ନୂଆଦିଲ୍ଲୀ,୧୭।୬: ଶେଷ ହେବାକୁ ଯାଉଛି ଅପେକ୍ଷା। ୟୁକେର ସାଉଥାମ୍ପଟନଠାରେ ଶୁକ୍ରବାର ଠାରୁ ଭାରତ ଓ ନ୍ୟୁଜିଲାଣ୍ଡ ମଧ୍ୟରେ ଆରମ୍ଭ ହେବାକୁ ଯାଉଛି ବିଶ୍ୱ ଟେଷ୍ଟ ଚାମ୍ପିୟନଶିପ୍ (ଡବ୍ଲ୍ୟୁଟିସି) ଫାଇନାଲ। ଏହି ଗୁରୁତ୍ୱପୂର୍ଣ୍ଣ ମ୍ୟାଚ୍ରେ ଭାରତୀୟ ଦଳ ଦୁଇ ସ୍ପିନର (ରବିଚନ୍ଦ୍ରନ ଅଶ୍ୱିନ ଓ ରବୀନ୍ଦ୍ର ଜାଡେଜା)ଙ୍କୁ ଖେଳାଇବା ଦରକାର ନା ପିଚ୍କୁ ଦୃଷ୍ଟିରେ ରଖି ଗୋଟିଏ ସ୍ପିନରଙ୍କ ସହ ଯିବା ଉଚିତ ହେବ ସେ ନେଇ ଖୁବ୍ ଚର୍ଚ୍ଚା ଚାଲିଛି। ଏଥିରେ ସାମିଲ ହୋଇଛନ୍ତି ପୂର୍ବତନ ଭାରତୀୟ ବ୍ୟାଟ୍ସମ୍ୟାନ ଭିଭିଏସ୍ ଲକ୍ଷ୍ମଣ।
ଫାଇନାଲ ଲାଗି ମୁଁ ଉଭୟ ଅଶ୍ୱିନ ଓ ଜାଡେଜାଙ୍କ ସହ ଯିବାକୁ ଚାହିଁବି। ଏହି ଦୁଇ ଖେଳାଳି ଏକାସମୟରେ ଖେଳିବା ଭାରତୀୟ ଦଳ ପାଇଁ ବର ସଦୃଶ। ଏମାନେ ଉଇକେଟ ନେବା ସହ ନିମ୍ନକ୍ରମରେ ରନ୍ ସଂଗ୍ରହ ମଧ୍ୟ କରିପାରନ୍ତି। ଇଂଲଣ୍ଡ ପରିସ୍ଥିତିରେ ଏହା ଖୁବ୍ ଗୁରୁତ୍ୱପୂର୍ଣ୍ଣ ସାବ୍ୟସ୍ତ ହେବ ବୋଲି ଲକ୍ଷ୍ମଣ ଏକ ସାକ୍ଷାତ୍କାରରେ କହିଛନ୍ତି।
ସ୍ପିନରଙ୍କ ବ୍ୟତୀତ ଦଳରେ ତୃତୀୟ ପେସର ଭାବେ କାହାକୁ ବଛାଯିବ ସେ ନେଇ ମଧ୍ୟ ଅଧିନାୟକ ବିରାଟ କୋହଲି ଓ ଟିମ୍ ମ୍ୟାନେଜମେଣ୍ଟ ଚିନ୍ତିତ। ଯଶପ୍ରୀତ ବୁମରା ଓ ମହମ୍ମଦ ଶାମି ଖେଳିବା ନିଶ୍ଚିତ। ତୃତୀୟ ପେସର ପାଇଁ ଅଭିଜ୍ଞ ଇଶାନ୍ତ ଶର୍ମା ଏବଂ ମହମ୍ମଦ ସିରାଜଙ୍କ ମଧ୍ୟରୁ ଜଣଙ୍କୁ ବାଛିବାକୁ ପଡ଼ିବ।
ତେବେ ଅଭିଜ୍ଞତାକୁ ଦୃଷ୍ଟିରେ ରଖି ଇଶାନ୍ତଙ୍କୁ ଦଳରେ ନେବାକୁ ପରାମର୍ଶ ଦେଇଛନ୍ତି ଲକ୍ଷ୍ମଣ। ଡବ୍ଲ୍ୟୁଟିସି ଫାଇନାଲ ପାଇଁ ମୁଁ ଇଶାନ୍ତ, ଶାମି ଓ ବୁମରାଙ୍କ ସହ ଯିବି। ଅଷ୍ଟ୍ରେଲିଆରେ ଭଲ ପ୍ରଦର୍ଶନ ପରେ ସିରାଜଙ୍କ ଆତ୍ମବିଶ୍ୱାସ ବଢ଼ିଛି। କିନ୍ତୁ ଫାଇନାଲ ଭଳି ଗୁରୁତ୍ୱପୂର୍ଣ୍ଣ ମ୍ୟାଚ୍ରେ ଦଳକୁ ଅଭିଜ୍ଞ ଖେଳାଳିଙ୍କ ଆବଶ୍ୟକତା ପଡ଼ିବ ବୋଲି ୧୩୪ ଟେଷ୍ଟ ଖେଳିଥିବା ଲକ୍ଷ୍ମଣ କହିଛନ୍ତି।