ଘସିପୁରା,୨୮।୧୨(ନିରଞ୍ଜନ ସାହୁ): ୨୦ ନମ୍ବର ଜାତୀୟ ରାଜପଥ ଘସିପୁରା ଥାନା ଅଧୀନ ଭାଲୁକୁମା ଛକଠାରେ ଟ୍ରକ୍କୁ ପଛପଟୁ ଏକ ପିକନିକ୍ ବସ୍ ଧକ୍କା ଦେଇ ଦୁର୍ଘଟଣାଗ୍ରସ୍ତ ହୋଇଛି। ଫଳରେ ୨ଜଣ ଯାତ୍ରୀ ଗୁରୁତର ହୋଇଥିବା ବେଳେ ୨୦ଜଣ ଆହତ ହୋଇଛନ୍ତି।
ଗୁରୁବାର ଏହି ଦୁର୍ଘଟଣା ଘଟିଥିଲା। ବସ୍ଟି ବାଲେଶ୍ୱର ଅଭିମୁଖେ ଯାତ୍ରା କରିବା ସମୟରେ ଏହି ଦୁର୍ଘଟଣା ଘଟିଥିଲା। ଗୁରୁତର ଓ ଆହତମାନଙ୍କୁ ଚିକିତ୍ସ ପାଇଁ ଆମ୍ବୁଲାନ୍ସ ଯୋଗେ ଆନନ୍ଦପୁର ଉପଖଣ୍ଡ ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରାଯାଇଥିଲା। ଘସିପୁରା ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି। ବାଲେଶ୍ୱର ଜିଲା ବ୍ରହ୍ମୋସୀ ଟ୍ୟୁଟରିଆଲର ୬୦ରୁ ଊର୍ଦ୍ଧ୍ୱ ଛାତ୍ରଛାତ୍ରୀ ଓ ଶିକ୍ଷକ ଦୁଇଟି ବସ୍ ଯୋଗେ ସମ୍ବଲପୁରକୁ ପିକନିକ୍ କରିବାକୁ ଯାଇଥିଲେ। ପିକନିକ୍ ସାରି ଫେରିବା ସମୟରେ ଭାଲୁକୁମାଠାରେ ବସ୍ଟି ଗୋଟିଏ ଟ୍ରକକୁ ପଛପଟୁ ଧକ୍କା ଦେଇଥିଲା। ଏଥିରେ ବସ୍ର ସମ୍ମୁଖ ଭାଗ ନଷ୍ଟ ହୋଇଥିବା ବେଳେ ଚାଳକ ଓ ଜଣେ ଶିକ୍ଷକ ଗୁରୁତର ହୋଇଛନ୍ତି। ଏତଦ୍ବ୍ୟତୀତ ୨୦ ଛାତ୍ରୀଛାତ୍ର ଓ ଶିକ୍ଷକ ଆହତ ହୋଇଛନ୍ତି। ଯାତ୍ରୀଙ୍କ କହିବା ଅନୁଯାୟୀ, ଟ୍ରକ୍ଟି ବସ୍କୁ ଓଭରଟେକ୍ କରି ବ୍ରେକ୍ ଲଗାଇଦେବାରୁ ଏଭଳି ପରିସ୍ଥିତି ସୃଷ୍ଟି ହୋଇଥିଲା। ଟ୍ରକ୍ଟି ଘଟଣାସ୍ଥଳରୁ ଫେରାର ହୋଇଯାଇଛି।