ସିଡ୍ନୀ,୧୪।୧୨(ପି.ଟି.): ସିଡ୍ନୀରେ ଗୁରୁବାରଠାରୁ ଆରମ୍ଭ ହେବାକୁ ଯାଉଥିବା ଦିବାରାତ୍ର ପ୍ରଥମ ଟେଷ୍ଟ ମ୍ୟାଚ ପୂର୍ବରୁ ଭ୍ରମଣକାରୀ ଭାରତୀୟ ଦଳ ଭଲ ଅଭ୍ୟାସ କରିବାର ସୁଯୋଗ ହାସଲ କରିଛି। ସ୍ଥାନୀୟ ସିଡ୍ନୀ କ୍ରିକେଟ ଗ୍ରାଉଣ୍ଡରେ ଅଷ୍ଟ୍ରେଲିଆ ଏ’ ଓ ଭାରତ ମଧ୍ୟରେ ଖେଳାଯାଇଥିବା ୩ ଦିନିଆ ଦିବାରାତ୍ର ଅଭ୍ୟାସ ମ୍ୟାଚ ରବିବାର ଅମୀମାଂସିତ ଭାବେ ଶେଷ ହୋଇଛି। ଭଭୟ ଦଳ ଦୁଇଟି ଇନିଂସ ଖେଳିବାର ସୁଯୋଗ ହାସଲ କରିଛନ୍ତି। ଏହି ରିହର୍ସାଲ ମ୍ୟାଚ ଖେଳି ଭାରତୀୟ ଖେଳାଳିମାନେ ସିଡ୍ନୀର ପରିବେଶ ସହ ଖାପ ଖୁଆଇବା ସହିତ ପ୍ରଭାବୀ ପ୍ରଦର୍ଶନ କରିଛନ୍ତି। ତେବେ ତୃତୀୟ ତଥା ଅନ୍ତିମ ଦିବସରେ ଅଷ୍ଟ୍ରେଲିଆ ମିଡିଲ ଅର୍ଡର ବ୍ୟାଟ୍ସମ୍ୟାନ ବେନ୍ ମ୍ୟାକ୍ଡର୍ମୋଟ ଓ ଜ୍ୟାକ୍ ଓ୍ବିଲଡରମୁଥ୍ ଶତକ ହାସଲ କରି ହିରୋ ସାବ୍ୟସ୍ତ ହୋଇଛନ୍ତି।
ଦ୍ୱିତୀୟ ଦିବସ ଶେଷରେ ଭାରତ ଦ୍ୱିତୀୟ ଇନିଂସରେ ୯୦ ଓଭରରେ ୪ ଉଇକେଟ ହରାଇ ୩୮୬ ରନ କରି ଇନିଂସ ଘୋଷଣା କରିଥିଲା। ରବିବାର ସକାଳୁ ଅର୍ଥାତ୍ ଅନ୍ତିମ ଦିବସରେ ଅଷ୍ଟ୍ରେଲିଆ ତା’ର ଦ୍ୱିତୀୟ ଇନିଂସ ଆରମ୍ଭ କରି ୭୫ ଓଭରରେ ୪ ଉଇକେଟ ହରାଇ ୩୦୭ ସଂଗ୍ରହ କରିଛି। ୨୫ ରନରେ ୩ ଉଇକେଟ ହରାଇ ଘରୋଇ ଦଳ ପ୍ରାରମ୍ଭିକ ବିପର୍ଯ୍ୟୟର ସମ୍ମୁଖୀନ ହୋଇଥିଲା। ଓପନର ମାର୍କସ ହାରିସ୍ ୫ ଓ ଜୋ ବନର୍ସ ୧ ରନକରି ଦ୍ରୁତ ବୋଲର ମହମ୍ମଦ ସାମିଙ୍କ ଦ୍ୱାରା ଆଉଟ ହୋଇଥିଲେ। ସେହିପରି ନିକ୍ ମାଡିନଶନ ୧୪ ରନ କରିଥିବା ବେଳେ ନବୀଦପ ସଇନିଙ୍କୁ କ୍ୟାଚ୍ ଦେଇ ମହମ୍ମଦ ସିରାଜଙ୍କ ଦ୍ୱାରା ଆଉଟ ହୋଇଥିଲେ।
ଏହାପରେ ଉଇକେଟକିପର ବ୍ୟାଟ୍ସମ୍ୟାନ ଆଲେକ୍ସ କାରେ ଓ ମ୍ୟାକ୍ଡର୍ମୋଟ୍ ଚତୁର୍ଥ ଉଇକେଟରେ ୧୧୭ ରନର ପାର୍ଟନରଶିପ୍ ସ୍ଥାପନ କରି ସ୍ଥିତି ସମ୍ଭାଳିଥିଲେ। ତେବେ କାରେ ୫୮ ରନର ଅର୍ଦ୍ଧଶତକୀୟ ପାଳି ଖେଳି ବଦଳ ଖେଳାଳି କାର୍ତ୍ତିକ ତ୍ୟାଗୀଙ୍କୁ କ୍ୟାଚ୍ ଦେଇ ହନୁମା ବିହାରୀଙ୍କ ଶିକାର ହୋଇଥିଲେ। ଏହାପରେ ପଞ୍ଚମ ଉଇକେଟରେ ମ୍ୟାକଡର୍ମୋଟ ଓ ଓ୍ବିଲଡରମୁଥ ୧୯୩ଟି ବଲର ସମ୍ମୁଖୀନ ହୋଇ ଅପରାଜିତ ୧୬୫ ରନ ସଂଗ୍ରହ କରି ଭାରତୀୟ ବୋଲରଙ୍କୁ ନିରାଶ କରିଥିଲେ। ଉଭୟ ବ୍ୟାଟ୍ସମ୍ୟାନ ଶତକ ହାସଲ କରି ଶେଷ ପର୍ଯ୍ୟନ୍ତ ଅପରାଜିତ ରହିଥିଲେ। ୧୬୭ଟି ବଲର ସମ୍ମୁଖୀନ ହୋଇ ମ୍ୟାକ୍ଡର୍ମୋଟ ୧୬ ଚୌକା ସହ ଅପରାଜିତ ୧୦୭ ରନର ଶତକୀୟ ପାଳି ଖେଳିଥିଲେ। ସେହିପରି ଓ୍ବିଲଡରମୁଥ୍ ୧୧୯ଟି ବଲ୍ ଖେଳି ୧୨ ଚୌକା ଓ ୩ ଛକା ସହ ୧୧୧ ରନର ଶତକୀୟ ପାଳି ଖେଳି ଅପରାଜିତ ରହିଥିଲେ। ବୋଲିଂରେ ଭାରତ ପକ୍ଷରୁ ସାମି ୨, ମହମ୍ମଦ ସିରାଜ ଓ ବିହାରୀ ଗୋଟିଏ ଲେଖାଏ ଉଇକେଟ ଅକ୍ତିଆର କରିଥିଲେ।
ପୂର୍ବରୁ ଟସ୍ ଜିତି ଭାରତ ପ୍ରଥମ ଇନିଂସରେ ୪୮.୩ ଓଭରରେ ୧୯୪ ରନକରି ଅଲଆଉଟ ହୋଇଥିଲା। ଜବାବରେ ପ୍ରଥମ ଇନିଂସ ଆରମ୍ଭ କରି ଅଷ୍ଟ୍ରେଲିଆ ୩୨.୨ ଓଭରରେ ୧୦୮ ରନ କରି ଅଲ୍ଆଉଟ ହୋଇଥିଲା। ଫଳରେ ଭାରତ ୮୬ ରନର ଅଗ୍ରଣୀ ହାସଲ କରିଥିଲା। ଦ୍ୱିତୀୟ ଇନିଂସରେ ଭାରତ ଜବରଦସ୍ତ ପ୍ରଦର୍ଶନ କରିଥିଲା। ଦଳ ହନୁମା ବିହାରୀ ଓ ରିଷଭ ପନ୍ତଙ୍କ ଅପରାଜିତ ଶତକ, ମୟଙ୍କ ଅଗ୍ରଓ୍ବାଲ ଓ ଶୁବମନ ଗିଲଙ୍କ ଅର୍ଦ୍ଧଶତକ ସହ ୯୦ ଓଭରରେ ୪ ଉଇକେଟ ହରାଇ ୩୮୬ ରନ କରି ଇନିଂସ ଘୋଷଣା କରିଥିଲା। ପନ୍ତ ୭୩ ବଲରୁ ୯ ଚୌକା ଓ ୬ ଛକା ସହ ୧୦୩ ରନ, ବିହାରୀ ୧୯୪ ବଲରୁ ୧୩ ଚୌକା ସହ ୧୦୪ ରନକରି ଅପରାଜିତ ରହିଥିଲେ। ସେହିପରି ମୟଙ୍କ ୬୧ ଓ ଗିଲ୍ ୬୫ ରନ ସଂଗ୍ରହ କରିଥିଲେ। ଏହି ମ୍ୟାଚରେ ଅଷ୍ଟ୍ରେଲିଆ ଏ’ ଅପେକ୍ଷା ଭାରତ ପ୍ରଦର୍ଶନ ଅପେକ୍ଷାକୃତ ଭଲ ରହିଥିଲା।
ସଂକ୍ଷିପ୍ତ ସ୍କୋର:
ଭାରତ ପ୍ରଥମ ଇନିଂସ: ୪୮.୩ ଓଭରରେ ୧୯୪ ଅଲଆଉଟ।
ଅଷ୍ଟ୍ରେଲିଆ ଏ’ ପ୍ରଥମ ଇନିଂସ: ୩୨.୨ ଓଭରରେ ୧୦୮ ଅଲଆଉଟ।
ଭାରତ ଦ୍ୱିତୀୟ ଇନିଂସ: ୯୦ ଓଭରରେ ୪ ଉଇକେଟ ହରାଇ ୩୮୬ ଇନିଂସ ଘୋଷଣା।
ଅଷ୍ଟ୍ରେଲିଆ ଏ’ ଦ୍ୱିତୀୟ ଇନିଂସ: ୭୫ ଓଭରରେ ୩୦୭/୪
(ମ୍ୟାକଡର୍ମୋଟ- ୧୦୭*, ଓ୍ବିଲଡରମୁଥ୍- ୧୧୧*, କାରେ- ୫୮, ସାମି- ୨/୫୮, ସିରାଜ- ୧/୫୪, ବିହାରୀ- ୧/୧୪)।