ହାଇଦ୍ରାବାଦ୍,୪।୭: ସ୍ବାଧୀନତା ସଂଗ୍ରାମୀ ଆଲୁରି ସୀତାରାମ ରାଜୁଙ୍କ ୧୨୫ତମ ଜନ୍ମ ବାର୍ଷିକୀ ଉତ୍ସବରେ ଭାଗ ନେବାକୁ ସୋମବାର ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଆନ୍ଧ୍ରପ୍ରଦେଶର ଭୀମଭରାମରେ ପହଞ୍ଚିଥିଲେ। ସେ ସ୍ବାଧୀନତା ସଂଗ୍ରାମୀ ପାସାଲା କୃଷ୍ଣମୂର୍ତ୍ତିଙ୍କ ପରିବାରକୁ ମଧ୍ୟ ଭେଟିଥିଲେ। ପ୍ରଧାନମନ୍ତ୍ରୀ ତାଙ୍କର ୯୦ ବର୍ଷର ଝିଅ ପାସାଲା କ୍ରିଷ୍ଣାଭାରତୀଙ୍କ ପାଦ ଛୁଇଁ ଆଶୀର୍ବାଦ ନେଇଥିଲେ। କ୍ରିଷ୍ଣାଭାରତୀ ଏକ ହ୍ବିଲ ଚେୟାରରେ ବସିଥିଲେ। ସେ ପ୍ରଧାନମନ୍ତ୍ରୀଙ୍କ ମୁଣ୍ଡରେ ହାତ ରଖି ତାଙ୍କୁ ଆଶୀର୍ବାଦ ଦେଇଥିଲେ।
ସୂଚନାଯୋଗ୍ୟ, ପାସାଲା କ୍ରିଷ୍ଣମୂର୍ତ୍ତି ୧୯୦୦, ଜାନୁୟାରୀ ୨୬ରେ ତାଡେପାଲିଗୁଡେମ ତାଲୁକାର ପଶ୍ଚିମ ଭିପୁରୁ ଗ୍ରାମରେ ଜନ୍ମଗ୍ରହଣ କରିଥିଲେ। ୧୯୨୧ ମସିହାରେ ସେ ତାଙ୍କ ସ୍ତ୍ରୀଙ୍କ ସହ କଂଗ୍ରେସରେ ଯୋଗ ଦେଇଥିଲେ। ସେ ଗାନ୍ଧିଜୀଙ୍କ ଧାରଣା ଅନୁସରଣ କରିଥିଲେ। ସେ ଲୁଣ ସତ୍ୟଗ୍ରାହ ଆନ୍ଦୋଳନରେ ମଧ୍ୟ ଭାଗ ନେଇଥିଲେ ଏବଂ ଏହା ପରେ ତାଙ୍କୁ ଏକ ବର୍ଷ ଜେଲରେ ରହିବାକୁ ପଡିଲା। ସେ ୧୯୭୮ରେ ମୃତ୍ୟୁବରଣ କରିଥିଲେ।
ପ୍ରଧାନମନ୍ତ୍ରୀ ମୋଦି ଆଲୁରି ସୀତାରାମ ରାଜୁଙ୍କ ଏକ ବ୍ରୋଞ୍ଜ ପ୍ରତିମୂର୍ତ୍ତିକୁ ଉନ୍ମୋଚନ କରିଛନ୍ତି। ଏହି ଅବସରରେ ସେ କହିଛନ୍ତି ଯେ, ଆନ୍ଧ୍ରପ୍ରଦେଶର ଏହି ଭୂମି ମହାନ ଆଦିବାସୀ ପରମ୍ପରା ସହିତ ଜଡିତ ଅଛି। ଅନେକ ମହାନ ବିପ୍ଳବୀ ଏଠାରେ ଜନ୍ମ ହୋଇଥିଲେ। ମୁଁ ସେ ସମସ୍ତଙ୍କୁ ମୋର ସମ୍ମାନ କରେ। ସୀତାରାମ ରାଜୁଙ୍କ ୧୨୫ତମ ଜନ୍ମ ବାର୍ଷିକୀ ବର୍ଷସାରା ପାଳନ କରାଯିବ।
ଆଲୁରି ଆଦିବାସୀମାନଙ୍କ ସୁବିଧା ପାଇଁ ବ୍ରିଟିଶମାନଙ୍କ ସହ ଲଢିଥିଲେ। ସେ ୧୯୨୨ରେ ଆରମ୍ଭ ହୋଇଥିବା ରାମ୍ପା ବିଦ୍ରୋହର ନେତୃତ୍ୱ ନେଇଥିଲେ। ତାଙ୍କୁ ସ୍ଥାନୀୟ ଭାବରେ ମନ୍ୟମମ ଭେରୁଡୁ କୁହାଯାଉଥିଲା ଯାହାର ଅର୍ଥ ଜଙ୍ଗଲର ହିରୋ। ସେ ୪ ଜୁଲାଇ ୧୮୯୭ରେ ଜନ୍ମଗ୍ରହଣ କରିଥିଲେ।