ନାଉଗଁା,୨୦ା୧୨(ସ୍ବ.ପ୍ର.):ରାଜ୍ୟ ସରକାର ବସୁଧା ଯୋଜନାରେ ପ୍ରତି ଗ୍ରାମକୁ ବିଶୁଦ୍ଧ ପାନୀୟ ଜଳ ଯୋଗାଇବାର ବ୍ୟବସ୍ଥା କରୁଛନ୍ତି। ଏହି ପରିପ୍ରେକ୍ଷୀରେ ଜଗତ୍ସିଂହପୁର ଜିଲା ନାଉଗଁା ବ୍ଲକର ବିଭିନ୍ନ ପଞ୍ଚାୟତରେ ଅର୍ଥ ଖର୍ଚ୍ଚ କରାଯାଇ ପାନୀୟ ଜଳ ପ୍ରକଳ୍ପ ନିର୍ମାଣ ହେଉଛି। ପାଇପ ବିଛା ଯାଇ ପ୍ରତି ଗୃହକୁ ପାନୀୟ ଜଳ ଯୋଗାଇବାକୁ କାମ ଜାରି ରହିଛି। ପାଇପ ବିଛା ହେବା ବେଳେ ପୂର୍ତ୍ତ ବିଭାଗ, ଗ୍ରାମ୍ୟ ଉନ୍ନୟନ ବିଭାଗ ଓ ପଞ୍ଚାୟତ ରାସ୍ତା ପାର୍ଶ୍ୱ ଖୋଳା ଯାଉଛି। ମାତ୍ର ରାସ୍ତାପାର୍ଶ୍ୱ ଖୋଳାଯିବା ସମୟରେ ଶ୍ରମିକଙ୍କ ବଦଳରେ ଜେସିବି ମେଶିନ ବ୍ୟବହାର କରାଯାଉଥିବା ଅଭିଯୋଗ ହେଉଛି। ମେଶିନରେ ଖୋଳାଯିବା ଦ୍ୱାରା ଆବଶ୍ୟକଠାରୁ ଅଧିକ ଖୋଳା ଯାଉଛି। ବସୁଧା ଯୋଜନାରେ କାମ କରୁଥିବା ଠିକାଦାର ପାଇପ ସଂଯୋଗ ପାଇଁ ମନଇଚ୍ଛା ରାସ୍ତାପାର୍ଶ୍ୱ ଖୋଳି ୧୫ ଦିନରୁ ଅଧିକ ହେବ ପକାଇ ରଖିଛନ୍ତି। ଫଳରେ ଯାନବାହନ ଓ ଜନସାଧାରଣ ଯିବା ଆସିବାରେ ବହୁ ଅସୁବିଧାର ସମ୍ମୁଖୀନ ହେଉଥିବା ଅଭିଯୋଗ ହେଉଛି। ବସୁଧା ଯୋଜନାରେ ଯେଉଁ ସବୁ କାର୍ଯ୍ୟ ହେଉଛି ତାହାର ତଦାରଖ ଦାୟିତ୍ୱରେ ଗ୍ରାମ୍ୟ ପାନୀୟ ଜଳ ଓ ପରିମଳ ବିଭାଗ ହାତରେ ନ୍ୟସ୍ତ ରହିଛି।
ନାଉଗଁା ବଜାରରୁ ଥାନା ଛକ ପର୍ଯ୍ୟନ୍ତ ପୂର୍ତ୍ତ ବିଭାଗ ରାସ୍ତା, କୋକିଢିହ-ତେଲସରା ରାସ୍ତା, କୋକିଢିହଠାରୁ ବାଲିସାହି ପର୍ଯ୍ୟନ୍ତ ରାସ୍ତା, ଶିଖରଘାଟ-ବାଲିଭଉଁରୀ ମୁଖ୍ୟ ରାସ୍ତା, କୋକିଢିହଠାରୁ ମାରଡା ପର୍ଯ୍ୟନ୍ତ ରାସ୍ତା ଦୀର୍ଘଦିନ ହେବ ଖୋଳାଯାଇ ପଡି ରହିଛି। ରାସ୍ତାର ଦୁଇପାର୍ଶ୍ୱ ଖୋଳା ଯାଇ ଥିବାରୁ ରାତିରେ ଯାନବାହନ ଯିବା ସମୟରେ ଦୁର୍ଘଟଣା ଘଟିବାର ସମ୍ଭାବନା ମଧ୍ୟ ରହିଛି। ତେଣୁ ଖୋଳା ଯାଇଥିବା ରାସ୍ତାପାର୍ଶ୍ୱକୁ ଶୀଘ୍ର ପାଇପ ବିଛା କାମ କରି ପୋତା ଯିବାକୁ ସ୍ଥାନୀୟ ବାସିନ୍ଦା ପ୍ରଶାସନ ନିକଟରେ ଦାବି କରିଛନ୍ତି। ଏ ସମ୍ପର୍କରେ ପୂର୍ତ୍ତ ବିଭାଗ ଯନ୍ତ୍ରୀ ବଳରାମ ସ୍ବାଇଁଙ୍କୁ ପଚାରିବାରେ ରାସ୍ତା ପାର୍ଶ୍ୱ ଖୋଳିବାକୁ ଅନୁମତି ଦିଆଯାଇଛି। ତୁରନ୍ତ କାମ ଶେଷ କରିବାକୁ ଠିକାଦାରଙ୍କୁ କୁହାଯାଇଥିବା ସେ କହିଛନ୍ତି। ଏ ସଂକ୍ରାନ୍ତରେ ଗ୍ରାମ୍ୟ ଜଳ ଓ ପରିମଳ ବିଭାଗ ଯନ୍ତ୍ରୀ ରଶ୍ମି ରଞ୍ଜନ ଦାସଙ୍କୁ ପଚାରିବାରେ ଶୀଘ୍ର କାମ ଶେଷ କରି ରାସ୍ତାପାର୍ଶ୍ୱ ପୋତିବା ପାଇଁ ଠିକାଦାରଙ୍କୁ ନିର୍ଦ୍ଦେଶ ଦିଆଯାଇଛି ବୋଲି ସେ କହିଛନ୍ତି।