ଅମରପାଲି,୨୦ା୫(ଡି.ଏନ.ଏ.): ସୁବର୍ଣ୍ଣପୁର ଜିଲା ବୀରମହାରାଜପୁର ବ୍ଲକ ସଂଗ୍ରାମପୁର ପଞ୍ଚାୟତ କାର୍ଯ୍ୟାଳୟ ପରିସରରେ କାର୍ଯ୍ୟରତ ପିଅନ ପଞ୍ଚାୟତ ନିର୍ବାହୀ ଅଧିକାରୀ(ପିଇଓ)ଙ୍କୁ ଶୁକ୍ରବାର ତାଲା ପକାଇ ଦେଇଥିଲେ। ଆକ୍ରୋଶ ମନୋଭାବ ରଖି ପିଅନ ଅନ୍ୟଜଣେ ଯୁବକଙ୍କ ସହ ମିଶି ତାଙ୍କୁ ଆକ୍ରମଣ କରିବା ସହ ଅଫିସରେ ତାଲା ପକାଇ ଦେଇଥିବା ପିଇଓ ସୁବଳୟା ଥାନାରେ ଅଭିଯୋଗ କରିଛନ୍ତି। ଅପରପକ୍ଷରେ ଅଫିସରେ ମଦ୍ୟପାନ କରୁଥିବା ଅଭିଯୋଗ କରି ପିଅନ ମଧ୍ୟ ଥାନାରେ ତାଙ୍କ ବିରୋଧପାଲଟା ଅଭିଯୋଗ କରିଛନ୍ତି। ପିଇଓଙ୍କ ଅଭିଯୋଗ ଆଧାରରେ ଏକ ମାମଲା(୭୧/୨୩) ଏବଂ ପିଅନଙ୍କ ଅଭିଯୋଗକ୍ରମେ ଅନ୍ୟ ଏକ ମାମଲା (୭୨/୨୩) ରୁଜୁ ହୋଇଛି।
ସୂଚନାମତେ ସଂଗ୍ରାମପୁର ପଞ୍ଚାୟତକୁ ଅପରାହ୍ନ ପ୍ରାୟ ୨ଟାରେ ସଂଗ୍ରାମପୁର ପିଇଓ ଆଦିତ୍ୟ ମେଣ୍ଡିଲି ଏବଂ କମିରା ପଞ୍ଚାୟତ ଯୋଗାଣ ସହାୟକ ବିନୋଦ ପଧାନ ପଞ୍ଚାୟତ ଅଫିସକୁ ଆସିଥିଲେ। କୌଣସି କାମରେ ପିଇଓ ମେଣ୍ଡଲିି ପଞ୍ଚାୟତ ପିଅନ ସୁମିତ ପାତ୍ରଙ୍କୁ ଡାକିଥିଲେ। ଶୁଣିବା ଦୂରର କଥା ପିଅନ ସହଯୋଗୀ କମଳ ଲୋଚନ କର୍ମୀଙ୍କ ସହ ତାଙ୍କୁ ଓଲଟି ଗାଳିଗୁଲଜ ଓ ଆକ୍ରମଣ କରି ତାଲା ପକାଇ ଦେଇଥିବା ଅଭିଯୋଗରେ ଦର୍ଶାଇଛନ୍ତି। ପିଅନ ପାତ୍ର ପାଲଟା ଅଭିଯୋଗରେ ଦର୍ଶାଇଛନ୍ତି କାର୍ଯ୍ୟାଳୟକୁ ଆସିବା ପରେ ପିିଇଓ ତାଙ୍କୁ ମଦ ପିଇବାକୁ ପାଣି ଆଣିବାକୁ କହିଥିଲେ। ହେଲେ ସେ ଏଥିରେ ରାଜି ନ ହେବାରୁ ପିଇଓଙ୍କ ସହ ଥିବା ପଧାନ ପିଅନ ତାଙ୍କୁ ଧମକ ଚମକ ଦେଇଥିବା ଅଭିଯୋଗ ହୋଇଛି। କାର୍ଯ୍ୟାଳୟ ପରିସରରେ ଉଭୟଙ୍କ ମଧ୍ୟରେ ପାଟିତୁଣ୍ଡ ଶୁଣି ଗ୍ରାମବାସୀ ପଞ୍ଚାୟତ ପରିସରରେ ରୁଣ୍ଡ ହୋଇଥିଲେ। ଖବର ପାଇ ସୁବଳୟା ଥାନା ପୋଲିସ ପଞ୍ଚାୟତ କାର୍ଯ୍ୟାଳୟରେ ପହଞ୍ଚି ପିଇଓଙ୍କୁ ଉଦ୍ଧାର କରିଥିଲେ। ଏ ନେଇ ପିଇଓ ମେଣ୍ଡିଲିଙ୍କୁ ପଚାରିବାରୁ ମଦ୍ୟପାନ ଅଭିଯୋଗକୁ ଖଣ୍ଡନ କରିବା ସହିତ ତାଙ୍କୁ ଆକ୍ରମଣ ହୋଇଥିବା କହିଛନ୍ତି।