ନୂଆଦିଲ୍ଲୀ,୯।୧ : ଭାରତ ଏବଂ ଦକ୍ଷିଣ ଆଫ୍ରିକା ମଧ୍ୟରେ ଖେଳଯାଇଥିବା ୨ ଟିକିଆ ଟେଷ୍ଟ ମ୍ୟାଚ ସିରିଜର ଦ୍ୱିତୀୟ ତଥା ଶେଷ ଟେଷ୍ଟ ମ୍ୟାଚ କେପଟାଉନର ନ୍ୟୁଲାଣ୍ଡସ ଗ୍ରାଉଣ୍ଡରେ ଖେଳାଯାଇଥିଲା । ଦେଢ଼ ଦିନ ମଧ୍ୟରେ ଭାରତ ଏହି ଟେଷ୍ଟ ମ୍ୟାଚ ଜିତିଥିଲା। ଟେଷ୍ଟ ମ୍ୟାଚର ପ୍ରଥମ ଦିନରେ ମୋଟ ୨୩ ୱିକେଟ ଖସିଥିଲା। ଏ ବିଷୟରେ ବହୁତ ଚର୍ଚ୍ଚା ହୋଇଥିଲା। ବର୍ତ୍ତମାନ ଆଇସିସି ଏହି ପିଚ ଉପରେ ନିଷ୍ପତ୍ତି ନେଇଛି। ଏହି ମ୍ୟାଚ ଅନୁଷ୍ଠିତ ହୋଇଥିବା ପିଚ ନେଇ ଆଇସିସି ଅସନ୍ତୋଷ ବ୍ୟକ୍ତ କରିଛି। ଟେଷ୍ଟ କ୍ରିକେଟ ଇତିହାସରେ ଏହା ସବୁଠାରୁ କମ ଦିନର ଟେଷ୍ଟ ମ୍ୟାଚ ଥିଲା ଯେଉଁଠାରେ ୧୦୭ ଓଭର ବୋଲିଂ କରାଯାଇଥିଲା ଏବଂ ୩୩ ୱିକେଟ ଖସିଥିଲା। ଆୟୋଜକ ଦକ୍ଷିଣ ଆଫ୍ରିକା ଦଳ ଗୋଟିଏ ଦିନରେ ଦୁଇଥର ଅଲ ଆଉଟ ହୋଇଥିବାବେଳେ ପ୍ରଥମ ଦିନରେ ଦ୍ୱିତୀୟ ଇନିଂସରେ ଭାରତୀୟ ଦଳ ୭୯ ରନରେ ୩ ୱିକେଟ ହରାଇଥିଲା।
ଆଇସିସି ମ୍ୟାଚ ରେଫରି କ୍ରିସ ବ୍ରଡ କେପଟାଉନ ଟେଷ୍ଟର ପିଚ ସମ୍ପର୍କରେ ତାଙ୍କ ରିପୋର୍ଟ ଦାଖଲ କରିଛନ୍ତି। ମ୍ୟାଚ ଅଧିକାରୀମାନେ ଏହି ରିପୋର୍ଟରେ ଉଦବେଗ ପ୍ରକାଶ କରିଛନ୍ତି। ମୂଲ୍ୟାଙ୍କନ ପରେ ମ୍ୟାଚ ଅଧିକାରୀମାନେ ନ୍ୟୁଲାଣ୍ଡସ ପିଚ ନେଇ ଅସନ୍ତୁଷ୍ଟ ଥିବା ଘୋଷଣା କରିଛନ୍ତି। କ୍ରିସ ବ୍ରଡ କହିଛନ୍ତି, ’ନ୍ୟୁଲାଣ୍ଡସରେ ପିଚ ବ୍ୟାଟ୍ସମ୍ୟାନଙ୍କ ପାଇଁ କଷ୍ଟସାଧ୍ୟ ଥିଲା। ସମଗ୍ର ମ୍ୟାଚରେ ବଲ ଦ୍ରୁତ ଗତିରେ ବାଉନ୍ସ ହୋଇଥିଲା ଏବଂ ବେଳେବେଳେ ବିପଜ୍ଜନକ ଭାବରେ ହୋଇଥିଲା। ଯେଉଁଥିପାଇଁ ବ୍ୟାଟ୍ସମ୍ୟାନଙ୍କ ପାଇଁ ସଟ ଖେଳିବା କଷ୍ଟକର ହୋଇଥିଲା। ଅନେକ ବଲ ବ୍ୟାଟ୍ସମ୍ୟାନଙ୍କ ଗ୍ଲୋବ୍ସକୁ ମାଡ ହୋଇ ବିପଜ୍ଜନକ ଭାବରେ ବାଉନ୍ସ ହୋଇଥିଲା।
ସୂଚନାଯୋଗ୍ୟ, ଆଇସିସି ପିଚ ଏବଂ ଆଉଟଫିଲ୍ଡ ମନିଟରିଂ ପ୍ରକ୍ରିୟାରେ, ଯଦି ଏକ ପିଚ କିମ୍ବା ଆଉଟଫିଲ୍ଡ ଭଲ ବୋଲି ବିବେଚନା କରାଯାଏ ନାହିଁ, ତେବେ ସେହି ସ୍ଥାନକୁ ଗୋଟିଏ ଡିମେରିଟ ପଏଣ୍ଟ ଦିଆଯାଏ। ଯାହାର ପିଚ ଏବଂ ଆଉଟଫିଲ୍ଡ ନେଇ ମ୍ୟାଚ ରେଫରି ଅସନ୍ତୁଷ୍ଟ। ଯଦି କୌଣସି ସ୍ଥାନ ୬ଟି ଡିମେରିଟ ପଏଣ୍ଟ ପାଏ ତେବେ ସେଠାରେ ଗୋଟିଏ ବର୍ଷ ପାଇଁ କୌଣସି ଅନ୍ତର୍ଜାତୀୟ କ୍ରିକେଟ ମ୍ୟାଚ ଆୟୋଜିତ ହୋଇପାରିବ ନାହିଁ। ଏହି ନିଷ୍ପତ୍ତି ଉପରେ ଅପିଲ କରିବାକୁ ଦକ୍ଷିଣ ଆଫ୍ରିକା କ୍ରିକେଟ ବୋର୍ଡ ପାଖରେ ୧୪ ଦିନ ବାକି ଅଛି।