ନୟାଗଡ ଅଫିସ,୧୫।୧୨: ନୟାଗଡ଼ ସଦର ଥାନା ଅନ୍ତର୍ଗତ ଯଦୁପୁରରେ ୫ ବର୍ଷର ଶିଶୁକନ୍ୟା ପରୀକୁ ଅପହରଣ ଓ ହତ୍ୟା ପରେ ଆଉ ଜଣେ ଶିଶୁକନ୍ୟା ରଣପୁର ଥାନା ବଧିପାଟଣାର ସ୍ବାତୀ(୩) ନିଖୋଜ ହୋଇଯାଇଛନ୍ତି। ଏହା ପୋଲିସ ପାଇଁ ଚାଲେଞ୍ଜ ସୃଷ୍ଟି କରିଥିବାବେଳେ ଛୋଟପିଲା ଟାର୍ଗେଟ୍ରେ ଥିବା ପ୍ରମାଣିତ ହୋଇଛି। ତେଣୁ ଏବେ ଗାଁ ଗଣ୍ଡାରେ ଚର୍ଚ୍ଚା ହେଉଛି ‘ସାବଧାନ, ପିଲାଚୋର ମାତିଛି’। ମା’ବାପାଙ୍କୁ ଭୟ ଏଭଳି ଘାରିଛି ଯେ, ଗାଁ ଦାଣ୍ଡରେ ଖେଳିବାକୁ ପିଲାମାନଙ୍କୁୁ ରୋକ୍ଠୋକ୍ ମନା କରିଦେଉଛନ୍ତି। ଅନ୍ୟପକ୍ଷେ ଶିଶୁ ଅପହରଣ ପଛରେ ର଼୍ୟାକେଟ କାମ କରୁଥିବାର ଅଭିଯୋଗ ହୋଇଆସୁଥିଲେ ମଧ୍ୟ ଏହାକୁ ଅଣଦେଖା କରାଯାଉଥିବା ନେଇ ସାଧାରଣରେ କ୍ଷୋଭ ପ୍ରକାଶ ପାଇଛି।
ଆଇନଜୀବୀ ଅମିୟ ପଟ୍ଟନାୟକ କୁହନ୍ତି, ଶିଶୁ ଅପହରଣ କି ହତ୍ୟା ଅଭିଯୋଗର ଠିକ୍ ଭାବେ ତଦନ୍ତ ହେଉନି, ଯାହାକି ପରୀ କେସ୍ରେ ସ୍ପଷ୍ଟ ହୋଇଯାଇଛି। ପୋଲିସ ଅଭିଯୋଗକାରୀଙ୍କ ଅଭିଯୋଗକୁ ଗୁରୁତ୍ୱ ଦେଉନି। ଏଣୁ ପୋଲିସ ଉପରେ ଲୋକଙ୍କ ଆସ୍ଥା ରହୁନି। ତଦନ୍ତ ଓ ନ୍ୟାୟ ଦେବାକୁ ଆବଶ୍ୟକ ପୋଲିସ ବି ନାହାନ୍ତି । ଅଭିଯୋଗ ଶୁଣାଣି ମହିଳା ଓ ଶିଶୁ ଡେସ୍କ ଠିକ୍ରେ କାମ କରୁନି। ପରୀ ହତ୍ୟା ଘଟଣା ପରେ ଯଦିଓ ପୋଲିସ ରଣପୁରର ସ୍ବାତୀ କେସ୍କୁ ଗୁରୁତ୍ୱ ଦେଇଛି ତେବେ ତାହାର ଠିକ୍ ତଦନ୍ତ ହେବା ଦରକାର। ଜିଲା କଂଗ୍ରେସ ସଭାପତି ରଣଜିତ୍ ଦାଶ କୁହନ୍ତି, ପରୀ ଓ ସ୍ବାତୀ ଅପହରଣ ହେବା ପଛରେ ନିଶ୍ଚିତ ଭାବରେ ଏକ ର଼୍ୟାକେଟ୍ କାମ କରୁଥିବା ଅନୁଭବ ହେଉଛି। ନୟାଗଡ଼ ଜିଲାରେ ୨ ଶିଶୁ ଅପହରଣ ହୋଇଥିବାବେଳେ ଜଣଙ୍କର ହତ୍ୟା ହୋଇସାରିଛି। ସେହିପରି ୪ ଦିନ ବିତି ଯିବାକୁ ବସିଥିବାବେଳେ ଆଉ ଜଣଙ୍କର ଟେର୍ ମିଳୁନି। ଏଭଳିସ୍ଥଳେ ପିଲାକୁ ଖେଳିବାକୁ ଅନେକ ଅଭିଭାବକ ଗାଁ ଦାଣ୍ଡକୁ ଛାଡୁନାହାନ୍ତି। ପୁଣି ପିଲାଙ୍କୁ ଏକୁଟିଆ ବି ଛାଡୁନାହାନ୍ତି। ହତ୍ୟା ଓ ଅପହରଣ ପଛର ରହସ୍ୟ ନେଇ ପୋଲିସ ପାଖରେ ଖବର ନଥିବାରୁ ଜିଲା ସାରା ପିଲାଚୋର ଭୟ ବଢ଼ିବାରେ ଲାଗିଛି। ଭାଜପା ଜିଲା ସଭାପତି ଲାଲା ମନୋଜ ରାୟ କୁହନ୍ତି, ନୟାଗଡରେ ଶିଶୁ ଅପହରଣ ଓ ହତ୍ୟା ନେଇ ଠିକ ତଦନ୍ତ ନ ହେବାରୁ ପିଲାଚୋର ର଼୍ୟାକେଟରେ ଲଗାମ ଲାଗୁନି। ପରୀ କେସ୍ ପରେ ସ୍ବାତୀର ଅପହରଣ ପୋଲିସର ଅସହାୟତାକୁ ପଦାରେ ପକାଇଛି। ତେବେ ପରୀ ଓ ସ୍ବାତୀ ପରିବାର ଯେପରି ନ୍ୟାୟ ପାଇବେ ଆମ ଦଳ ଲଢ଼େଇ ଜାରି ରଖିବ। ସିପିଆଇଏମ୍ ନେତା ବିଶ୍ୱନାଥ ମହାପାତ୍ର କୁହନ୍ତି, ପରୀ ହତ୍ୟାକାଣ୍ଡ ଭଳି ସମ୍ବେଦନଶୀଳ ଘଟଣାକୁ ସରକାର ଅବହେଳା କରି ଅନ୍ୟାୟକୁ ଘଣ୍ଟ ଘୋଡାଇଲେ। ଏହାଦ୍ୱାରା ପରୀର ହତ୍ୟାକାରୀ ଧରା ନ ପଡ଼ି ଅବାଧରେ ବୁଲୁଛନ୍ତି। ପରୀ ଘଟଣାକୁ ଅଣଦେଖା ସ୍ବାତୀ ଅପହରଣକୁ ସୁଯୋଗ ଦେଇଛି। ଏହାର ତାତି କେବଳ ନୟାଗଡ଼ ନୁହେଁ ରାଜ୍ୟରେ ଦେଖାଦେଇଛି ।