ନୂଆଦିଲ୍ଲୀ,୨।୧(ପି.ଟି.): ଆଗକୁ ଆୟୋଜନ ହେବାକୁ ଥିବା ଆର୍ଜେଣ୍ଟିନା ବିପକ୍ଷ ସିରିଜରେ ଭାରତୀୟ ମହିଳା ହକି ଦଳ ଭଲ ପ୍ରଦର୍ଶନ କଲେ ଆତ୍ମବିଶ୍ୱାସରେ ବୃଦ୍ଧି ହେବ ବୋଲି ଅଧିନାୟିକା ରାଣୀ ରାମପାଲ କହିଛନ୍ତି। ଅଲିମ୍ପିକ୍ସ ଖେଳିବା ପାଇଁ ଟୋକିଓ ଯିବା ପୂର୍ବରୁ ଦଳର ଆତ୍ମବିଶ୍ୱାସରେ ବୃଦ୍ଧି ହେବା ନିହାତି ଜରୁରୀ ବୋଲି ସେ କହିଛନ୍ତି।
ଆସନ୍ତା ସପ୍ତାହରେ ଭାରତୀୟ ମହିଳା ଦଳ ଅଲିମ୍ପକ୍ସ ପ୍ରସ୍ତୁତିକୁ ଦୃଷ୍ଟିରେ ରଖି ଆର୍ଜେଣ୍ଟିନା ଗସ୍ତ କରିବ। କୋଭିଡ୍-୧୯ ମହାମାରୀ କାରଣରୁ ପାଖାପାଖି ଗୋଟଏ ବର୍ଷ ପରେ ଭାରତୀୟ ଦଳ ଅନ୍ତର୍ଜାତୀୟ କହି ଖେଳିବାକୁ ଯାଉଛି। ନିଜ ଦକ୍ଷତା ଓ ପ୍ରତିଭା ଅନୁରୂପ ଖେଳିପାରିଲେ ଅଲିମ୍ପିକ୍ସ ପାଇଁ ଆମେ ଆତ୍ମବିଶ୍ୱାସ ହାସଲ କରିପାରିବୁ। ଅଲିମ୍ପିକ୍ସରେ ଅତିକମ୍ରେ ପଦକ ହାସଲ କରିବା ଲକ୍ଷ୍ୟରେ ରହିଛୁ। ଟୋକିଓରେ ପଦକ ଜିତି ଇତିହାସ ସୃଷ୍ଟି କରିବା ସହ ଦେଶକୁ ଗୌରବାନ୍ବିତ କରିବୁ ବୋଲି ରାଣୀ କହିଛନ୍ତି।
ଆୟୋଜକ ଆର୍ଜେଣ୍ଟିନା ବିପକ୍ଷରେ ଭାରତ ୮ଟି ମ୍ୟାଚ ଖେଳିବ। ଏହି ସିରିଜ ଜାନୁୟାରୀ ୧୭ରୁ ଆରମ୍ଭ ହୋଇ ୩୧ରେ ଶେଷ ହେବ। ଅନ୍ତର୍ଜାତୀୟ ହକିକୁ ପ୍ରତ୍ୟାବର୍ତ୍ତନ କରିବା ନେଇ ଆମେ ବେଶ୍ ଉତ୍ସାହିତ ରହିଛୁ। ୨୦୨୦ ଆମ ପାଇଁ କଷ୍ଟକର ଥିଲା। ତେବେ ଆମେ ଜାତୀୟ କୋଚିଂ କ୍ୟାମ୍ପରେ ଅଭ୍ୟାସ ତଥା ଟ୍ରେନିଂ ଜାରି ରଖିଥିଲୁ ବୋଲି ରାଣୀ କହିଛନ୍ତି। ଦୀର୍ଘଦିନର ବିଶ୍ରାମ ପରେ ସାଥୀ ଖେଳାଳିମାନେ କିପରି ପ୍ରଦର୍ଶନ କରୁଛନ୍ତି ତାହା ଦେଖିବାକୁ ରାଣୀ ଉତ୍ସୁକତାର ସହ ଅପେକ୍ଷା କରିଛନ୍ତି। ଖେଳାଳିମାନେ ମଧ୍ୟ ଏହି ଗସ୍ତ ନେଇ ଉତ୍ସାହିତ ରହିଛନ୍ତି। ସେମାନଙ୍କ ଆତ୍ମବିଶ୍ୱାସ ଉଚ୍ଚକୋଟୀର ରହିଛି। ତେବେ ମ୍ୟାଚରେ ସେମାନେ କିଭଳି ପ୍ରଦର୍ଶନ କରୁଛନ୍ତି ତାହା ଉପରେ ସବୁକିଛି ନିର୍ଭର କରେ ବୋଲି ସେ କହିଛନ୍ତି।
