ଜାଗା ନାହିଁ କି ମାଟି ନାହିଁ ଅଥଚ ଗଛ ଲଗାଇବାର ସଉକ ଅଛି। ତା’ହେଲେ ବି ଚିନ୍ତା କରିବାର କିଛି ନାହିଁ। ଆପଣ ଆରାମରେ ଘର ଭିତରେ ବିନା ପରିଶ୍ରମରେ ବିନା ମାଟିରେ ଲଗାଇପାରିବେ ଗଛ। ଏଥିପାଇଁ ଆପଣଙ୍କୁ କୁଣ୍ଡ କିଣିବାର ଆବଶ୍ୟକତା ବି ନାହିଁ। ବ୍ୟବହାର ହେଉ ନ ଥିବା କାଚ ଗ୍ଲାସ ପାଣି ବୋତଲରେ ଗଛ ଲଗାଇ ଘରକୁ କରିପାରିବେ ଆକର୍ଷଣୀୟ ଏବଂ ପ୍ରଦୂଷଣ ମୁକ୍ତ। ତେବେ କେଉଁ ଗଛକୁ ଘର ଭିତରେ ପାଣିରେ ଲଗାଇବେ ସେ ସମ୍ପର୍କରେ ଜାଣିରଖିବା ନିହାତି ଦରକାର।
ମନିପ୍ଲାଣ୍ଟ: ପାଣିରେ ଭଲ ବଢୁଥିବା ଗଛ ଭିତରେ ପ୍ରଥମେ ଆସେ ମନି ପ୍ଲାଣ୍ଟ। ଏହା ପାଣି ଭିତରେ ଖୁବ୍ ସୁନ୍ଦରଭାବେ ବଢ଼ିପାରେ। କେବଳ ମଝିରେ ମଝିରେ ପାଣି ବଦଳେଇ ଦେବା ଆବଶ୍ୟକ।
କ୍ରୋଟନ: ଏହି ଗଛର ଛୋଟ ଡାହି ଖଣ୍ଡେ କାଟିକି ପାଣିରେ ରଖିଦେଲେ ଚେର ଆସିଯିବ। ଏହି ଗଛ ବି ପାଣିରେ ବଢ଼ିଥାଏ ଆଉ ଦେଖିବାକୁ ବି ଖୁବ ସୁନ୍ଦର।
ସିଙ୍ଗୋନିୟମ୍: ସିଙ୍ଗୋନିୟମ ବି ପାଣିରେ ଖୁବ ଭଲ ବଢିପାରେ। ଏହି ଗଛ ଘରର ପରିବେଶକୁ ସୁସ୍ଥ ରଖିବା ସହ ଖୁବ୍ ସୁନ୍ଦର ଦେଖାଯାଏ।
ଲକି ବାମ୍ବୋ: ପାଣିରେ ଖୁବ୍ ଭଲ ବଢୁଥିବା ଏହି ଗଛକୁ ବାସ୍ତୁ ଅନୁଯାୟୀ ଖୁବ ଶୁଭ ବୋଲି ଧରାଯାଏ। ଘର ଭିତରେ ପାଣି ଭିତରେ ଦୀର୍ଘଦିନ ଧରି ରହୁଥିବା ଏହି ଗଛ ଘର ଭିତରର ବାୟୁ ପ୍ରଦୂଷଣକୁ ରୋକିଥାଏ।
ସ୍ନେକ ପ୍ଲାଣ୍ଟ: ଘର ଭିତରେ ପାଣିରେ ରହୁଥିବା ଗଛ ଭିତରେ ସ୍ନେକ ପ୍ଲାଣ୍ଟ ବି ଆସିବ। ସବୁଠୁ ଅଧିକ ଅକ୍ସିଜେନ ଦେଉଥିବା ଏହି ଗଛ ଦେଖିବାକୁ ତ ସୁନ୍ଦର ପୁଣି ଏହି ଗଛ ପାଇଁ ସେତେ ଅଧିକ ଯତ୍ନର ବି ଆବଶ୍ୟକ ନାହିଁ।