ଇଟାନଗର,୧୯ ।୧୧: ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଶନିବାର ଅରୁଣାଚଳ ପ୍ରଦେଶକୁ ଏକ ବଡ ଉପହାର ଦେଇଛନ୍ତି । ସେଠାରେ ସେ ପ୍ରଥମ ଗ୍ରୀନଫିଲ୍ଡ ଏୟାର ପୋର୍ଟର ଉଦ୍ଘାଟନ କରିଛନ୍ତି । ଏହି ଅବସରରେ ସେ ଜନତାଙ୍କୁ ସମ୍ବୋଧନ ଦେବା ସମୟରେ ଶୁଭେଚ୍ଛା ବି ଜଣାଇଛନ୍ତି । ପ୍ରଧାନମନ୍ତ୍ରୀ ୨୦୧୯ରେ ଏହି ବିମାନ ବନ୍ଦରର ଶିଳାନ୍ୟାସ କରିଥିଲେ । ଏବେ ଏହା ୬୪୫ କୋଟି ଟଙ୍କା ବ୍ୟୟରେ ନିର୍ମାଣ କରାଯାଇଛି ।
ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଅରୁଣାଚଳ ପ୍ରଦେଶର ଇଟାନଗରରେ ୬୦୦ ମେଗାୱାଟ କାମେଂଗ ହାଇଡ୍ରୋ ପାୱାର ଷ୍ଟେଶନକୁ ରାଷ୍ଟ୍ରକୁ ସମର୍ପିତ କରିଛନ୍ତି । ସେଠାରେ ମୋଦି ତାଙ୍କ ସମ୍ବୋଧନରେ କହିଛନ୍ତି ଆପଣମାନେ ଜାଣନ୍ତି ଆମେ ଏକ କାର୍ଯ୍ୟ ସଂସ୍କୃତି ନେଇ ଆସିଛୁ । ଯେଉଁଠାରେ ଆମେ ଯେଉଁ ପରିଯୋଜନାର ଶିଳାନ୍ୟାସ କରିଛୁ ତା’ର ଉଦଘାଟନ ବି କରୁଛୁ । ଅଟକାଇବା, ଝୁଲାଇବା, ଭ୍ରମିତ କରିବାର ଯୁଗ ଶେଷ ହୋଇଛି ।
ପ୍ରଧାନମନ୍ତ୍ରୀ ମୋଦି କହିଛନ୍ତି, ଆମର ସ୍ୱପ୍ନ କେବଳ ଭାରତ ମାତା ପାଇଁ, ଅରୁଣାଚଳର ଏହି ଉପଲବ୍ଧି ପାଇଁ ସମଗ୍ର ପୂର୍ବୋତ୍ତରକୁ ଶୁଭେଚ୍ଛା । ପୂର୍ବରୁ ଏଠାରେ ଲୋକେ କେବଳ ନିର୍ବାଚନ ଜିତିବା ଲାଗି ଉଦ୍ୟମ କରୁଥିଲେ । ହେଲେ ଏବେ ଏଠାରେ ପରିସ୍ଥିତି ବଦଳି ଯାଇଛି । ଏବେ ଏଠାରେ କେବଳ ଉଦ୍ୟମ ହେଉନି ବରଂ ବିକାଶ ବି ନଜର ଆସିଛି ।
ମୋଦି ଆହୁରି ମଧ୍ୟ କହିଛନ୍ତି ମୁଁ ଆଜିବି ଅରୁଣାଚଳ ପ୍ରଦେଶ ଆସୁଛି ଏକ ନୂଆ ଆଶା, ନୂଆ ଶକ୍ତି ଓ ନୂଆ ଉତ୍ସାହ ନେଇ ଫେରୁଛି । ଅରୁଣାଚଳବାସୀଙ୍କ ମୁହଁରେ କେବେ ଉଦାସିନତା ବା ନିରାଶା ଦେଖିବାକୁ ମିଳିନାହିଁ । ଅନୁଶାସନ କ’ଣ ଏହା ଏଠାରେ ସମସ୍ତ ବ୍ୟକ୍ତି ଓ ସବୁ ଘରେ ନଜର ଆସୁଛି ।
