ଦୁନିଆରେ ଏପରି ଅନେକ ବିରଳ ପ୍ରଜାତିର ପ୍ରାଣୀ ଅଛନ୍ତି, ଯାହା ଆମ ନଜର ଆଢୁଆଳରେ ରହିଯାଇଥାନ୍ତି। ଯାହା ବିଷୟରେ ବିଶେଷଜ୍ଞମାନେ ମଧ୍ୟ ଅବଗତ ନ ଥାନ୍ତି।
ବ୍ରିଟେନରେ ଏପରି ଏକ ଅନନ୍ୟ ତଥା ବିରଳ ପକ୍ଷୀ ସାମ୍ନାକୁ ଆସିଛି। ଯାହା ସାଧାରଣ ଲୋକମାନେ ଜାଣି ନ ଥିଲେ। ତାହା ହେଉଛି ଗୋଲାପୀ ପାରା। ସାଧାରଣତଃ ଧଳା ଏବଂ ଧୂସର ରଙ୍ଗର ପାରା ଦେଖିବାକୁ ମିଳୁଥିବା ବେଳେ ବ୍ରିଟେନରେ ଗୋଲାପୀ ରଙ୍ଗର ପାରା ଦେଖିବାକୁ ମିଳିଛି। ଏହା ବ୍ରିଟେନର ବର୍ନଲିରେ ନିକଟରେ ଦେଖାଯାଇଛି। କେଲି ଲୁନ୍ ତାଙ୍କ ବଗିଚାରେ ଏକ ଗୋଲାପୀ ପାରାକୁ ଦେଖିଥିଲେ। ଏହା ଦେଖି ସେ ଆଶ୍ଚର୍ଯ୍ୟ ହୋଇଯାଇଥିଲେ।
ଲୁନ୍ ଏହା ତାଙ୍କ ଆଖିର ଭ୍ରମ ବୋଲି ଭାବିଥିଲେ। ଦୀର୍ଘ ସମୟ ଧରି ପାରାକୁ ନିରୀକ୍ଷଣ କରିବା ପରେ ସ୍ପଷ୍ଟ ହୋଇଥିଲେ ଯେ, ଏହା ଗୋଲାପୀ ରଙ୍ଗର। ଲୁନ୍ ତାଙ୍କ ଘର ବଗିଚାରେ ପାରାଙ୍କ ପାଇଁ ଶସ୍ୟ ପକାନ୍ତି। ସବୁଦିନ ପାରାପଲ ଆସି ଏହାକୁ ଖାଇଥାନ୍ତି। ଦିନେ ପାରାଗୁଡ଼ିକୁ ଶସ୍ୟ ଦେବା ସମୟରେ ଏହି ଗୋଲାପୀ ପାରା ଉପରେ ତାଙ୍କର ନଜର ପଡ଼ିଥିଲା। ପାଖରୁ ସେ ବଗିଚାରେ ଖାଦ୍ୟ ବାଛିଥିବା ପାରାପଲକୁ ଦେଖୁଥିଲେ। ସେ ତୁରନ୍ତ କ୍ୟାମେରାରେ ଗୋଲାପୀ ପାରାଟିର ଫଟୋ ଉଠାଇ ସୋସିଆଲ ମିଡିଆରେ ଶେୟାର କରିଥିଲେ। ଯାହା ଖୁବ୍ ଭାଇରାଲ ହେବାରେ ଲାଗିଛି।
ଏହି ପାରା ବିଷୟରେ ସେ ଅଧିକ ଜାଣିବା ପାଇଁ ନେଟ୍ରେ ସର୍ଚ୍ଚ କରିଥିଲେ। ଏଥିରୁ ଜାଣିବାକୁ ପାଇଥିଲେ ୧୯୯୦ ଦଶକରେ ଏହା ବିଲୁପ୍ତ ହୋଇଯାଇଥିଲା। ବିଶେଷଜ୍ଞମାନେ ପୁନର୍ବାର ଦେଖିବା ପରେ ଖୁସି ବ୍ୟକ୍ତ କରିଛନ୍ତି।
ଗୁଗ୍ଲ ସୂଚନାନୁଯାୟୀ, ଏହା ମରିସସର ନେସୋନାସ ମିରୀ ଗୋଲାପୀ ପ୍ରଜାତିର ପାରା। ଦୁନିଆର ବିରଳ ପକ୍ଷୀମାନଙ୍କ ମଧ୍ୟରୁ ଏହା ଗୋଟିଏ। ୧୯୯୦ ଦଶକରେ ପ୍ରାୟ ବିଲୁପ୍ତ ହେବା ପରେ ସେମାନଙ୍କ ମଧ୍ୟରୁ କେବଳ ୫୦୦ଟି ପାରା ଅଛନ୍ତି। ଏହାର ଗୋଲାପୀ ଗୋଡ଼ ମଧ୍ୟ ଅଛି। ଏହା ଉଡ଼ିବା ସମୟରେ ଉଭୟ ପାର୍ଶ୍ୱରେ ସମାନ ଦେଖାଯାଏ। ଗୋଲାପୀ ପାରାଗୁଡ଼ିକ ପୂର୍ବରୁ ଇଂଲଣ୍ଡ, ୨୦୧୨ରେ ଲଣ୍ଡନ ଏବଂ ୨୦୧୫ରେ ବ୍ରିଷ୍ଟଲରେ ଦେଖାଯାଇଥିଲା।