ନୂଆଦିଲ୍ଲୀ,୮ ।୧୦: କରୋନା ମହାମାରୀ ତା’ର କାୟା ବିସ୍ତାର କରି ଚାଲିଥିବା ବେଳେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଅକ୍ଟୋବରରେ ଆରମ୍ଭ ହେଉଥିବା ପର୍ବପର୍ବାଣୀ, ଶୀତ ତଥା ଅର୍ଥବ୍ୟବସ୍ଥାକୁ ଦେଖି କରୋନା ବିରୋଧରେ ଗୁରୁବାରଠାରୁ ଏକ ଜନ ଆନ୍ଦୋଳନ ଆରମ୍ଭ କରିବାକୁ ଯାଉଛନ୍ତି । ଏଥିପାଇଁ ଆଜିଠାରୁ ‘ଜନ ଆନ୍ଦୋଳନ’ ଆରମ୍ଭ କରାଯାଇଛି । ପ୍ରଧାନମନ୍ତ୍ରୀ ମୋଦି ଟୁଇଟ୍ କରି କହିଛନ୍ତି ଯେପର୍ଯ୍ୟନ୍ତ କରୋନା ପାଇଁ ଔଷଧ ନାହିଁ ସେପର୍ଯ୍ୟନ୍ତ ଛାଡ ନାହିଁ ମୋଦି ଲେଖିଛନ୍ତି, ଯବ୍ତକ୍ ଦୱାଇ ନେହି ତବ୍ତକ୍ ଢିଲାଇ ନେହି । ସୂଚନାଯୋଗ୍ୟ, ଅକ୍ଟୋବରରୁ ଡିସେମ୍ବର ମଧ୍ୟରେ ଦଶହରା. ଦୀପାବଳୀ, ନବରାତ୍ରୀ, ଛଟପୂଜା ଆଦି ପର୍ବପର୍ବାଣୀ ପଡୁଛି । ଏହାସହ ଶୀତଋତୁ ମଧ୍ୟ ଆରମ୍ଭ ହେବାକୁ ଯାଉଛି । ତେଣୁ ଆଜିର କାର୍ଯ୍ୟକ୍ରମର ଫୋକସ କରୋନାଠାରୁ ଦୂରେଇ ରହିବା ପାଇଁ କରାଯାଇଛି ବୋଲି କୁହାଯାଇଛି । ମୋଦି ଟୁଇଟ୍ କରି କହିଛନ୍ତି ଆମେ ଭାରତୀୟ କରୋନାକୁ ଯେଉଁଭଳି ଭାବେ ମୁକାବିଲା କରୁଛେ ତାହା ଅନ୍ୟମାନଙ୍କ ପାଇଁ ଉଦାହରଣ ପାଲଟିଛି । ତେଣୁ ଆସନ୍ତୁ ଏକାଠି ହୋଇ କରୋନାର ମୁକାବିଲା କରିବା । ମାସ୍କ ପିନ୍ଧିବା, ହାତ ଧୋଇବା, ସାମାଜିକ ଦୂରତା ବଜାୟ ରଖିବା । ଅତିକମ୍ରେ ଦୁଇ ଫୁଟ ଦୂରତା ରଖିବା । ଆମେ କରୋନା ବିରୋଧରେ ଯେଉଁ ଲଢେଇ ଲଢୁଛୁ ତାହା ଆମ କରୋନା ଯୋଦ୍ଧାଙ୍କୁ ପ୍ରେରଣା ଯୋଗାଉଛି । ତେଣୁ ଏଡାକୁ ଆଗକୁ ଜାରି ରଖିବା ବୋଲି ମୋଦି କହିଛନ୍ତି ।