ନୂଆଦିଲ୍ଲୀ,୧୩ ।୧୦: ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ମଙ୍ଗଳବାର ଶକ୍ତି ମନ୍ତ୍ରୀ ଆର୍ କେ ସିଂ ଓ କୋଇଲା ମନ୍ତ୍ରୀ ପ୍ରହ୍ଲାଦ ଯୋଶୀଙ୍କ ସହ ଏକ ବୈଠକରେ ଯୋଗ ଦେଇଥିଲେ । ଉଭୟ ମନ୍ତ୍ରୀ ଦେଶରେ କୋଇଲାର ସ୍ଥିତିକୁ ନେଇ ଆଲୋଚନା କରିଥିଲେ । ମିଳିଥିବା ସୂଚନା ଅନୁଯାୟୀ, ପ୍ରଧାନମନ୍ତ୍ରୀ କୋଇଲା ସଙ୍କଟର ସ୍ଥିତିକୁ ସୁଧାରିବାର ଉପାୟ ଓ ଭବିଷ୍ୟତର କାର୍ଯ୍ୟଧାରାକୁ ନେଇ ସମିକ୍ଷା କରିଥିଲେ । ଉଭୟ ମନ୍ତ୍ରୀ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ କହିଥିଲେ ଦେଶରେ କୋଇଲାର ଅଭାବ ନାହିଁ । ଆଗାମୀ ଦିନରେ ଅବସ୍ଥା ସୁଧୁରି ଯିବ । ଏହି ବୈଠକ ପୂର୍ବରୁ କ୍ୟାବିନେଟ ସଚିବ ଓ ଉଭୟ ମନ୍ତ୍ରଣାଳୟର ସଚିବଙ୍କର ବୈଠକ ଅନୁଷ୍ଠିତ ହୋଇଥିଲା । ଯେଉଁଥିରେ ଦେଶରେ କୋଇଲା ଗଚ୍ଛିତ ଥିବା ଓ ଅବସ୍ଥା ୭-୧୦ ଦିନ ମଧ୍ୟରେ ସୁଧୁରି ଯିବ ବୋଲି ଜଣାପଡିଥିଲା । ସୂଚନାଯୋଗ୍ୟ, ଦେଶରେ କୋଇଲା ଅଭାବକୁ ନେଇ ଉପୁଜିବାକୁ ଯାଉଥିବା ବିଜୁଳି ସଙ୍କଟ ଏବେ ସମସ୍ତଙ୍କ ମୁଣ୍ଡ ବ୍ୟଥାର କାରଣ ପାଲଟିଛି ।