କୋଲକାତା,୩୦।୧୨: ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଶୁକ୍ରବାର ପଶ୍ଚିମବଙ୍ଗକୁ ୭୮୦୦କୋଟି ଟଙ୍କାର ଏକ ପ୍ରକଳ୍ପ ଭେଟି ଦେଇଛନ୍ତି। ଭିଡିଓ କନ୍ଫରେନ୍ସିଂ ଜରିଆରେ ମୋଦି ଉକ୍ତ କାର୍ଯ୍ୟକ୍ରମରେ ସାମିଲ ହୋଇ ବନ୍ଦେ ଭାରତ ଏକ୍ସପ୍ରେସ୍ ଟ୍ରେନ୍କୁ ସବୁଜ ପତାକା ଦେଖାଇଛନ୍ତି। ଏହି ଟ୍ରେନ୍ ହାଓ୍ବଡାରୁ ନ୍ୟୁ ଜଲପାଇଗୁଡ଼ିକୁ ସଂଯୋଗ କରିବ। ମୋଦିଙ୍କ ପାଇଁ ଆଜିର ଦିନ ବହୁ ଦୁଃଖଦ ରହିଛି। କାରଣ ଶୁକ୍ରବାର ଅହମ୍ମଦାବାଦରେ ତାଙ୍କ ମା’ ହୀରା ବା’ଙ୍କ ନିଧନ ଘଟିଛି। ପ୍ରଧାନମନ୍ତ୍ରୀ ଗାନ୍ଧୀନଗରରେ ପହଞ୍ଚି ମା’ଙ୍କୁ ମୁଖାଗ୍ନି ଦେଇଥିଲେ। ଏହାପରେ ସେ ପୂର୍ବରୁ ନିର୍ଦ୍ଧାରିତ ହୋଇଥିବା କାର୍ଯ୍ୟକ୍ରମରେ ସାମିଲ ହୋଇଥିଲେ। ଅନ୍ୟପଟେ ଉକ୍ତ କାର୍ଯ୍ୟକ୍ରମରେ ମୁଖ୍ୟମନ୍ତ୍ରୀ ମମତା ବାନାର୍ଜୀ ସାମିଲ ହୋଇ ହୀରା ବା’ଙ୍କ ବିୟୋଗରେ ଶୋକ ପ୍ରକାଶ କରିଛନ୍ତି। ଏଥିସହ ସେ କହିଛନ୍ତି, ଏହି ଦୁଃଖଦ ସମୟରେ ଆମେ ସମସ୍ତେ ଆପଣଙ୍କ ସହ ରହିଛୁ। ମା’ଙ୍କଠୁ ବଡ଼ ଆଉ କିଛି ନୁହେଁ ବୋଲି କହି ମମତା ମୋଦିଙ୍କୁ ସମବେଦନା ଜଣାଇଛନ୍ତି। ଏଥିସହ ସେ ଏହି କାର୍ଯ୍ୟକ୍ରମକୁ ଛୋଟ କରିବା ପାଇଁ ମୋଦିଙ୍କୁ ନିବେଦନ କରିଛନ୍ତି। କାରଣ ଆଜି ମୋଦିଙ୍କ ପାଇଁ ଏକ ଦୁଃଖଦ ଦିନ ରହିଥିବା ବେଳେ କିଛି ସମୟ ପୂର୍ବରୁ ସେ ତାଙ୍କ ମା’ଙ୍କ ଅନ୍ତିମ ସଂସ୍କାରରୁ ଫେରିଥିଲେ। ସୂଚନା ମୁତାବକ, ପ୍ରଧାନମନ୍ତ୍ରୀ ଶୁକ୍ରବାର ପଶ୍ଚିମବଙ୍ଗ ଗସ୍ତ କରିବାର କାର୍ଯ୍ୟକ୍ରମ ରହିଥିଲା। କିନ୍ତୁ ମା’ଙ୍କ ନିଧନ ଘଟିବାରୁ ଭର୍ଚୁଆଲ ମାଧ୍ୟମରେ ସେ ଉକ୍ତ କାର୍ଯ୍ୟକ୍ରମରେ ସାମିଲ ହୋଇଥିଲେ। ଏହି କାର୍ଯ୍ୟକ୍ରମରେ ହୃଦୟରୁ ସାମିଲ ହେବା ପାଇଁ ମମତା ମୋଦିଙ୍କୁ ଧନ୍ୟବାଦ ଜଣାଇଛନ୍ତି। ଏଥିସହ ଭଗବାନ ପ୍ରଧାନମନ୍ତ୍ରୀଙ୍କୁ ଧର୍ଯ୍ୟ, ସହିବା ଶକ୍ତି ପ୍ରଦାନ କରନ୍ତୁ ବୋଲି ସେ ପ୍ରାର୍ଥନା କରିଛନ୍ତି।