ଭାରତୀୟ ପୁରୁଷ ହକି ଦଳ ଏଫ୍ଆଇଏଚ୍ ହକି ପ୍ରୋ ଲିଗ୍ ଖେଳିବା ଅବସରରେ ଗତ ଫେବୃୟାରୀ ୨୨ରେ ତା’ର ଶେଷ ଅନ୍ତର୍ଜାତୀୟ ମ୍ୟାଚ ଖେଳିଥିଲା। ତେଣୁ ଅଲିମ୍ପିକ୍ସ ପ୍ରସ୍ତୁତିକୁ ଦୃଷ୍ଟିରେ ରଖି ହକି ଇଣ୍ଡିଆ ପୁରୁଷ ଦଳ ପାଇଁ ବିଭିନ୍ନ ଗସ୍ତ ଆୟୋଜନ କରିବା ଲକ୍ଷ୍ୟରେ ରହିଛି। ଏଥିପାଇଁ ହକି ଇଣ୍ଡିଆ ବିଭିନ୍ନ ଦେଶର ହକି ଫେଡେରେଶନ ସହ ଆଲୋଚନା କରୁଛି। ଅଲିମ୍ପିକ୍ସ ପୂର୍ବରୁ ମ୍ୟାଚ ପ୍ରାକ୍ଟିସ କରିବା ନିହାତି ଜରୁରୀ। ତେଣୁ ବିଭିନ୍ନ ବିଶ୍ୱସ୍ତରୀୟ ଦେଶଗୁଡକ ବିପକ୍ଷରେ ମ୍ୟାଚ ଖେଳିବ ଆବଶ୍ୟକ ବୋଲି ଭାରତୀୟ ପୁରୁଷ ଦଳ ଅଧିନାୟକ ମନପ୍ରୀତ ସିଂ କହିଛନ୍ତି। ଅନ୍ତର୍ଜାତୀୟ ହକିକୁ ଫେରିବା ପାଇଁ ଆମେ ବେଶ୍ ଉତ୍ସାହିତ ରହିଛୁ। କେତୋଟି ଭଲ ଦଳ ବିପକ୍ଷରେ ଖେଳିବା ଦ୍ୱାରା ଆମେ ଭଲ ଅଭ୍ୟାସ କରିପାରିବୁ। ଏହା ଆମପାଇଁ ବହୁତ ଗୁରୁତ୍ୱ ବହନ କରିବ। ଗତ କେତେମାସ ହେବ ଆମେ କଠିନ ଅଭ୍ୟାସ କରିଛୁ ଓ ପ୍ରଦର୍ଶନର ମାନରେ ଉନ୍ନତି ଆଣିଛୁ। ଆସନ୍ତା ଜୁଲାଇରେ ଆମେ ଅଲିମ୍ପିକ୍ସ ଖେଳିବୁ ଓ ଦେଶ ପାଇଁ ନିଶ୍ଚିତ ଭାବେ ଗୌରବ ଆଣି ଦେବୁ। ପଦକ ହାସଲ କରିବାକୁ ଆମେ ଅଲିମ୍ପିକ୍ସ ଖେଳିବୁ ବୋଲି ସେ କହିଛନ୍ତି।
ସେହିପରି ଭାରତୀୟ ପୁରୁଷ ଓ ମହିଳା ଜୁନିୟର ଦଳ ମଧ୍ୟ ୨୦୧୯ ଓ ୨୦୨୦ରେ କୌଣସି ଟୁର୍ନାମେଣ୍ଟ ଖେଳିପାରି ନାହାନ୍ତି। ତେଣୁ ଭାରତରେ ଖେଳାଯିବାକୁ ଥିବା ଏଫ୍ଆଇଏଚ୍ ପୁରୁଷ ହକି ଜୁନିୟର ବଶ୍ୱକପ୍ ୨୦୨୧ ଓ ବାଂଲାଦେଶରେ ଆୟୋଜନ ହେବାକୁ ଥିବା ଏଏଚ୍ଏଫ୍ ପୁରୁଷ ଜୁନିୟର ଏସିଆ କପ୍ ୨୦୨୧ ଉପରେ ଆମର ନଜର ରହିଛି ବୋଲି ଜୁନିୟର ଟିମ୍ ଡିଫେଣ୍ଡର ସଞ୍ଜୟ କହିଛନ୍ତି। ସେହିପରି ଏଏଚ୍ଏଫ୍ ମହିଳ ଜୁନିୟର ଏସିଆ କପ ଉପରେ ଆମର ନଜର ରହିଛି ବୋଲି ମହିଳା ଜୁନିୟର ଡିଫେଣ୍ଡର ଇସିକା ଚୌଧୁରୀ କହିଛନ୍ତି। ଏହି ଟୁର୍ନାମେଣ୍ଟରେ ଭଲ ଖେଳିଲେ ଆମେ ମହିଳା ବିଶ୍ୱକପ ପାଇଁ ଯୋଗ୍ୟତା ହାସଲ କରିପାରିବୁ ବୋଲି ସେ କହିଛନ୍ତି।