ନୂଆଦିଲ୍ଲୀ,୮।୨: ପାର୍ଲାମେଣ୍ଟରେ ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କ ଅଭିଭାଷଣ ଉପରେ ଧନ୍ୟବାଦ ପ୍ରସ୍ତାବ ଉପରେ ବୁଧବାର ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଜବାବ ରଖିଛନ୍ତି। ଏହି ଅବସରରେ ବିରୋଧୀ ଦଳ ଉପରେ ଟାର୍ଗେଟ୍ କରି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି କହିଛନ୍ତି, କ୍ଷମତାର ସ୍ବପ୍ନ ଦେଖୁଥିବା ଲୋକମାନେ ନିରାଶାରେ ବୁଡ଼ି ଯାଉଛନ୍ତି।
ରାହୁଲ ଗାନ୍ଧୀଙ୍କ ନାଁ ନ ଦେଇ ମୋଦି କହିଛନ୍ତି, ଯେଉଁମାନେ ତ୍ରିରଙ୍ଗା ଉତ୍ତୋଳନ କରି ନିକଟରେ ଲାଲ ଚୌକରୁ ଆସିଛନ୍ତି ସେମାନେ ନିଶ୍ଚିତ ଭାବରେ ଦେଖିଥିବେ ଯେ ଆଜି କୌଣସି ପ୍ରତିବନ୍ଧକ ବିନା ସେଠାରେ ବୁଲାବୁଲି କରିପାରିବେ। ୯୦ ଦଶକରେ ମୁଁ ମଧ୍ୟ ସେଠାକୁ ଯାଇଥିଲି। ଲାଲ ଚୌକରେ ପତାକା ଉତ୍ତୋଳନ କରିବାକୁ ଏକ ସଂକଳ୍ପ ନେଇ ସେଠାକୁ ଯାଇଥିଲି, ତେବେ ଆତଙ୍କବାଦୀମାନେ ଏହାର ପ୍ରତିବାଦରେ ପୋଷ୍ଟର ଲଗାଇଥିଲେ। ତା’ପରେ ଆମେ ମଧ୍ୟ କହିଥିଲୁ ଦେଖିବା, କିଏ ନିଜ ମା’ର କ୍ଷୀର ପିଇଛି, କିଏ ଆମକୁ ଅଟକାଇବ। ଆମେ ବୁଲେଟ ପ୍ରୁଫ ଜ୍ୟାକେଟ ବିନା ଆସିବୁ ଏବଂ ତ୍ରିରଙ୍ଗା ଉଡାଇବୁ। ଲାଲ ଚୌକରେ ଏହି ନିଷ୍ପତ୍ତି ନିଆଯିବ।
ପ୍ରଧାନମନ୍ତ୍ରୀ ମୋଦି ଆହୁରି ମଧ୍ୟ କହିଛନ୍ତି, ସେତେବେଳେ କେହି ଜଣେ କହିଥିଲେ ଯେ ଯେତେବେଳେ ସାଧାରଣତନ୍ତ୍ର ଦିବସରେ ପତାକା ଉତ୍ତୋଳନ କରାଯାଏ, ସେଠାରେ ଅସ୍ତ୍ରଶସ୍ତ୍ର ପ୍ରଦର୍ଶନ କରାଯାଏ, ଅଭିବାଦନ ଦିଆଯାଏ। ଆମେ କହିଥିଲୁ ଯେ, ଯେତେବେଳେ ଆମେ ତ୍ରିରଙ୍ଗା ଉତ୍ତୋଳନ କରୁ, ଶତ୍ରୁ ଦେଶର ବନ୍ଧୁକ ମଧ୍ୟ ଆମକୁ ଅଭିବାଦନ ଜଣାଉଛି। ଯେଉଁମାନେ ତ୍ରିରଙ୍ଗାକୁ ଶାନ୍ତି ପ୍ରତି ବିପଦ ବୋଲି କହୁଥିଲେ, ସେମାନେ ମଧ୍ୟ ତିରଙ୍ଗା ଯାତ୍ରାରେ ଭାଗ ନେଉଛନ୍ତି। ଶ୍ରୀନଗରରେ ଆଜି ସିନେମା ହଲ ହାଉସ୍ଫୁଲ୍ ଚାଲିଛି।
