ଭୁବନେଶ୍ୱର, ୯ା୨(ବ୍ୟୁରୋ):ଦ୍ୱାଦଶ ଶ୍ରେଣୀ ଛାତ୍ରୀଛାତ୍ରଙ୍କ ତ୍ରୈମାସିକ ଶେଷ ପରୀକ୍ଷା ମାର୍କକୁ ଷ୍ଟୁଡେଣ୍ଟ ଏକାଡେମିକ୍ ମ୍ୟାନେଜମେଣ୍ଟ ସିଷ୍ଟମ (ସାମ୍ସ)ରେ ଅପ୍ଲୋଡ୍ କରିବା ପାଇଁ ଉଚ୍ଚ ମାଧ୍ୟମିକ ଶିକ୍ଷା ପରିଷଦ (ସିଏଚ୍ଏସ୍ଇ) ନିର୍ଦ୍ଦେଶ ଦେଇଛି। ଏ ନେଇ ପରିଷଦ ପକ୍ଷରୁ ମଙ୍ଗଳବାର ସମସ୍ତ ଉଚ୍ଚ ମାଧ୍ୟମିକ ସ୍କୁଲ ଅଧ୍ୟକ୍ଷ ଏବଂ କଲେଜ ଅଧ୍ୟକ୍ଷଙ୍କୁ ଚିଠି ଲେଖାଯାଇଛି। ଆସନ୍ତା ୧୬ ତାରିଖ ମଧ୍ୟରାତ୍ରୀ ସୁଦ୍ଧା ଦ୍ୱାଦଶ ଶ୍ରେଣୀ ପିଲାଙ୍କ ମାର୍କ ଅପ୍ଲୋଡ୍ କରିବା ପାଇଁ କୁହାଯାଇଛି। ମାର୍କ ଅପ୍ଲୋଡ୍ କରିବା ପାଇଁ ସାମ୍ସ ଓ୍ବେବ୍ସାଇଟ୍ରେ ଏକ ଲିଙ୍କ୍ ଦିଆଯାଇଛି। ମାର୍କ ଟାବୁଲେଶନ୍ ରେଜିଷ୍ଟରର ହାର୍ଡ କପି ପଠାଇବା ପାଇଁ କୁହାଯାଇଛି, ଯେଉଁଥିରେ ଶିକ୍ଷକ, ଡାଟା ଏଣ୍ଟ୍ରି ଅପରେଟର, ପରୀକ୍ଷା ଇନ୍ଚାର୍ଜ ଏବଂ ଅଧ୍ୟକ୍ଷଙ୍କ ଦ୍ୱାରା ଦସ୍ତଖତ ହୋଇଥିବ।କେଉଁ ଆଧାରରେ ମାର୍କ ଦିଆଯାଇଛି ଜାଣିବା ପାଇଁ ଉତ୍ତର ପୁସ୍ତକ (ଆନ୍ସର ବୁକ୍) ମଧ୍ୟ ପଠାଇବା ପାଇଁ ପରିଷଦ କହିଛି। ବାର୍ଷିକ ପରୀକ୍ଷା ପାଇଁ ପ୍ରସ୍ତୁତ ରହିବାକୁ ବିଦ୍ୟାଳୟ ଓ ମହାବିଦ୍ୟାଳୟର ଅଧିକାରୀମାନଙ୍କୁ ନିର୍ଦ୍ଦେଶ ଦିଆଯାଇଛି। ଯାହାର କାର୍ଯ୍ୟସୂଚୀ ଠିକ୍ ସମୟରେ ଘୋଷଣା କରାଯିବ ବୋଲି କୁହାଯାଇଛି।