ନବରଙ୍ଗପୁର,୨୪।୧୨(ବି.ପ୍ର.): ନବରଙ୍ଗପୁର ଜିଲା ଚନ୍ଦାହାଣ୍ଡି ବ୍ଲକ ପାଟଖଲିଆ ଓ ଗମ୍ଭାରିଗୁଡ଼ା ପଞ୍ଚାୟତରେ କାମ ନ ହୋଇ ବିଲ୍ ହୋଇଥିବା ଅଭିଯୋଗରେ ଭିଜିଲାନ୍ସ ତଦନ୍ତ ଆରମ୍ଭ କରିଥଲା। ପରେ ଦୁଇଟି ୩୮/୨୨ ଓ ୩୯/ ୨୨ରେ ପୃଥକ୍ ମାମଲା ରୁଜୁକରି ତତ୍କାଳୀନ ପଞ୍ଚାୟତ କାର୍ଯ୍ୟ ନିର୍ବାହୀ ଅଧିକାରୀ (ପିଇଓ) ନିମାଇ ସରକାରଙ୍କୁ ଗିରଫ କରି କୋର୍ଟ ଚାଲାଣ କରିଛି ନବରଙ୍ଗପୁର ଭିଜିଲାନ୍ସ। ଏହି ଘଟଣାରେ ସମ୍ପୃକ୍ତ ୨ ପୂର୍ବତନ ସରପଞ୍ଚ ଫେରାର ଥିବା ଜଣାପଡିଛି।
ପାଟଖଲିଆ ପଞ୍ଚାୟତରେ ୨୦ ଲକ୍ଷ ଟଙ୍କା ବ୍ୟୟରେ କଲ୍ୟାଣ ମଣ୍ଡପ ଏବଂ ଗମ୍ଭାରିଗୁଡା ପଞ୍ଚାୟତରେ ୨୫ ଲକ୍ଷ ଟଙ୍କାରେ ଏକ ମାର୍କେଟ କମ୍ପ୍ଲେକ୍ସ କାମ ହୋଇଥିବା ଫାଇଲ ପତ୍ରରେ କୁହାଯାଇଥିଲା। ପିଇଓ ଅନୁଦାନ ଅର୍ଥକୁ ନିଜ ଆକାଉଣ୍ଟକୁ ନିଫ୍ଟ, ଚେକ୍ରେ ନେଇଯାଇଥିଲେ। ମାର୍କେଟ କମ୍ପ୍ଲେକ୍ସ ଓ କଲ୍ୟାଣ ମଣ୍ଡପ ପାଇଁ ମାଟି ଖୋଳା ନ ହୋଇ ବିଲ୍ ହୋଇଥିବା ନେଇ ଅଭିଯୋଗ ହୋଇଥିଲା। ନଭେମ୍ବର ୨୩ରେ ଭିଜିଲାନ୍ସ ଟିମ୍ ଉକ୍ତ ପଞ୍ଚାୟତକୁ ଯାଇ ପିଇଓ ନିମାଇ ସରକାର ଓ ଜଣେ ପୂର୍ବତନ ସରପଞ୍ଚଙ୍କୁ ପଚରାଉଚରା କରିଥିଲେ। ଅଭିଯୋଗ ପରେ ଘଟଣାସ୍ଥଳକୁ ଯାଇ ତଦନ୍ତ କରିବାରୁ ସେଠାରେ ତେବେ କଲ୍ୟାଣ ମଣ୍ଡପ ଓ ମାର୍କେଟ କମ୍ପ୍ଲେକ୍ସ ନ ଥିବା ନେଇ ନବରଙ୍ଗପୁର ଭାରପ୍ରାପ୍ତ ଭିଜିଲାନ୍ସ ଡିଏସ୍ପି କଳାବତୀ ବାଘ ସୂଚନା ଦେଇଥିଲେ। ଚନ୍ଦାହାଣ୍ଡି ବିଡିଓଙ୍କୁ ଉଭୟ କାମର ଡକ୍ୟୁମେଣ୍ଟ ମାଗିଥିଲେ। ଡକୁମେଣ୍ଟ ମିଳିଲା ପରେ କେତେ ଟଙ୍କା ବିଲ୍ ହୋଇଛି, କେଉଁ ଅଧିକାରୀ ଡାୟିତ୍ୱରେ ରହିଥିଲେ ଏବଂ କାହା ସମୟରେ ବିଲ୍ ହୋଇଛି ତାହା ଜଣାପଡିବା ପରେ କାର୍ଯ୍ୟାନୁଷ୍ଠାନ ଆରମ୍ଭ ହୋଇଛି। ଟଙ୍କା ଉଠାଇବେଳେ ପିଇଓ ଏବଂ ସରପଞ୍ଚଙ୍କ ଦସ୍ତଖତ ରହିଥିବାରୁ ସମ୍ପୃକ୍ତ ୩ ଜଣଙ୍କ ନାମରେ ମାମଲା ରୁଜୁ ହୋଇଥିଲା।