ଭୁବନେଶ୍ୱର, ୨୭।୧୦(ବ୍ୟୁରୋ): ଭୁବନେଶ୍ୱର ବିଜୁ ପଟ୍ଟନାୟକ ଅନ୍ତର୍ଜାତୀୟ ବିମାନବନ୍ଦରରେ ବୁଧବାର ଏକ ବିମାନ ଦୁର୍ଘଟଣାରୁ ବର୍ତ୍ତିଯାଇଛି। ଆପ୍ର ରାଜ୍ୟସଭା ସାଂସଦ ସଞ୍ଜୟ ସିଂ ଏହି ଦାବି କରିଛନ୍ତି। ଭିସ୍ତାରା ୟୁକେ୭୮୫ ବିମାନଟି ବୁଧବାର ସକାଳ ୭ରେ ଦିଲ୍ଲୀରୁ ବହାରି ଭୁବନେଶ୍ୱରରେ ପ୍ରାୟ ୯ଟାରେ ପହଞ୍ଚତ୍ଥିଲା। ଏଥିରେ ୧୫୭ଜଣ ଯାତ୍ରୀ ଥିଲେ। ତେବେ ଅବତରଣ ସମୟରେ ବିମାନଟି ଦୁର୍ଘଟଣାରୁ ଅଳ୍ପକେ ବର୍ତ୍ତି ଯାଇଥିବା ସଞ୍ଜୟ ସିଂ କହିଛନ୍ତି। ସେ ଟୁଇଟ୍ କରି କହିଛନ୍ତି, ବୁଧବାର ଭୁବନେଶ୍ୱରରେ ଭିସ୍ତାରା ବିମାନ ଅବତରଣ କରିବା ସମୟରେ ବିମାନ ଥରି ଉଠିଥିଲା। ଏହି ସମ୍ପର୍କରେ ସେ ବେସାମରିକ ବିମାନ ଚଳାଚଳ ମନ୍ତ୍ରୀ ଜ୍ୟୋତିରାଦିତ୍ୟ ସିନ୍ଧିଆଙ୍କୁ ଟୁଇଟ୍ କରିଥିଲେ। ସଞ୍ଜୟଙ୍କ ଟୁଇଟ୍ରେ ସିନ୍ଧିଆ ପ୍ରତିକ୍ରିୟ ରଖିଛନ୍ତି, ଘଟଣା ସମ୍ପର୍କରେ ଆମ ଦୃଷ୍ଟିକୁ ଆଣିଥିବାରୁ ଧନ୍ୟବାଦ। ଘଟଣାର ଅନୁସନ୍ଧାନ ପରେ ଉପଯୁକ୍ତ ପଦକ୍ଷେପ ଗ୍ରହଣ କରାଯିବ।
ଅନ୍ୟପକ୍ଷେ ଭୁବନେଶ୍ୱର ବିମାନବନ୍ଦର କର୍ତ୍ତୃପକ୍ଷ କିନ୍ତୁ ଏହି ଘଟଣାକୁ ଖଣ୍ଡନ କରିଛନ୍ତି। ଏ ନେଇ ବିମାନବନ୍ଦର ନିର୍ଦ୍ଦେଶକ ପ୍ରଭାତ ରଞ୍ଜନ ବେଉରିଆ କହିଛନ୍ତି, ଏୟାର ଟ୍ରାଫିକ କଣ୍ଟ୍ରୋଲ(ଏଟିସି)ରେ ଏଭଳି କୌଣସି ରିପୋର୍ଟ ହୋଇନାହିଁ। ଏହି ଘଟଣା ଜାଣିବା ପରେ ଆମେ ସଙ୍ଗେ ଏହାର ତଦନ୍ତ କରିଥିଲୁ। ବିମାନରେ କିଛି ହେଲେ ଏଟିସିକୁ ରିପୋର୍ଟ ଆସିବ। ତେଣୁ ଆମେ ଆମେ ଏଟିସି ସହ ଯୋଗାଯୋଗ କରିଲୁ ଏବଂ ଏଟିସି ପାଖରେ ପାଇଲଟ୍ ପାଖରୁ ଏଭଳି କିଛି ଦୁର୍ଘଟଣାର କୌଣସି ରିପୋର୍ଟ ଆସି ନ ଥିବା କୁହାଯାଇଥିଲା।