ନୂଆଦିଲ୍ଲୀ,୨୧।୫: କରୋନା ସଙ୍କଟକୁ ଦୃଷ୍ଟିରେ ରଖି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଶୁକ୍ରବାର ନିଜ ସଂସଦୀୟ କ୍ଷେତ୍ର ବାରାଣସୀର ଡାକ୍ତର ଏବଂ ସ୍ବାସ୍ଥ୍ୟକର୍ମୀଙ୍କ ସହ ଭିଡିଓ କନଫରେନ୍ସିଂ ଜରିଆରେ ଆଲୋଚନା କରିଛନ୍ତି। ଏହି ସମୟରେ ପ୍ରଧାନମନ୍ତ୍ରୀ ଭାବପ୍ରବଣ ହୋଇପଡିଥିଲେ। ସେ କହିଛନ୍ତି, କରୋନା ବିରୋଧରେ ଚାଲିଥିବା ଏହି ଲଢେଇରେ ଆମେମାନେ ଅନେକ ସମ୍ପର୍କୀୟଙ୍କୁ ହରାଇଛୁ। କାଶୀର ଜଣେ ସେବକ ଭାବେ ମୁଁ ସମସ୍ତଙ୍କୁ ଧନ୍ୟବାଦ ଦେବାକୁ ଚାହୁଁଛି ବିଶେଷ ଭାବେ ସେଠାକାର ଡାକ୍ତର, ନର୍ସ ଏବଂ ଅନ୍ୟ ସ୍ବାସ୍ଥ୍ୟକର୍ମୀମାନେ ଯେଉଁ କାମ କରୁଛନ୍ତି ତାହା ପ୍ରଶଂସନୀୟ। ମୁଁ ନିଶ୍ଚିତ ଯେ ଆମ ସମସ୍ତଙ୍କର ସାମୂହିକ ପ୍ରୟାସ ଭଲ ଫଳାଫଳ ଆଣିବ ଏବଂ ବାବା ବିଶ୍ୱନାଥଙ୍କ କୃପାରୁ ଆମେ ସମସ୍ତେ ଏହି ଯୁଦ୍ଧରେ ଜିତିବା।
ଉତ୍ତର ପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କୁ ପ୍ରଶଂସା କରି ପ୍ରଧାନମନ୍ତ୍ରୀ କହିଛନ୍ତି, ଯେତେବେଳେ ଯୋଗୀ ଏମ୍ପି ଥିଲେ, ସେ ପିଲାମାନଙ୍କ ଜୀବନକୁ ଦେଖି ସଂସଦରେ କାନ୍ଦୁଥିଲେ। ପିଲାମାନଙ୍କୁ ବଞ୍ଚାଇବା ପାଇଁ ପଦକ୍ଷେପ ନେବାକୁ ସେ ସେହି ସମୟର ସରକାରଙ୍କୁ ଦାବି କରିଥିଲେ। ଆଜି ତାଙ୍କ ଅଭିଯାନ ମାଧ୍ୟମରେ ଆମେ ମେନିଞ୍ଜାଇଟିସକୁ ଏଡାଇବାରେ ସକ୍ଷମ ହୋଇଛୁ। ତୃତୀୟ ଲହରରେ, ପିଲାମାନେ ପୁନର୍ବାର ଯନ୍ତ୍ରଣା ଭୋଗିପାରନ୍ତି, ଯାହାକୁ ଆମେ ସାମ୍ନା କରିବାକୁ ପ୍ରସ୍ତୁତ ରହିବାକୁ ପଡିବ। ଆମେ ଏକ ଅଦୃଶ୍ୟ ତଥା ବହୁମୁଖୀ ଶତ୍ରୁ ସହିତ ଲଢୁଛୁ, ଏପରି ପରିସ୍ଥିତିରେ ଆମକୁ ନିଜକୁ ବହୁତ ସତର୍କ ରହିବାକୁ ପଡିବ ଏବଂ ଏହାକୁ ମୁକାବିଲା କରିବାରେ ନିଜକୁ ସକ୍ଷମ କରିବାକୁ ପଡିବ। ବାରାଣସୀବାସୀଙ୍କ ସହ କଥାବାର୍ତ୍ତା ବେଳେ କରୋନା ଯୁଦ୍ଧରେ ଲଢିବା ପାଇଁ ପ୍ରଧାନମନ୍ତ୍ରୀ ଏକ ନୂଆ ମନ୍ତ୍ର ଦେଇଛନ୍ତି। ସେ କହିଛନ୍ତି ଯେ ଏହା ସମସ୍ତଙ୍କ ପାଇଁ ଏକ ମନ୍ତ୍ର – ‘ଯେଉଁଠି ରୋଗ, ସେଇଠି ଚିକିତ୍ସା ଅଛି’।