ଲକ୍ଷ୍ନୌ/ପାଟନା,୧୩।୫: କରୋନା ମହାମାରୀ ଦେଶରେ ତାଣ୍ଡବ ରଚିବାରେ ଲାଗିଛି। ଦିନକୁ ଦିନ କରୋନା ଆକ୍ରାନ୍ତ ଓ ମୃତ୍ୟୁ ସଂଖ୍ୟା ବୃଦ୍ଧି ପାଉଥିବା ବେଳେ ଅନ୍ତିମ ସଂସ୍କାର ପାଇଁ ଶ୍ମଶାନ ବି କମ୍ ପଡ଼ିଯାଉଛି। ଫଳରେ ଉତ୍ତରପ୍ରଦେଶ ଓ ବିହାରର ସୀମାରେ ଥିବା ଗଙ୍ଗା ନଦୀରେ କରୋନାରେ ଆକ୍ରାନ୍ତ ହୋଇଥିବା ବ୍ୟକ୍ତିଙ୍କ ମୃତଦେହଗୁଡ଼ିକୁ ଭସାଇ ଦିଆଯାଉଥିବା ଘଟଣା ସାମ୍ନାକୁ ଆସିଛି। ଯାହାକୁ ନେଇ ସ୍ଥାନୀୟ ଲୋକଙ୍କ ମଧ୍ୟରେ କୋକୁଆ ଭୟ ସୃଷ୍ଟି ହୋଇଛି। ଉକ୍ତ ନଦୀରେ ଗାଧୋଇଲେ କିମ୍ବା ପାଣି ପିଇଲେ କରୋନା ସଂକ୍ରମଣ ବ୍ୟାପିବ ବୋଲି ଲୋକମାନେ ଆଶଙ୍କା କରିଛନ୍ତି। ହେଲେ ଲୋକଙ୍କ ଏହି ଆଶଙ୍କାକୁ ଚିକିତ୍ସା ବିଶେଷଜ୍ଞ ଖଣ୍ଡନ କରିଛନ୍ତି। ସେ ଦାବି କରିଛନ୍ତି ଯେ, ପାଣିରୁ ଶରୀରକୁ କରୋନା ଭାଇରସ୍ ବ୍ୟାପି ନ ଥାଏ। ଶରୀରରୁ ଏହି ଭାଇରସ୍ ବାହାରିବା ପରେ ପାଣିରେ ଅଧିକ ସମୟ ପର୍ଯ୍ୟନ୍ତ ସକ୍ରିୟ ରହି ନ ଥାଏ ବୋଲି ବିଶେଷଜ୍ଞ କହିଛନ୍ତି। ତେବେ କରୋନାରେ ଆକ୍ରାନ୍ତ ହୋଇଥିବା ମୃତଦେହକୁ ପାଣିରେ ଭସାଇ ଦିଆଯିବା ପରେ ସେଥିରୁ ଅନ୍ୟମାନଙ୍କୁ ସଂକ୍ରମିତ ହେବା ନେଇ ଏଯାଏ କୌଣସି ପ୍ରମାଣ ମିଳିନାହିଁ। କେବଳ ନାକ ଓ ମୁହଁ ଦ୍ୱାରା କରୋନା ଭାଇରସ୍ ଶରୀରକୁ ପ୍ରବେଶ କରିଥାଏ ବୋଲି ଅଧ୍ୟୟନରୁ ଜଣାପଡ଼ିଛି। ତେଣୁ ନଦୀରେ ଗାଧୋଇଲେ କିମ୍ବା ଏହାର ପାଣି ପିଇଲେ କରୋନା ସଂକ୍ରମଣ ହେବାର ସମ୍ଭାବନା ନାହିଁ ବୋଲି ବିଶେଷଜ୍ଞ ମତ ରଖିଛନ୍ତି। ଯଦି ଉକ୍ତ ନଦୀର ପାଣି ପୂର୍ବରୁ ପ୍ରଦ୍ୟୁଷିତ ତେବେ ପେଟ ଓ ଚର୍ମରୋଗ ହୋଇପାରେ ବୋଲି ଏସ୍ଜିପିଜିଆଇର ନିର୍ଦ୍ଦେଶକ ତଥା ପ୍ରଫେସର ଆରକେ ଧିମାନ ସୂଚନା ଦେଇଛନ୍ତି।
