ନୂଆଦିଲ୍ଲୀ,୩।୯: ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ସୋମବାର ଭାଜପାର ଜାତୀୟ ସଦସ୍ୟତା ଅଭିଯାନ -୨୦୨୪ ଆରମ୍ଭ କରିଛନ୍ତି। ଏହି ସମୟରେ ସୋସିଆଲ ମିଡିଆରେ ପିଏମ ମୋଦିଙ୍କ ଏକ ଫଟୋ ଭାଇରାଲ ହେଉଛି। ଏହି ଫଟୋରେ ପ୍ରଧାନମନ୍ତ୍ରୀ ମୋଦି ରକ୍ତଦାନ ଅଭିଯାନ ଅଧୀନରେ ରକ୍ତ ଦାନ କରୁଥିବା ଦେଖିବାକୁ ମିଳିଛି।
ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଏହି ଫଟୋ ସୋସିଆଲ ମିଡିଆ ଏକ୍ସ ଆକାଉଣ୍ଟରୁ ମୋଦି ଆର୍କାଇଭରୁ ଶେୟାର କରାଯାଇଛି। ଏହି ଫଟୋ ସେହି ସମୟର ଯେତେବେଳେ ସେ କେବଳ ଜଣେ ଭାଜପା କର୍ମୀ ଥିଲେ। ତାଙ୍କର ଏହି ଫଟୋ ଭାଇରାଲ ହୋଇଛି ଯେତେବେଳେ ପ୍ରଧାନମନ୍ତ୍ରୀ ମୋଦି ସୋମବାର ଭାଜପାର ସଦସ୍ୟତା ଅଭିଯାନ ଆରମ୍ଭ କରିଛନ୍ତି। ଶେୟାର ହୋଇଥିବା ଫଟୋ କ୍ୟାପଶନରେ ଲେଖାଯାଇଛି, ପ୍ରଥମ ଦିନରୁ ଅନ୍ୟ ଲୋକଙ୍କ ପାଇଁ ଉଦାହରଣ । ଏହି ଫଟୋରେ ଭାରତୀୟ ଜନତା ଯୁବ ମୋର୍ଚ୍ଚା ଦ୍ୱାରା ଆୟୋଜିତ ରକ୍ତଦାନ ଅଭିଯାନର ଏକ ପୋଷ୍ଟର ଅଛି ।
ଭାଜପା ଏହି ଅଭିଯାନକୁ ‘ସଙ୍ଗଠନ ପର୍ବ ସଦସ୍ୟତା ଅଭିଯାନ -୨୦୨୪’ ନାମରେ ନାମିତ କରିଛି। ଏଥିରେ ପ୍ରଧାନମନ୍ତ୍ରୀ ମୋଦିଙ୍କ ପରେ ଭାଜପା ଅଧ୍ୟକ୍ଷ ଜେପି ନଡ୍ଡା, କେନ୍ଦ୍ର ସ୍ବରାଷ୍ଟ୍ର ମନ୍ତ୍ରୀ ଅମିତ ଶାହା ଏବଂ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂଙ୍କ ସମେତ ଅନ୍ୟାନ୍ୟ ନେତା ମଧ୍ୟ ଦଳର ସଦସ୍ୟତା ଗ୍ରହଣ କରିଛନ୍ତି। ଏହି ଅବସରରେ କେନ୍ଦ୍ର ଶିକ୍ଷା ମନ୍ତ୍ରୀ ଧର୍ମେନ୍ଦ୍ର ପ୍ରଧାନ, ପୀୟୁଷ ଗୋୟଲ, ଭୁପେନ୍ଦ୍ର ଯାଦବ, ଶିବରାଜ ସିଂ ଚୌହାନ ଏବଂ ନିତ୍ୟାନନ୍ଦ ରାୟ, ଭାଜପା ରାଷ୍ଟ୍ରୀୟ ସାଧାରଣ ସଚିବ ତଥା ଦଳର ଜାତୀୟ ସଦସ୍ୟତା ଅଭିଯାନର ସଂଯୋଜକ ବିନୋଦ ତାୱଡେ ଏବଂ ହଜାର ହଜାର କର୍ମୀ ମଧ୍ୟ ଉପସ୍ଥିତ ଥିଲେ।
