ନୂଆଦିଲ୍ଲୀ,୧୫।୬: ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ମା’ ହୀରାବେନ୍ ମୋଦି ଆସନ୍ତା ଜୁନ୍ ୧୮ରେ ନିଜର ୧୦୦ତମ ଜନ୍ମଦିନ ପାଳନ କରିବେ। ଏହି ସ୍ବତନ୍ତ୍ର ଦିନରେ ତାଙ୍କୁ ଭେଟିବାକୁ ପ୍ରଧାନମନ୍ତ୍ରୀ ଗାନ୍ଧିନଗର ଯିବେ ବୋଲି ସୂଚନା ମିଳିଛି। ଏହି ଅବସରରେ ଭାଡନଗରର ହାଟକେଶ୍ୱର ମନ୍ଦିରରେ ପୂଜାପାଠ ମଧ୍ୟ ଆୟୋଜନ କରାଯିବାର କାର୍ଯ୍ୟକ୍ରମ ରହିଛି। ଏଥିରେ ପ୍ରଧାନମନ୍ତ୍ରୀ ମଧ୍ୟ ସାମିଲ ହେବେ।
ଏହାପୂର୍ବରୁ ମାର୍ଚ୍ଚ ୧୧ରେ ପ୍ରଧାନମନ୍ତ୍ରୀ ମୋଦି ଦୁଇ ଦିନିଆ ଗୁଜରାଟ ଗସ୍ତରେ ଥିବାବେଳେ ଅହମ୍ମଦାବାଦରେ ତାଙ୍କ ମାଙ୍କୁ ଭେଟିଥିଲେ। କରୋନା ମହାମାରୀ ହେତୁ ଦୁଇ ବର୍ଷର ବ୍ୟବଧାନ ପରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ତାଙ୍କ ମାଙ୍କୁ ଭେଟିଥିଲେ। ଏହା ବ୍ୟତୀତ, ଜୁନ ୧୮ରେ ବରୋଦା ଗସ୍ତ ସମୟରେ ପ୍ରଧାନମନ୍ତ୍ରୀ ମୋଦି ପ୍ରାୟ ୪ ଲକ୍ଷ ଲୋକଙ୍କୁ ସମ୍ବୋଧିତ କରିବାକୁ ଯାଉଛନ୍ତି।
ଚଳିତ ମାସରେ ଗୁଜରାଟକୁ ପ୍ରଧାନମନ୍ତ୍ରୀ ମୋଦିଙ୍କ ଦ୍ୱିତୀୟ ଗସ୍ତ ହେବ। ଏହାପୂର୍ବରୁ ଜୁନ ୧୦ରେ, ସେ ତାଙ୍କର ପ୍ରଥମ ଗସ୍ତ ସମୟରେ ନଭସାରୀର ଆଦିବାସୀ ଅଞ୍ଚଳରେ ୩,୦୫୦ କୋଟି ଟଙ୍କା ମୂଲ୍ୟର ୭ଟି ପ୍ରକଳ୍ପର ଉଦଘାଟନ କରିଥିଲେ।