ନୂଆଦିଲ୍ଲୀ,୧୩।୯: ଭାରତ-ଇଂଲଣ୍ଡ ଟେଷ୍ଟ ସିରିଜ୍ର ୫ମ ତଥା ଅନ୍ତିମ ଟେଷ୍ଟ ବାତିଲ ହେବା ପରେ ପୂର୍ବତନ ଅଧିନାୟକ ତଥା ବିସିସିଆଇ ସଭାପତି ସୌରଭ ଗାଙ୍ଗୁଲି ପ୍ରଥମ ଥର ମୁହଁ ଖୋଲିଛନ୍ତି। ଦଳୀୟ କ୍ୟାମ୍ପରେ କୋଭିଡ୍ ଦେଖାଦେବା ପରେ ଖେଳାଳିମାନେ ଖେଳିବାକୁ ମନା କରି ଦେଇଥିଲେ। ହେଲେ ଅନେକ ପୂର୍ବତନ କ୍ରିକେଟର ଦାବି କରିଥିଲେ ଯେ, ୟୁଏଇରେ ହେବାକୁ ଥିବା ଆଇପିଏଲର ବଳକା ମ୍ୟାଚ୍ ଯୋଗୁ ମାଞ୍ଚେଷ୍ଟର ଟେଷ୍ଟ ବାତିଲ ହୋଇଛି। କିନ୍ତୁ ଫାଇନାଲ ଟେଷ୍ଟ ମ୍ୟାଚ୍ ବାତିଲ ହେବା ପଛରେ ଆଇପିଏଲ୍ର ଭୂମିକା ନ ଥିବା ସ୍ପଷ୍ଟ କରିଛନ୍ତି ବିସିସିଆଇ ସଭାପତି।
“ଦଳର ଦ୍ୱିତୀୟ ଫିଜିଓ ସଂକ୍ରମିତ ଜଣାପଡ଼ିବା ପରେ ଖେଳାଳିମାନେ କୋଭିଡ୍ରୁ ନିଜକୁ ଦୂରେଇ ରଖିବା ପାଇଁ ଖେଳିବାକୁ ମନା କରି ଦେଇଥିଲେ। କିନ୍ତୁ ସେମାନଙ୍କୁ ଦୋଷ ଦିଆଯାଇପାରିବ ନାହିଁ। ଫିଜିଓ ଯୋଗେଶ ପର୍ମାର କିଛି ଖେଳାଳିଙ୍କ ସଂସ୍ପର୍ଶରେ ଥିଲେ। ସେ ଖେଳାଳିଙ୍କ ସହ ମିଶନ୍ତି। ଏପରି କି ଖେଳାଳିଙ୍କ କୋଭିଡ୍-୧୯ ଟେଷ୍ଟ କରାଇବା ତାଙ୍କ ଦାୟିତ୍ୱ ଥିଲା। ତାଙ୍କ ଜରିଆରେ କ୍ୱାରେଣ୍ଟିନରେ ଥିବା କୋଚ୍ ଖେଳାଳିଙ୍କ ନିକଟକୁ ମେସେଜ ପଠାନ୍ତି। ପର୍ମାର ସଂକ୍ରମିତ ଜଣାପଡ଼ିବା ପରେ ଖେଳାଳିମାନେ ଭୟବିତ ହୋଇପଡ଼ିଥିଲେ” ବୋଲି ଗାଙ୍ଗୁଲି କହିଛନ୍ତି। ଉଲ୍ଲେଖଯୋଗ୍ୟ, ଭାରତ-ଇଂଲଣ୍ଡ ସିରିଜ୍ର ୫ମ ତଥା ଅନ୍ତିମ ଟେଷ୍ଟରେ ଟସ୍ ପଡ଼ିବାର ଦୁଇ ଘଣ୍ଟା ପୂର୍ବରୁ ଇସିବି ଏହାକୁ ବାତିଲ ଘୋଷଣା କରିଥିଲା।
