ଲାହୋର,୮।୨(ପି.ଟି.): ପାଦରେ ଚାଲି ହଜ୍ ନିମନ୍ତେ ସାଉଦି ଆରବ ମାରାଥନ ଯାତ୍ରା କରୁଥିବା ଜଣେ ଭାରତୀୟ ଯୁବକ ମଙ୍ଗଳବାର ପାକିସ୍ତାନରେ ପ୍ରବେଶ କରିଛନ୍ତି। ଶିହାବ ଭାଇ(୨୯) ଓ୍ବାଘା ସୀମା ଦେଇ ପାକିସ୍ତାନରେ ପହଞ୍ଚବା ପରେ ସରଓ୍ବର ତାଜ୍ ଏବଂ ଭଗତ ସିଂ ମେମୋରିଆଲ ଫାଉଣ୍ଡେଶନ ପାକିସ୍ତାନର ଅଧ୍ୟକ୍ଷ ଇମତିଆଜ ରଶିଦ କୁରେଶୀ ତାଙ୍କୁ ସ୍ବାଗତ କରିଛନ୍ତି। ଭିଜା ଦେବା ପାଇଁ ପାକସ୍ତାନର ଏକ କୋର୍ଟ ମନା କରିବା ପରେ ଶିଆଦଙ୍କ ତରଫରୁ ସରଓ୍ବର ପାକିସ୍ତାନ ସୁପ୍ରିମକୋର୍ଟରେ ରିଟ୍ ପିଟିଶନ ଦାଏର କରିଥିଲେ। ହଜ୍ ଯାତ୍ରା ଜାରି ରଖିବା ଲାଗି ଭିଜା ପାଇଥିବାରୁ ଶିହାବ ବହୁତ ଖୁସି ଅଛନ୍ତି। ସେ ଭଲ ପାଇବା, ବନ୍ଧୁତ୍ୱ ଏବଂ ଭ୍ରାତୃଭାବର ବାର୍ତ୍ତା ଆଣିଥିବା କୁରେଶୀ କହିଛନ୍ତି। କେରଳ ବାସିନ୍ଦା ଶିହାବ ଗତବର୍ଷ ଅକ୍ଟୋବରରେ ହଜ୍ ପଦଯାତ୍ରାରେ ବାହାରିଥିଲେ। ସେ ୩,୦୦୦ କିଲୋମିଟର ଅତିକ୍ରମ କରି ଓ୍ବାଘା ସୀମାରେ ପହଞ୍ଚତ୍ବା ପରେ ତାଙ୍କ ପାଖରେ ଭିଜା ନ ଥିବାରୁ ପାକ୍ କର୍ତ୍ତୃପକ୍ଷ ତାଙ୍କୁ ଅଟକାଇଥିଲେ। ସେ ପାଦରେ ଚାଲି ହଜ୍ ଯାତ୍ରାରେ ଯାଉଥିବାରୁ ମାନବୀୟ ଦୃଷ୍ଟିକୋଣରୁ ତାଙ୍କୁ ଛାଡ଼ିବାକୁ ଶିହାବ ଅନୁରୋଧ କରିଥିଲେ। ଇମିଗ୍ରେଶନ ଅଧିକାରୀ ତାଙ୍କ ଅନୁରୋଧ ନ ରଖିବାରୁ ଲାହୋରର ସରଓ୍ବର ତାଙ୍କ ଭିଜା ପାଇଁ ସେଠାର ହାଇକୋର୍ଟରେ ପିଟିଶନ ଦାଏର କରିଥିଲେ। ହାଇକୋର୍ଟ ଭିଜା ଦେବାକୁ ମନା କରିବା ପରେ ସରଓ୍ବର ପାକ୍ ସୁପ୍ରିମକୋର୍ଟଙ୍କ ଦ୍ୱାରସ୍ଥ ହୋଇଥିଲେ। ଟ୍ରାଞ୍ଜିଟ୍ ଭିଜା ପାଇବା ପରେ ଶିହାବ ପାକିସ୍ତାନରେ ପ୍ରବେଶ କରିଛନ୍ତି।