ନୂଆଦିଲ୍ଲୀ,୧୪ ।୧୧: ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଜି-୨୦ ଶିଖର ସମ୍ମିଳନୀରେ ଯୋଗ ଦେବା ଲାଗି ସୋମବାର ଇଣ୍ଡୋନେସିଆର ବାଲି ଯାତ୍ରା କରିବେ । ପ୍ରଧାନମନ୍ତ୍ରୀ ମୋଦି ୧୪ରୁ ୧୬ ନଭେମ୍ବର ପର୍ଯ୍ୟନ୍ତ ବାଲିରେ ରହିବେ । ଜି-୨୦ ଶିଖର ସମ୍ମିଳନୀ ୧୫-୧୬ ନଭେମ୍ବରରେ ହେବ । ପ୍ରାୟ ୪୫ ଘଣ୍ଟାର ରହଣି ଭିତରେ ମୋଦି ୨୦ଟି କାର୍ଯ୍ୟକ୍ରମରେ ଯୋଗଦେବେ । ବିଶ୍ୱର ବଡ ବଡ ୨୦ଟି ଦେଶର ପ୍ରତିନିଧି ମଣ୍ଡଳ ଜି-୨୦ର ମୁଖ୍ୟଙ୍କ ଶିଖର ସମ୍ମିଳନୀରେ ଭାଗ ନେବା ବ୍ୟତୀତ ପ୍ରଧାନମନ୍ତ୍ରୀ ମୋଦି ଏଥିରେ ଯୋଗ ଦେଇଥିବା ୧୦ ଦେଶର ମୁଖ୍ୟଙ୍କ ସହ ଦ୍ୱିପାକ୍ଷକ ବୈଠକ ବି କରିବେ । ଏଥିରେ ବହୁପକ୍ଷୀୟ ଓ ଦ୍ୱିପାକ୍ଷିକ ପ୍ରସଙ୍ଗକୁ ନେଇ ବିସ୍ତୃତ ଆଲୋଚନା ହେବ ।
ସୂଚନାଯୋଗ୍ୟ, ଜି-୨୦ ସମ୍ମିଳନୀର ପରବର୍ତ୍ତି ଅଧ୍ୟକ୍ଷ ରହିବ ଭାରତ । ଏହା ଆସନ୍ତା ବର୍ଷ ଅର୍ଥାତ୍ ସେପ୍ଟେମର ୨୦୨୩ରେ ନୂଆଦିଲ୍ଲୀରେ ଆୟୋଜିତ ହେବ । ଏହାକୁ ଦେଖିଲେ ଏଥର ମୋଦିଙ୍କ ଜି-୨୦ଶିଖର ସମ୍ମିଳନୀରେ ଯୋଗ ଦେବା ଗୁରୁତ୍ୱପୂର୍ଣ୍ଣ ବୋଲି କୁହାଯାଉଛି । ବୈଦେଶିକ ସଚିବ ବିନୟ କ୍ୱାତ୍ରା କହିଛନ୍ତି ଶିଖର ସମ୍ମିଳନୀ ୩ଟି ପର୍ଯ୍ୟାୟରେ ହେବ, ତିନୋଟି ଯାକ ପର୍ଯ୍ୟାୟରେ ମୋଦି ଅନ୍ୟ ବିଶ୍ୱ ନେତାଙ୍କ ସହ ଯୋଗ ଦେବେ ।