ପ୍ରକୃତିର କୋଳରେ ରହିଛି ରାୟଗଡ଼ା ଜିଲା। ନିଆରା କଳା, ସଂସ୍କୃତି, ଆଦିବାସୀ ପରମ୍ପରା ସହ ଏଠାରେ ରହିଛି ଅନେକ ଆକର୍ଷଣୀୟ ପର୍ଯ୍ୟଟନସ୍ଥଳୀ ତଥା ପିକ୍ନିକ୍ ସ୍ପଟ୍। ଏହା ମଧ୍ୟରେ ଅନ୍ୟତମ ଦୁର୍ଗାପାଡ଼ୁ ଜଳପ୍ରପାତ। ରାୟଗଡ଼ା ଜିଲା ସଦରଠାରୁ ମାତ୍ର ୩୭ କି.ମି. ଦୂର ଓଡ଼ିଶା-ଆନ୍ଧ୍ର ସୀମାରେ ରହିଛି ଏହି ଜଳପ୍ରପାତ। ପାହାଡ଼ ଶିଖରରୁ ଝରି ଆସୁଥିବା ଝରଣାର ଝରଝର ଶବ୍ଦ ସହ ପାହାଡ଼, ଜଙ୍ଗଲ ଘେରା ପରିବେଶ ପର୍ଯ୍ୟଟକଙ୍କୁ ସ୍ବର୍ଗୀୟ ଅନୁଭୂତି ଦେଇଥାଏ। ପାହାଡ଼ ଭିତର ଦେଇ ଲୋକେ ଜଳପ୍ରପାତକୁ ନିକଟକୁ ଯାଇଥାନ୍ତି। ଜଳପ୍ରପାତର ୨ଟି ଭାଗ ରହିଛି। ଉପରଭାଗ ଅପର ଜଳପ୍ରପାତ ଏବଂ ପାହାଡ଼ ତଳ ଭାଗ ଲୋୟର ଜଳପ୍ରପାତ ଭାବେ ପରିଚିତ। ପୂର୍ବରୁ ରହିଥିବା କାଠର ଅଙ୍କାବଙ୍କା ପ୍ରବେଶ ଦ୍ୱାର ଜଳପ୍ରପାତକୁ ଅଧିକ ଆକର୍ଷଣୀୟ କରିଥାଏ। ରାୟଗଡ଼ା ସହରଠାରୁ ଅଳ୍ପ ଦୂର ହୋଇଥିବାରୁ ଅନେକ ଲୋକ ସପ୍ତାହ ଶେଷରେ ଡ୍ରୋନ୍ କ୍ୟାମେରା ସାହାଯ୍ୟରେ ଏଠାକାର ପ୍ରାକୃତିକ ସୌନ୍ଦର୍ଯ୍ୟକୁ କଏଦ କରିବା ସହ କ୍ୟାମେରାରେ ସେଲ୍ଫି ନେବାର ମଜା ଉଠାଇଥାନ୍ତି। ଝରଣାର ଉପର ଭାଗରେ ରହିଥିବା ବଡ଼ ବଡ଼ ପଥର ସ୍ଥାନରେ ଲୋକେ ବଣଭୋଜି କରିଥାନ୍ତି। ଏଠାକୁ ଆସିଲେ ଲୋକେ ନିଜର ସବୁ ଦୁଃଖ ଓ ଅବସାଦ ଭୁଲିଯାଇଥାନ୍ତି। ପାହାଡ଼ରୁ ୪ଟି ସୋପାନରେ ଝରଣା ଜଳ ତଳକୁ ଝରିଆସୁଥିବାର ମନୋଲୋଭା ଦୃଶ୍ୟ ବେଶ୍ ବିମୋହିତ କରିଥାଏ। ଏଠାକୁ ଜିଲା, ରାଜ୍ୟ, ଦେଶ ଏବଂ ବିଦେଶରୁ ପର୍ଯ୍ୟଟକ ବୁଲିବାକୁ ଆସିଥାନ୍ତି। ବିଶେଷକରି ବଣଭୋଜି ପାଇଁ ଦୁର୍ଗାପାଡ଼ୁ ଜଳପ୍ରପାତ ନିକଟରେ ଭିଡ଼ ଜମିଥାଏ। ଜିଲା ଓ ରାଜ୍ୟ ପର୍ଯ୍ୟଟନ ବିଭାଗ ପକ୍ଷରୁ ଏହି ଅଞ୍ଚଳର ବିକାଶ ସହ ପର୍ଯ୍ୟଟନସ୍ଥଳୀର ମାନ୍ୟତା ପ୍ରଦାନ କଲେ ଏଠାକୁ ଅଧିକ ପର୍ଯ୍ୟଟକ ଆସିବା ସହ ରାଜସ୍ବ ବୃଦ୍ଧି ପାଇବ ବୋଲି ବୁଦ୍ଧିଜୀବୀଙ୍କ ମଧ୍ୟରେ ମତପ୍ରକାଶ ପାଉଛି।
କେମିତି ଯିବେ
ରାୟଗଡ଼ା ସହରରୁ ଜଳପ୍ରପାତର ଦୂରତା ୩୭ କି.ମି.। ବାହାରୁ ଆସୁଥିବା ପର୍ଯ୍ୟଟକ ରାୟଗଡ଼ା ରେଳ ଷ୍ଟେଶନରେ ପହଞ୍ଚିବା ପରେ ଟ୍ୟାକ୍ସି ଏବଂ ଅଟୋ ଯୋଗେ ଭାୟା ଝୁଲା ବ୍ରିଜ୍ ଏବଂ ପିପିଲିଗୁଡ଼ା ଦେଇ ଦୁଗାପାଡ଼ୁ ଜଳପ୍ରପାତ ନିକଟକୁ ଯାଇପାରିବେ। ସେହିପରି କୋଲନରା ଦେଇ ଯିବାକୁ ହେଲେ ପିପିଲିଗୁଡ଼ା ରାସ୍ତାରେ ମଧ୍ୟ ଯାଇପାରିବେ। ରାମନାଗୁଡ଼ା କିମ୍ବା କୁମୁଦପୁର ଦେଇ ଯିବାକୁ ହେଲେ ଭାୟା ପାଣିଛାତ୍ର ଦେଇ ଯାଇପାରିବେ।
ରିପୋର୍ଟ: ଭାଗ୍ୟଶ୍ରୀ ମିଶ୍ର, ରାୟଗଡ଼ା