ଆବୁଧାବି, ୭।୧୦: ଆଇପିଏଲ୍ ଇତିହାସରେ ସବୁଠାରୁ ଅଧିକ ଉଇକେଟ୍ ହାସଲ କରିବାର ରେକର୍ଡ ମୁମ୍ବାଇ ଇଣ୍ଡିଆନ୍ସର ଲସିଥ୍ ମାଲିଙ୍ଗାଙ୍କ ନାମରେ ଲିପିବଦ୍ଧ ରହିଛି। ମାଲିଙ୍ଗା ଆଇପିଏଲ୍ରେ ୧୨୨ ମ୍ୟାଚ୍ ଖେଳି ୧୭୦ ଉଇକେଟ୍ ହାସଲ କରିଛନ୍ତି। ତେବେ ଚଳିତ ସିଜନରେ ମାଲିଙ୍ଗା ଖେଳୁ ନ ଥିବାରୁ ଦିଲ୍ଲୀ କ୍ୟାପିଟାଲ୍ସ ସ୍ପିନର ଅମିତ୍ ମିଶ୍ରାଙ୍କ ନିକଟରେ ତାଙ୍କ ରେକର୍ଡକୁ ଭାଙ୍ଗିବାର ସୁଯୋଗ ଥିଲା। ଅମିତ୍ ୧୫୦ ଆଇପିଏଲ୍ ମ୍ୟାଚ୍ରୁ ୧୬୦ ଉଇକେଟ୍ ନେଇ ଏହି ତାଲିକାରେ ମାଲିଙ୍ଗାଙ୍କ ପଛକୁ ୩ୟ ସ୍ଥାନରେ ରହିଛନ୍ତି। ତେବେ ଅମିତ୍ ମଧ୍ୟ ଆଘାତପ୍ରାପ୍ତ ହୋଇ ଆଇପିଏଲ୍ର ଚଳିତ ସିଜନ ଅଧାରୁ ବାହାର ହୋଇଯାଇଛନ୍ତି। ଫଳରେ ସର୍ବାଧିକ ଉଇକେଟ୍ ହାସଲକାରୀ ବୋଲର ଭାବେ ମାଲିଙ୍ଗାଙ୍କ ନାମରେ ଥିବା କୀର୍ତ୍ତିମାନକୁ ଭାଙ୍ଗିବା ଲାଗି ଏବେ ଚେନ୍ନାଇ ସୁପର୍ କିଙ୍ଗ୍ସର ଲେଗ୍-ସ୍ପିନର ପିୟୂଷ ଚାଓ୍ବଲାଙ୍କ ନିକଟରେ ରହିଛି। ୩୧ ବର୍ଷୀୟ ଚାଓ୍ବଲା ଆଇପିଏଲ୍ର ଚଳିତ ସିଜନ ଆରମ୍ଭ ହେବା ପୂର୍ବରୁ ୧୫୭ ମ୍ୟାଚ୍ରୁ ୧୫୦ ଉଇକେଟ୍ ନେଇଥିଲେ। ଇତିମଧ୍ୟରେ ସେ ୫ ମ୍ୟାଚ୍ ଖେଳି ୬ ଉଇକେଟ୍ ହାସଲ କରିସାରିଛନ୍ତି। ଫଳରେ ଚାଓ୍ବଲା ମୋଟ୍ ୧୬୨ ମ୍ୟାଚ୍ରୁ ୧୫୬ ଉଇକେଟ୍ ନେଇ ଏବେ ମାଲିଙ୍ଗାଙ୍କ ରେକର୍ଡକୁ ଭାଙ୍ଗିବା ଲକ୍ଷ୍ୟରେ ରହିଛନ୍ତି। ଉଲ୍ଲେଖଯୋଗ୍ୟ, ଚେନ୍ନାଇ ୬.୨ କୋଟି ଟଙ୍କାରେ ଚାଓ୍ବାଲଙ୍କୁ ଖେଳାଳି ନିଲାମୀରେ କିଣିଥିଲା।
