ଚନ୍ଦାହାଣ୍ଡି, ୭ା୫ (ଡି.ଏନ୍.ଏ.) ଗ୍ରାମାଞ୍ଚଳରେ ଯାତାୟାତକୁ ସୁଗମ କରିବା ଲକ୍ଷ୍ୟରେ ନବରଙ୍ଗପୁର ଜିଲା ଚନ୍ଦହାଣ୍ଡି ବ୍ଲକ ଭତାଝରରୁ ଧୁରୁଆପଡ଼ା ରାସ୍ତାକୁ ଏସ୍ଆର ଫଣ୍ଡରେ ସଡ଼କ ଯୋଜନାରେ ସାମିଲ କରି ଲକ୍ଷ ଲକ୍ଷ ଟଙ୍କା ବ୍ୟୟରେ ପକ୍କା ସଡକ ତିଆରି ହେଲା। ଟଙ୍କା ପାଣି ପରି ଖର୍ଚ୍ଚ ହେଉ ଥିବାବେଳେ ଠିକାଦାର ଓ ବିଭାଗୀୟ ଅଧିକାରୀଙ୍କ ଅସାଧୁ ମେଣ୍ଟ ଯୋଗୁ ଏହି ଯୋଜନା ବିଫଳ ହେବାକୁ ବସିଛି। ରାସ୍ତା ନିର୍ମାଣର ସପ୍ତାହକ ମଧ୍ୟରେ ଏଥିରୁ ପିଚୁ ଉଠୁଛି। ଶନିବାର ଉକ୍ତ ରାସ୍ତା ପରିଦର୍ଶନରେ ପୂର୍ବତନ ଏମ୍ପି ତଥା ରାଜ୍ୟ ଭାଜପା ଉପ ସଭାପତି ବଳଭଦ୍ର ମାଝି ଯାଇଥିଲେ। ସେ ରାସ୍ତା ଦେଖି କ୍ଷୋଭ ପ୍ରକାଶ ସହ ବିଭାଗୀୟ ନିର୍ବାହୀ ଯନ୍ତ୍ରୀ ଅନ୍ତୋନୀ କିଷାନଙ୍କୁ ଏ ସମ୍ପର୍କରେ ପଚାରି ବୁଝିଥିଲେ। ତୁରନ୍ତ ମରାମତି କରିବାକୁ ତାଙ୍କୁ ତାଗିଦ କରାଯାଇଛି।
ଭତାଝରରୁ ଧୁରୁଆପଡ଼ା ୬.୪୫୦ କି.ମି. ରାସ୍ତା ପାଇଁ ପ୍ରଥମ ପର୍ଯ୍ୟାୟରେ ୧ କୋଟି ୫୮ ଲକ୍ଷ ଟଙ୍କା କେବଳ ମେଟାଲ ମୋରମ ପାଇଁ ବ୍ୟୟ କରାଯାଇଛି । କିନ୍ତୁ ରାସ୍ତାରେ ନିମ୍ନମାନର ଓଭର ସାଇଜର ମେଟାଲ ବ୍ୟବହାର କରାଯାଇଥିବା ଅଭିଯୋଗ ହୋଇଛି। ଦ୍ୱିତୀୟ ପର୍ଯ୍ୟାୟର ଠିକାଦାରଙ୍କୁ ସନ୍ତୁଷ୍ଟ କରିବା ପାଇଁ ଉକ୍ତ ରାସ୍ତା ଉପରେ୨ କି.ମି.କୁ ୫୦ ଲକ୍ଷରୁ ଊର୍ଦ୍ଧ୍ୱ ଟଙ୍କାରେ ପିଚୁ କରାଯାଇଛି। ଉକ୍ତ କାର୍ଯ୍ୟର ବୋର୍ଡ ମଧ୍ୟ ଲଗାଯାଇ ନାହିଁ। ଏହି କାମ ନୂଆପଡ଼ା ଜିଲାର ଜଣେ ଠିକାଦାରଙ୍କ ନାମରେ ଥିବାବେଳେ ତାହକୁ ଚନ୍ଦାହାଣ୍ଡିର ଜଣେ ପେଟି କଣ୍ଟ୍ରାକ୍ଟର କରୁଛନ୍ତି। ଏହି ରାସ୍ତାରେ ଏତେ ନିମ୍ନମାନର କାମ କରାଯାଇଛି ଯେ ହାତରେ ଘଷିଦେଲେ ସେଥିରୁ ପିଚୁ ଛାଡ଼ିଯାଉଛି। ସପ୍ତାହେ ନ ପୂରୁଣୁ ରାସ୍ତା ଉପରେ ଘାସ ଉଠିବା ସହ ତାହା ଖରାପ ହୋଇଗଲାଣି । ପିଚୁ ହେବା ପୂର୍ବରୁ ପ୍ରତି ୧ କି.ମି. ଟ୍ରାକକୋଟରେ ୭ ଡ୍ରମ ଆମ୍ଲୋସିନ ଅଏଲ ପକାଇବା ନିୟମ ଥିବାବେଳେ ଉକ୍ତ ରାସ୍ତାରେ ମାତ୍ର ୧ ଡ୍ରମ ଆମ୍ଲୋସିନ ଅଏଲ ବ୍ୟବହାର କରାଯାଇଥିବା ଅଭିଯୋଗ ହୋଇଛି। ଏ ନେଇ ନିର୍ବାହୀ ଯନ୍ତ୍ରୀ ଅନ୍ତୋନୀ କିଷାନଙ୍କୁ ପଚାରିବାରୁ ଉକ୍ତ ରାସ୍ତା ଖରାପ ହୋଇଥିବା ସେ ସ୍ବୀକାର କରିଛନ୍ତି। ଶୀଘ୍ର ମରାମତି କରାଯିବ ବୋଲି ପ୍ରତିଶ୍ରୁତି ଦେଇଛନ୍ତି। ରାସ୍ତା କାମ କରୁଥିବା ଠିକାଦାରଙ୍କ ବିଭାଗୀୟ ଅଧିକାରୀ ହାତବାରିଶି ସାଜିଛନ୍ତି। ଚନ୍ଦାହାଣ୍ଡି ବ୍ଲକରେ ବିଭିନ୍ନ ନିର୍ମାଣ କାମରେ ଦୁର୍ନୀତି ସୀମା ଟପିଯାଇଥିବା ବେଳେ ଏଠି ଲୋକ ପ୍ରତିନିଧିମାନେ ହାତ ବାନ୍ଧି ବସିଛନ୍ତି ବୋଲି ବୁଦ୍ଧିଜୀବୀ କହିଛନ୍ତି। ଏହା ଏମ୍ପି ରମେଶ ମାଝି ଓ ବିଧାୟକ ପ୍ରକାଶ ମାଝିଙ୍କ ନିଜ ବ୍ଲକ। ନିଜେ ଜିଲା ଭିଜିଲାନ୍ସ ମନିଟରିଂ କମିଟିର ଅଛନ୍ତି। ନିମ୍ନମାନ କାମର ଭିଜିଲାନ୍ସ ତଦନ୍ତ କରାଇବାକୁ ଦାବି ହୋଇଛି।