ଏଡିନବର୍ଗ,୧ ।୧୧: ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ସୋମବାର ସ୍କଟଲ୍ୟାଣ୍ଡର ସହର ଗ୍ଲାସଗୋରେ ପହଞ୍ଚିଛନ୍ତି । ରବିବାର ସେଠାରେ ଆରମ୍ଭ ହୋଇଥିବା ଜାତିସଂଘ ଜଳବାୟୁ ଶିଖର ସମ୍ମିଳନୀରେ ଯୋଗ ଦେବାକୁ ସେ ପହଞ୍ଚିଛନ୍ତି । ଏହି ସମ୍ମିଳନୀରେ ଗ୍ଲୋବାଲ ୱାର୍ମିଂଠାରୁ ଦୂରେଇ ରହିବାକୁ ସର୍ବୋତ୍ତମ ଉପାୟ ଉପରେ ଆଲାଚନା ହେବ । ଯେଉଁଥିରେ ପାଖାପାଖି ୨୦୦ ଦେଶର ପ୍ରତିନିଧି ଭାଗ ନେବେ । ଏହି ସମ୍ମିଳନୀକୁ ସିଓପି ୨୬ ମଧ୍ୟ କୁହାଯାଉଛି । ଏହା ୧୩ ନଭେମ୍ବର ପର୍ଯ୍ୟନ୍ତ ଚାଲିବ । ବିଶ୍ୱର ୧୦୦ରୁ ଊର୍ଦ୍ଧ୍ୱ ନେତା ସୋମବାର ଓ ମଙ୍ଗଳବାର ଏହି ଶିଖର ସମ୍ମିଳନୀର ଆରମ୍ଭରେ ଯୋଗଦେବ । ଯାହାକୁ ହାଇ ଲେବଲ ସେଗମେଣ୍ଡ ଭାବେ ଗଣାଯାଉଛି । ସୂଚନାଯୋଗ୍ୟ, ମୋଦିଙ୍କ ୫ ଦିନିଆ ଇଟାଲି ଗସ୍ତ କାର୍ଯ୍ୟକ୍ରମରେ ସେ ଶନିବାର ରୋମ ସ୍ଥିତ ରୋମା କନଭେନଶନ ସେଣ୍ଟରରେ ଜି୨୦ ଶିଖର ସମ୍ମିଳନୀରେ ଯୋଗ ଦେଇଥିଲେ । ରବିବାର ଜି୨୦ର ସଦସ୍ୟ ଦେଶ ନେତାଙ୍କ ଦୁଇ ଦିବସୀୟ ବୈଠକ ଶେଷ ହେଲା । ପ୍ରଧାନମନ୍ତ୍ରୀ ସେଠାରେ ଆୟୋଜିତ ଜି୨୦ ଶିଖର ସମ୍ମିଳନୀକୁ ସାର୍ଥକ ବୋଲି କହିବା ସହ ସାରା ବିଶ୍ୱର ନେତାଙ୍କ ହ ମହାମାରୀର ମୁକାବିଲା କରିବା, ସ୍ୱାସ୍ଥ୍ୟ କ୍ଷେତ୍ରରେ ସୁଧାର ଆଣିବା, ଆର୍ଥିକ ସଯୋଗକୁ ପ୍ରୋତ୍ସାହିତ କରିବା ଭଳି ବିଷୟକୁ ନେଇ ବିସ୍ତାର ଭାବେ ଚର୍ଚ୍ଚା ହୋଇଥିଲା ।