କାମାକ୍ଷାନଗର,୭।୮(ସୁଧୀର ପରିଡ଼ା): ସରକାରୀସ୍ତରରେ ନିରନ୍ତର ଉଦ୍ୟମ ସତ୍ତ୍ୱେ ଏବେ ବି ମୁଖ୍ୟସ୍ରୋତ ସହ ଯୋଡ଼ି ହୋଇପାରିନାହିଁ ଢେଙ୍କାନାଳ ଜିଲାର କଙ୍କଡ଼ାହାଡ଼ ବ୍ଲକ କାନ୍ତୁଲ ପଞ୍ଚାୟତର ଏକୁଲ। ପ୍ରବାହିତ ବଣୁଆ ନାଳ ‘ପିଛୁଳି’ ପାଇଁ ବର୍ଷା ଦିନେ ଅକଥନୀୟ କଷ୍ଟ ଭୋଗୁଛନ୍ତି ଅଞ୍ଚଳବାସୀ। ବାରମ୍ବାର ଦାବି ସତ୍ତ୍ୱେ ନାଳ ଉପରେ ସେତୁ ନିର୍ମାଣ ହେଉ ନ ଥିବାରୁ ବର୍ଷା ୪ ମାସ ଧରି ବାହ୍ୟଜଗତରୁ ବିଚ୍ଛିନ୍ନ ହୋଇପଡୁଛି ଏହି ଉପାନ୍ତ ଅଞ୍ଚଳ।
ଆଦିବାସୀବହୁଳ କଙ୍କଡ଼ାହାଡ଼ ବ୍ଲକର ଏକୁଲର ବିକାଶ ପାଇଁ କରାଯାଇଛି ଲମ୍ବା ତାଲିକା। ହେଲେ ଅଞ୍ଚଳର ଭୌଗୋଳିକ ସ୍ଥିତି କାରଣରୁ ସବୁ ଯୋଜନା ଫସର ଫାଟୁଛି। ଉପାନ୍ତ ଏକୁଲ ଉପରେ ନିର୍ଭର କରୁଥିବା ସେକୁଲ, କୋଟ, ପୁଟ୍ଟିପାଳ ଗ୍ରାମର ୧୦୦ରୁ ଊର୍ଦ୍ଧ୍ୱ ପରିବାର ମଧ୍ୟ ଏହାଦ୍ୱାରା ଊଣା ଅଧିକେ ପ୍ରଭାବିତ ହେଉଛନ୍ତି। ଏକୁଲ ଗ୍ରାମକୁ ଅଦ୍ୟାବଧି ସବୁଦିନିଆ ସଡ଼କ ନିର୍ମାଣ ହୋଇପାରିନାହିଁ। ବର୍ଷାଦିନେ ପାହାଡ଼ ପାଣି ଖସି ପିଛୁଳି ନାଳ ଭୟଙ୍କର ରୂପ ଧାରଣ କରୁଛି। ସେତୁ ନ ଥିବାରୁ ଗମନାଗମନ ଠପ୍ ହୋଇଯାଉଛି। ଜରୁରୀ କାର୍ଯ୍ୟ ପଡ଼ିଲେ ଲୋକେ ଜୀବନକୁ ବାଜି ଲଗାଇ ନାଳ ପାର ହେଉଛନ୍ତି। ବର୍ଷା ଦିନକୁ ବାଦ୍ଦେଲେ ଅନ୍ୟ ସମୟରେ ମଧ୍ୟ ନାଳରେ ପାଣି ପ୍ରବାହିତ ହେଉଥିବାରୁ ଯାତାୟାତ କଷ୍ଟକର ହୋଇପଡୁଛି। ଗର୍ଭ ଯନ୍ତ୍ରଣାରେ ଛଟପଟ ହେଉଥିବା ମହିଳାଙ୍କୁ ଭାରରେ ବୋହି ନାଳ ପାର୍ କରିବା ପରେ ସେଠାରେ ଅପେକ୍ଷାରତ ଆମ୍ବୁଲାନ୍ସ ଡାକ୍ତରଖାନାରେ ପହଞ୍ଚାଉଛି।
ଏକୁଲ, ସେକୁଲ, କୋଟ, ପୁଟିପାଳକୁ ମୁଖ୍ୟସ୍ରୋତରେ ଯୋଡ଼ିବା ପାଇଁ ପ୍ରଶାସନ ପକ୍ଷରୁ ଉଦ୍ୟମ କରାଯାଉଛି। କିଛି ମାସ ତଳେ ଜିଲାପାଳ ପ୍ରଶାସନିକ ଅଧିକାରୀଙ୍କ ସହ ପୁଟ୍ଟିପାଳ ଏବଂ ଏକୁଲ ଗ୍ରାମ ଗସ୍ତ କରି ଲୋକଙ୍କ ସମସ୍ୟା ବୁଝିଥିଲେ। ଅପହଞ୍ଚ ଅଞ୍ଚଳବାସୀଙ୍କ ନିକଟରେ ମୌଳିକ ସୁବିଧା ପହଞ୍ଚାଇବା ଲାଗି ପ୍ରଶାସନ ପକ୍ଷରୁ ଆବଶ୍ୟକ ପଦକ୍ଷେପ ନିଆଯିବ ବୋଲି ସେ ପ୍ରତିଶ୍ରୁତି ଦେଇଥିଲେ। ଖୁବ୍ଶୀଘ୍ର ନାଳ ଉପରେ ବ୍ରିଜ୍ ନିର୍ମାଣ କରାଯିବ ବୋଲି ମଧ୍ୟ କହିଥିଲେ। ହେଲେ ଅଦ୍ୟାବଧି ସେହି କାର୍ଯ୍ୟ ଆରମ୍ଭ ହୋଇପାରିନାହିଁ। ଦେଶ ସ୍ବାଧୀନତାର ଅମୃତ ମହୋତ୍ସବ ପାଳନ କରୁଥିବାବେଳେ ଶିଳ୍ପ ଜିଲା ଢେଙ୍କାନାଳର ଉପାନ୍ତ ଅଞ୍ଚଳକୁ ସବୁଦିନିଆ ସଡ଼କ ନିର୍ମାଣ ହୋଇ ନ ପାରିବା ଏବଂ ‘୫-ଜି’ ଯୁଗରେ ମୋବାଇଲ ନେଟ୍ଓ୍ବର୍କ ଖୋଜାପଡିବା ପରିତାପର ବଷୟ ବୋଲି ଅଞ୍ଚଳବାସୀ କହିଛନ୍ତି।
ଏ ସମ୍ପର୍କରେ କାମାକ୍ଷାନଗର ଉପଜିଲାପାଳ ନାରାୟଣ ଚନ୍ଦ୍ର ନାୟକ କୁହନ୍ତି, ସେ ନୂଆକରି ଯୋଗ ଦେଇଛନ୍ତି। ଅଞ୍ଚଳର ବାସ୍ତବ ସମସ୍ୟା ବିଷୟରେ ତାଙ୍କର ବିଶେଷ ଧାରଣା ନାହିଁ। ତଥାପି ଅଞ୍ଚଳର ବିକାଶ ପାଇଁ ଯୋଜନା ପ୍ରସ୍ତୁତ ସରିଛି। ଖୁବ୍ଶୀଘ୍ର ଏହାକୁ ଚୂଡ଼ାନ୍ତ ରୂପ ଦିଆଯିବା ଲାଗି ପଦକ୍ଷେପ ନିଆଯିବ।