଣେ ଫଟୋଗ୍ରାଫର। ଛୁଆ ବେଳୁ ଫଟୋଗ୍ରାଫିରେ ରବିଙ୍କ ରୁଚି ରହିଥିବା ବେଳେ ବୟସ ବଢ଼ିବା ସହ ଏଥିପ୍ରତି ତାଙ୍କର ଆଗ୍ରହ ମଧ୍ୟ ବଢ଼ିବାକୁ ଲାଗିଥିଲା। ଏପରିକି ନିଜ ଘରକୁ କ୍ୟାମେରା ଷ୍ଟାଇଲ୍ରେ ମଧ୍ୟ ଡିଜାଇନ୍ କରିଛନ୍ତି। ଦୂରରୁ ଏହି ଘରକୁ ଦେଖିଲେ, ସତେ ଯେପରି ଲାଗୁଛି ଏକ କ୍ୟାମେରା ଛିଡା ହୋଇଛି। ଆଉ ଏହି ଘରର ନାଁ ମଧ୍ୟ ସେ କ୍ଲିକ୍ ରଖିଛନ୍ତି। କେବଳ ସେତିକିରେ ତାଙ୍କର ପାଗଳାମି ଶେଷ ହୋଇନି। ତାଙ୍କ ପିଲାଙ୍କ ନାଁ ଶୁଶିଲେ ଆପଣ ଆଶ୍ଚର୍ଯ୍ୟ ହୋଇଯିବେ।
ରବିଙ୍କ ୩ଟି ସନ୍ତାନ ଥିବା ବେଳେ ସେମାନଙ୍କ ନାମ କ୍ୟାମେରା ଅନୁସାରେ Epson, Canon ଓ Nikon ରଖିଛନ୍ତି। ଯାହା ଏବେ ଚର୍ଚ୍ଚାର ବିଷୟ ପାଲଟିଛି। ରବିଙ୍କ ଏହି ଘର ଏବେ ସୋସିଆଲ ମିଡିଆରେ ଭାଇରାଲ ହୋଇଥିବା ବେଳେ ଲୋକମାନେ ଏହାକୁ ତାଙ୍କର ପାଗଳାମି ବୋଲି କହିଛନ୍ତି।