ଛତ୍ରପୁର,୮।୧(ଡି.ଏନ୍.ଏ.): ଗଞ୍ଜାମ ଜିଲା ହେଡ୍କ୍ୱାର୍ଟରରେ ଥିବା ଛତ୍ରପୁର ଷ୍ଟେଶନର ବିକାଶ ଅଟକି ରହିଛି। ଫଳରେ ବହୁ ଦୂରଗାମୀ ଓ ୨୪ରୁ ୨୬ କୋଚ୍ ବିଶିଷ୍ଟ ଟ୍ରେନ୍ ରହଣି ଏଠାରେ ହେଉନି ା ଦୀର୍ଘବର୍ଷ ହେଲା ଛତ୍ରପୁରର ବୁଦ୍ଧିଜୀବୀମାନଙ୍କ ପକ୍ଷରୁ ଏହି ଷ୍ଟେଶନରେ ଦୂରଗାମୀ ଟ୍ରେନ୍ ରହଣି ପାଇଁ ଦାବି ହୋଇଆସୁଥିଲା। ପରେ ଖୋର୍ଦ୍ଧା ଡିଭିଜନ ପକ୍ଷରୁ ଛତ୍ରପୁର ଷ୍ଟେଶନର ପ୍ଲାଟଫର୍ମ ସମ୍ପ୍ରସାରଣ ଲାଗି ଟେଣ୍ଡର ହୋଇଥିଲା ା ମାତ୍ର ଏହାର କାମ ଆରମ୍ଭ ହୋଇପାରୁନି। ତେବେ ସିଭିଲ୍ କାମ ପାଇଁ ଟେଣ୍ଡର ହୋଇଥିଲେ ହେଁ ବୈଷୟିକ ଟେଣ୍ଡର କରାଯାଇନି। ଫଳରେ ଚୂଡ଼ାନ୍ତ ହୋଇଥିବା ସିଭିଲ କାମ ଆରମ୍ଭ ହୋଇପାରୁ ନ ଥିବା ଜଣାପଡିଛି। ତୁରନ୍ତ ଏସବୁ ପ୍ରକ୍ରିୟା ସାରି ଛତ୍ରପୁର ଷ୍ଟେଶନ ପ୍ଲାଟଫର୍ମ ସମ୍ପ୍ରସାରଣ କାମ ଆରମ୍ଭ କରିବାକୁ ରେଲ୍ୱେ ଅଧିକାରୀମାନଙ୍କୁ ସାକ୍ଷାତ୍ କରି ଦାବିପତ୍ର ଦିଆଯାଇଥିବା ଛତ୍ରପୁର ବୁଦ୍ଧିଜୀବୀ କମିଟି ଆବାହକ ତଥା ବରିଷ୍ଠ ଓକିଲ ବି. ଶ୍ରୀନିବାସ କହିଛନ୍ତି ା
ଛତ୍ରପୁର ଷ୍ଟେଶନରେ ୩ଟି ପ୍ଲାଟଫର୍ମ ଥିବାବେଳେ ୧ ଓ ୨ନଂ ପ୍ଲାଟଫର୍ମରେ ଟ୍ରେନ୍ ରହିଥାଏ ା ତେବେ ପ୍ଲାଟଫର୍ମ ଲମ୍ବା ନ ଥିବାରୁ ୨୪ ରୁ ୨୬ କୋଚ୍ ଓ ଦୂରଗାମୀ, ସୁପରଫାଷ୍ଟ ଏକ୍ସପ୍ରେସ ଟ୍ରେନ୍ ରହଣି ହୋଇପାରୁନି ା ଏପରିକି ଏବେ ବି ଅନେକ ଦୂରଗାମୀ, ଏକ୍ସପ୍ରେସ ଓ ସୁପରଫାଷ୍ଟ ଏକ୍ସପ୍ରେସ ଯାହା ଏଠାରେ ରହୁଛି ା ପ୍ଲାଟଫର୍ମର ଲମ୍ବା କମ୍ ଥିବାରୁ ଉକ୍ତ ଟ୍ରେନ୍ର ଅନେକ କୋଚ୍ ପ୍ଲାଟଫର୍ମ ବାହାରେ ଲାଗୁଛି ା ଫଳରେ ଏସି ବଗିରେ ଯାତ୍ରା କରୁଥିବା ଯାତ୍ରୀଙ୍କୁ ଓହ୍ଲାଇବାରେ ଅସୁବିଧା ହେଉଛି ା ଏ ସବୁର ସମାଧାନ ଲାଗି ଖୋର୍ଦ୍ଧା ରୋଡ୍ ଡିଭିଜନ ପକ୍ଷରୁ ଛତ୍ରପୁର ଷ୍ଟେଶନରେ ୨୪ ରୁ ୨୬ କୋଚ୍ ବିଶିଷ୍ଟ ଟ୍ରେନ୍ ରହଣି ଲାଗି ପ୍ଲାଟଫର୍ମ ସମ୍ପ୍ରସାରଣ ପାଇଁ ୨୭୧.୯୮ କୋଟି ଟଙ୍କାର ଟେଣ୍ଡର ଗତ ବର୍ଷ ଅଗଷ୍ଟରେ ଆହ୍ବାନ ହୋଇଥିଲା। ତେବେ ଟେକ୍ନିକାଲ ଟେଣ୍ଡର ହୋଇ ନ ଥିବାରୁ ଏହି କାମ ଆରମ୍ଭ ହୋଇପାରୁନି। ଡିସେମ୍ବର ୧୮ରେ ଛତ୍ରପୁର ଷ୍ଟେଶନ ପରିଦର୍ଶନରେ ଆସିଥିବା ବେଳେ ଇଷ୍ଟକୋଷ୍ଟ ରେଲ୍ୱେ ଜେନେରାଲ ମ୍ୟାନେଜର ଓ ଖୋର୍ଦ୍ଧା ଡିଭିଜନ ଡିଭିଜନାଲ ରେଲ୍ୱେ ମ୍ୟାନେଜରଙ୍କୁ ଭେଟି ଛତ୍ରପୁର ବୁଦ୍ଧିଜୀବୀମାନଙ୍କ ଏକ ପ୍ରତିନିଧି ଦଳ ଏ ସମ୍ପର୍କରେ ଜଣାଇଥିଲେ। ସେହିପରି ଚଳିତ ମାସ ୪ ତାରିଖରେ ଛତ୍ରପୁର କୋର୍ଟ ଷ୍ଟେଶନ ପରିଦର୍ଶନରେ ଆସିଥିବା ବେଳେ ଖୋର୍ଦ୍ଧା ରେଲୱେ ଆସିଷ୍ଟାଣ୍ଟ ଡିଭିଜନାଲ ଇଞ୍ଜିନିୟରଙ୍କୁ ଭେଟି ତୁରନ୍ତ ଛତ୍ରପୁର ଷ୍ଟେଶନ ପ୍ଲାଟଫର୍ମ ସମ୍ପ୍ରସାରଣ କାମ ଆରମ୍ଭ କରିବାକୁ ବୁଦ୍ଧିଜୀବୀମାନେ ଦାବି କରିଥିଲେ ା