ନୂଆଦିଲ୍ଲୀ, ୧୪।୯: ବିମାନରେ ଫଟୋଗ୍ରାଫିକୁ ବ୍ୟାନ କରାଯାଇନାହିଁ। ବେସାମରିକ ବିମାନ ଚଳାଚଳ ମହାନିର୍ଦ୍ଦେଶାଳୟ(ଡିଜିସିଏ) ପକ୍ଷରୁ ସୋମବାର ଏ ନେଇ ଏକ ସ୍ପଷ୍ଟୀକରଣ ଦିଆଯାଇଛି। ବିମାନ ଯାତ୍ରୀ ଅନ୍ବୋର୍ଡ ଫ୍ଲାଇଟରେ ପୂର୍ବଭଳି ଫଟୋ ଉଠାଇ ପାରିବେ। ମାତ୍ର ଡିଫେନ୍ସ ଏୟାରଫିଲ୍ଡଗୁଡିକରେ ଫ୍ଲାଇଟ ଚାଲୁ ରହିଥିବା ବେଳେ ଯାତ୍ରୀଙ୍କୁ ଫଟୋ ଉଠାଇବା ନେଇ ବାରଣ କରାଯାଇଛି ବୋଲି ଡିଜିସିଏ ସ୍ପଷ୍ଟ କରିଛି। ଏହାବାଦ ପୂର୍ବଭଳି ବିମାନ ଲ୍ୟାଣ୍ଡ ଏବଂ ଟେକ୍ ଅଫ୍ କରୁଥିବା ବେଳେ ଯାତ୍ରୀ ଷ୍ଟିଲ ଏବଂ ଭିଡିଓଫଟୋଗ୍ରାଫି କରିପାରିବେ। ମାତ୍ର ଲୋକମାନେ କୌଣସି ରେକର୍ଡିଂ ଇକ୍ୱିପମେଣ୍ଟ ବ୍ୟବହାର କରିପାରିବେ ନାହିଁ। ସେହିଭଳି ବିମାନ ପରିଚାଳନାରେ ଏଭଳି କାର୍ଯ୍ୟ ବାଧା ଉପୁଜାଉଥିବାରୁ କ୍ରିଓ ଏହାକୁ ବାରଣ କରିଥାନ୍ତି। ଏଭଳି ବିଭିନ୍ନ ପ୍ରସଙ୍ଗକୁ ଯାତ୍ରୀ ଧ୍ୟାନରେ ରଖିବାକୁ କୁହାଯାଇଛି। ଯଦି କୌଣସି ଯାତ୍ରୀ ନିୟମ ଉଲ୍ଲଂଘନ କରନ୍ତି ତାଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ସୂଚନା ଯୋଗ୍ୟ, ବିମାନରେ ଫଟୋଗ୍ରାଫି କଲେ କାର୍ଯ୍ୟାନୁଷ୍ଠାନ ହେବ ବୋଲି ଏକ ଖବର ରବିବାର ପ୍ରକାଶ ପାଇଥିଲା। ନିୟମ ଉଲ୍ଲଂଘନ କରୁଥିବା ବିମାନ କମ୍ପାନୀ ଏବଂ କ୍ୟାବିନରେ ଥିବା କ୍ରିଉଙ୍କ ଏବଂ ଯାତ୍ରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ହେବ ବୋଲି ଏଥିରେ ପ୍ରକାଶ ପାଇଥିଲା। ଯାହାକୁ ନେଇ ଡିଜିସିଏ ସ୍ପଷ୍ଟୀକରଣ ପ୍ରଦାନ କରିଛି।