ନୂଆଦିଲ୍ଲୀ,୨୬।୫: ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ପୁଣିଥରେ ଇଣ୍ଡିଆ ମହାମେଣ୍ଟ ଉପରେ ଜୋରଦାର ବର୍ଷିଛନ୍ତି । ବିରୋଧୀଙ୍କୁ ଟାର୍ଗେଟ କରିବା ସହ ସେମାନେ ଭୋଟବ୍ୟାଙ୍କକୁ ଖୁସି କରିବା ପାଇଁ ଏଥର ପ୍ଲାନିଂ କରୁଛନ୍ତି ବୋଲି ମୋଦି କହିଛନ୍ତି। ଏଥିସହ ଇଣ୍ଡିଆ ମେଣ୍ଟର ପ୍ରଧାନମନ୍ତ୍ରୀ ପ୍ରାର୍ଥୀ କିଏ ହେବ ତାକୁ ନେଇ ମଧ୍ୟ ବଡ଼ ଭବିଷ୍ୟବାଣୀ କରିଛନ୍ତି। ଯାହା ସମସ୍ତଙ୍କୁ ତାଜୁବ କରିଛି। ବିହାରର ପାଟଳିପୁତ୍ର ଜନସଭାକୁ ସମ୍ବୋଧିତ କରିବା ସମୟରେ ସେ ବିରୋଧୀ ମେଣ୍ଟକୁ ଟାର୍ଗେଟ କରିବା ସହ ସେମାନଙ୍କ ପ୍ରଧାନମନ୍ତ୍ରୀ ପ୍ରାର୍ଥୀ ନେଇ ବଡ଼ ବୟାନ ଦେଇଛନ୍ତି।
ମୋଦି କହିଛନ୍ତି, ସେମାନେ ୫ବର୍ଷରେ ୫ଟି ପିଏମ ଦେବାକୁ ଯୋଜନା କରିଛନ୍ତି। ଏହି ନିର୍ବାଚନ କେବଳ ଏମପି ନିର୍ବାଚିତ କରିବା ନୁହେଁ ପ୍ରଧାନମନ୍ତ୍ରୀ ନିର୍ବାଚିତ କରିବା ଅଟେ। ଜନତାଙ୍କ ଭୋଟ ଏତେ ଶକ୍ତିଶାଳୀ ଯାହା ପିଏମ କିଏ ହେବ ତାହା ନିଷ୍ପତ୍ତି ନେଇପାରେ। ଇଣ୍ଡିଆ ମେଣ୍ଟର ପ୍ରାର୍ଥୀ ନିଷ୍ପତ୍ତି ନିଆସରିଛି। ଗାନ୍ଧୀ ପରିବାରର ପୁଅ, ସପା ପରିବାରର ପୁଅ, ଏନସିପି ପରିବାରର ଝିଅ, ଏଏପି ମୁଖ୍ୟଙ୍କ ସ୍ତ୍ରୀ, ଟିଏମସି ପରିବାରର ଭଣଜା, ନକଲି ଶିବସେନାଙ୍କ ପୁଅ, ଆରଜେଡିର ପୁଅ କିମ୍ବା ଝିଅ ପ୍ରଧାନମନ୍ତ୍ରୀ ପ୍ରାର୍ଥୀ ପାଇଁ ଯୋଗ୍ୟ ବିବେଚିତ ହୋଇପାରନ୍ତି। ଏହି ପାଞ୍ଚଟି ପରିବାରର ପ୍ଲାନିଂ ଅଛି କି, ଏମାନେ ୫ବର୍ଷ ଧରି ପ୍ରଧାନମନ୍ତ୍ରୀ ପଦକୁ କବଜା କରି ରଖିବେ।
