ସମରକନ୍ଦ,୧୬।୯: ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଶୁକ୍ରବାର ଏଠାରେ ଅନୁଷ୍ଠିତ ସାଂଘାଇ ସହଯୋଗ ସଂଗଠନ(ଏସ୍ସିଓ) ଶିଖର ସମ୍ମିଳନୀରେ ତୁର୍କୀ ରାଷ୍ଟ୍ରପତି ରିସେପ ତାଇପ ଏରଦଗାନ ଏବଂ ରୁଷିଆ ରାଷ୍ଟ୍ରପତି ଭ୍ଲାଡିମିର ପୁଟିନଙ୍କୁ ଭେଟିଛନ୍ତି। ଏହି ସମୟରେ ମୋଦି ଉଭୟ ନେତାଙ୍କ ସହ ବିଭିନ୍ନ କ୍ଷେତ୍ରରେ ଦ୍ୱିପାକ୍ଷିକ ସହଯୋଗ ବୃଦ୍ଧି କରିବାର ଉପାୟ ଉପରେ ଆଲୋଚନା କରିଛନ୍ତି।
ପୁଟିନଙ୍କ ସହ ଦ୍ୱିପାକ୍ଷିକ ବୈଠକରେ ମୋଦି କହିଛନ୍ତି, ଆଜି ମଧ୍ୟ ବିଶ୍ୱର ବିକାଶଶୀଳ ଦେଶ ପାଇଁ ସବୁଠାରୁ ବଡ଼ ସମସ୍ୟା ହେଲା ଖାଦ୍ୟ ନିରାପତ୍ତା, ଇନ୍ଧନ ନିରାପତ୍ତା, ସାର ସମସ୍ୟା। ଏଥିଲାଗି ଉପାୟ ଖୋଜିବାକୁ ହେବ। ଆପଣଙ୍କୁ ମଧ୍ୟ ଏଥିଲାଗି ପଦକ୍ଷେପ ନେବାକୁ ହେବ। ଆଜିର ଯୁଗ ଯୁଦ୍ଧର ନୁହେଁ। ଗଣତନ୍ତ୍ର କୂଟନୀତି ଏବଂ ସଂଳାପ କିଭଳି ଭାବେ ବିଶ୍ୱରେ କିଭଳି ପ୍ରଭାବ ପକାଏ ସେ ବିଷୟରେ ଫୋନରେ ଅନେକ ଥର ଆପଣଙ୍କ ସହ କଥା ହୋଇଛି। ଆପଣଙ୍କୁ ଏବଂ ୟୁକ୍ରେନକୁ କୃତଜ୍ଞତା ଜଣାଇବାକୁ ଚାହେଁ ଯେ ବିପଦ ସମୟରେ ଯେତେବେଳେ ଆମର ହଜାର ହଜାର ଛାତ୍ର ୟୁକ୍ରେନରେ ଫସି ରହିଥିଲେ, ସେତେବେଳେ ଆପଣମାନଙ୍କ ସାହାଯ୍ୟରେ ଆମେ ଆମର ଛାତ୍ରମାନଙ୍କୁ ଫେରାଇ ଆଣିବାରେ ସକ୍ଷମ ହେଲୁ।
ସେହିଭଳି ମୋଦି ରାଜାବ ତାଇପଙ୍କ ସହ ଆଲୋଚନା କରିଛନ୍ତି। ଉଭୟ ନେତାଙ୍କ ମଧ୍ୟରେ ଦ୍ୱିପାକ୍ଷିକ ସହଯୋଗ ବୃଦ୍ଧି କରିବାର ଉପାୟ ଉପରେ ଆଲୋଚନା ହୋଇଛି। ବିଶେଷକରି ଦ୍ୱିପାକ୍ଷିକ ବାଣିଜ୍ୟ ଏବଂ ଆଞ୍ଚଳିକ-ବିଶ୍ୱସ୍ତରୀୟ ବିକାଶ ଉପରେ ଉଭୟ ନେତା ମତ ବିନିମୟ କରିଥିବା ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟ ପକ୍ଷରୁ ଟୁଇଟ୍ କରି ସୂଚନା ଦିଆଯାଇଛି।
