ଓ୍ବାଶିଂଟନ,୯।୩ : ଏକ ନୂତନ ଅଧ୍ୟୟନ ଅନୁଯାୟୀ ୧୭୧ ଟ୍ରିଲିୟନରୁ ଅଧିକ ପ୍ଲାଷ୍ଟିକ ବର୍ତ୍ତମାନ ବିଶ୍ୱର ବିଭିନ୍ନ ମହାସାଗରରେ ଭାସୁଛି ବୋଲି ଆକଳନ କରାଯାଇଛି। ଅନ୍ତର୍ଜାତୀୟ ବୈଜ୍ଞାନିକମାନଙ୍କର ଏକ ଦଳ ୧୯୭୯ରୁ ୨୦୧୯ ମଧ୍ୟରେ ଆଟଲାଣ୍ଟିକ, ପ୍ରଶାନ୍ତ ମହାସାଗର, ଭାରତ ମହାସାଗର ଏବଂ ଭୂମଧ୍ୟସାଗରରେ ପ୍ରାୟ ୧୨ ହଜାର ନମୁନା ସଂଗ୍ରହ ପଏଣ୍ଟରୁ ସଂଗୃହିତ ରେକର୍ଡଗୁଡିକ ବିଶ୍ଳେଷଣ କରିଥିଲେ। ୨୦୦୫ ପରଠାରୁ ସମୁଦ୍ରର ପ୍ଲାଷ୍ଟିକ ପ୍ରଦୂଷଣ ମାତ୍ରାରେ ଦ୍ରୁତ ବୃଦ୍ଧି ହେଉଥିବା ସେମାନେ ଜାଣିବାକୁ ପାଇଛନ୍ତି।
ସମ୍ପ୍ରତି ପୃଥିବୀରେ ପ୍ରାୟ ୮୨-୩୫୮ ଟ୍ରିଲିୟନ ପ୍ଲାଷ୍ଟିକ କଣିକା ରହିଛି। ଏସବୁର ଓଜନ ୧.୧-୪.୯ ନିୟୁତ ଟନ ଅଟେ। ୧୯୯୦ ପର୍ଯ୍ୟନ୍ତ କୌଣସି ସ୍ପଷ୍ଟ ବୃଦ୍ଧି ପରିଲକ୍ଷିତ ହେଉ ନ ଥିବାବେଳେ ୨୦୦୫ଠାରୁ ଏଥିରେ ଏକ ଦ୍ରୁତ ପରିବର୍ତ୍ତନ ଦେଖିବାକୁ ମିଳିଥିବା ବୈଜ୍ଞାନିକ କହିଛନ୍ତି। ପୋଲସ୍ ଓ୍ବାନ ପତ୍ରିକାରେ ପ୍ରକାଶିତ ବୁଧବାର ଏହି ଅଧ୍ୟୟନ ପ୍ରକାଶ ପାଇଛି।
ବୈଜ୍ଞାନିକମାନେ ଚେତାବନୀ ଦେଇଛନ୍ତି ଯେ ତୁରନ୍ତ ନୀତିଗତ କାର୍ଯ୍ୟାନୁଷ୍ଠାନ ବିନା ପ୍ଲାଷ୍ଟିକ ମହାସାଗରରେ ପ୍ରବେଶ କରୁଥିବା ହାର ବର୍ତ୍ତମାନ ଏବଂ ୨୦୪୦ ମଧ୍ୟରେ ପ୍ରାୟ ୨.୬ରୁ ୩ ଗୁଣା ବୃଦ୍ଧି ପାଇପାରେ। ପୃଥିବୀର ସମୁଦ୍ର କୂଳରେ ପ୍ଲାଷ୍ଟିକ ସାନ୍ଦ୍ରତା ତ୍ୱରାନ୍ବିତ ହେବା ନେଇ ଅନ୍ତର୍ଜାତୀୟ ନୀତିର ଆବଶ୍ୟକତା ରହିଛି।
୫ ଗିରେସ ଇନଷ୍ଟିଚ୍ୟୁଟର ଅନୁସନ୍ଧାନ ଏବଂ ନବସୃଜନ ନିର୍ଦ୍ଦେଶକ ତଥା ରିପୋର୍ଟର ଲେଖକ ଲିସା ଏର୍ଡଲେ ସ୍ପଷ୍ଟ କରିଛନ୍ତି ଯେ ପ୍ରତିବର୍ଷ କେବଳ ୯ ପ୍ରତିଶତ ଗ୍ଲୋବାଲ ପ୍ଲାଷ୍ଟିକ ପୁନଃବ୍ୟବହାର କରାଯାଏ। ସେ କହିଛନ୍ତି ଯେ ଥରେ ପ୍ଲାଷ୍ଟିକ ସମୁଦ୍ରରେ ପ୍ରବେଶ କଲା ପରେ ଏହା କ୍ଷୟ ହୁଏ ନାହିଁ ବରଂ ଛୋଟ ଛୋଟ ଖଣ୍ଡରେ ଭାଙ୍ଗିବାକୁ ଲାଗେ।
ତେଣୁ, ସମୁଦ୍ରରେ କେତେ ପ୍ଲାଷ୍ଟିକ ଅଛି ତାହା ଜାଣିବା କଷ୍ଟକର। ଏରଡଲେ କହିଛନ୍ତି, ମହାସାଗର ଏକ ଜଟିଳ ସ୍ଥାନ। ସେଠାରେ ଅନେକ ସମୁଦ୍ର ସ୍ରୋତ ଅଛି, ପାଣିପାଗ କାରଣରୁ ଏବଂ ଭୂମିରେ ଅବସ୍ଥା ଯୋଗୁ ସମୟ ସହିତ ପରିବର୍ତ୍ତନ ଆସିଛି।
ଅଧିକନ୍ତୁ, ଅନୁସନ୍ଧାନକାରୀମାନେ ସୂଚାଇ ଦେଇଛନ୍ତି ଯେ ସମୁଦ୍ର ପ୍ଲାଷ୍ଟିକର ସର୍ବାଧିକ ପରିମାଣ ବର୍ତ୍ତମାନ ଉତ୍ତର ଆଟଲାଣ୍ଟିକ ସମୁଦ୍ରରେ ଅଛି । ସେମାନେ କହିଛନ୍ତି ଯେ ଭୂମଧ୍ୟସାଗର, ଭାରତ ମହାସାଗର, ଦକ୍ଷିଣ ଆଟଲାଣ୍ଟିକ ଏବଂ ଦକ୍ଷିଣ ପ୍ରଶାନ୍ତ ମହାସାଗରୀୟ ଅଞ୍ଚଳ ପାଇଁ ଅଧିକ ତଥ୍ୟ ଆବଶ୍ୟକ।
କାଲିଫର୍ନିଆର ପ୍ଲାଷ୍ଟିକ ପ୍ରଦୂଷଣ ଅନୁସନ୍ଧାନର ମ୍ୟୁର ଇନଷ୍ଟିଚ୍ୟୁଟର ଅନୁସନ୍ଧାନ ବୈଜ୍ଞାନିକ ୱିନ କାଉଗର୍ କହିଛନ୍ତି ଯେ ଏହି ଅନୁସନ୍ଧାନ ସମୁଦ୍ରର ପ୍ଲାଷ୍ଟିକ ମାପିବା ତଥା ସମସ୍ୟାର ପ୍ରକୃତ ସମାଧାନର ଆବଶ୍ୟକତାକୁ ଦର୍ଶାଇଥାଏ।