ନୂଆଦିଲ୍ଲୀ,୧୮ ।୧୦: ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ମଙ୍ଗଳବାର ରାଜଧାନୀ ଦିଲ୍ଲୀର ପ୍ରଗତି ମୈଦାନରେ ୯୦ତମ ଇଣ୍ଟରପୋଲ ମହାସଭାର ଉଦ୍ଘାଟନ କରିବେ । ଏହାପରେ ମୋଦି ମହାସଭାରେ ଭାଗ ନେଇଥିବା ୧୯୫ ଦେଶର ପ୍ରତିନିଧିଙ୍କୁ ସମ୍ବୋଧିତ କରିବେ ।
ଏହି କାର୍ଯ୍ୟକ୍ରମରେ ପାକିସ୍ତାନୀ ପ୍ରତିନିଧି ବି ସାମିଲ ହେବେ । ଭାରତରେ ଏହି ଇଣ୍ଟରପୋଲ ମହାସଭା ୨୫ ବର୍ଷ ପରେ ଆୟୋଜିତ ହେଉଛି । ଏହି ମହାସଭା ୧୮-୨୧ ଅକ୍ଟୋବର ପର୍ଯ୍ୟନ୍ତ ଚାଲିବ । କାର୍ଯ୍ୟକ୍ରମରେ ଇଣ୍ଟରପୋଲ କାମର ସମିକ୍ଷା କରାଯିବ । ଏହାସହ ଭବିଷ୍ୟତର ଅପରାଧିକ ଚ୍ୟାଲେଞ୍ଜ, ଆନ୍ତର୍ଜାତୀୟ ଗ୍ୟାଙ୍ଗକୁ ଦମନ କରିବାର ରଣନୀତି ସହିତ ଅନେକ ଗୁରୁତ୍ୱପୂର୍ଣ୍ଣ ପ୍ରସଙ୍ଗ ଉପରେ ଆଲୋଚନା କରାଯିବ । ଏହି ମହାସଭା ବର୍ଷକରେ ଥରେ ଆୟୋଜିତ ହୋଇଥାଏ ।
ମିଳିଥିବା ସୂଚନା ଅନୁଯାୟୀ, ପ୍ରଧାନମନ୍ତ୍ରୀ ମଙ୍ଗଳବାର ଦିନ ୧ଟା ୪୫ରେ ମହାସଭାକୁ ସମ୍ବୋଧିତ କରିବେ । ଏହି ସମୟରେ ସ୍ୱରାଷ୍ଟ୍ର ମନ୍ତ୍ରୀ ଅମିତ ଶାହା, ଇଣ୍ଟରପୋଲର ଅଧ୍ୟକ୍ଷ ଅହମଦ ନାସର ଅଲ ରଇସି ଓ ତାଙ୍କ ମହାସଚିବ ଜର୍ଗନ ଷ୍ଟକ ବି ଉପସ୍ଥିତ ରହିବେ । ଭାରତର ୭୫ତମ ସ୍ୱାଧିନତା ଦିବସ ଅବସରରେ ଇଣ୍ଟରପୋଲ ମହାସଭାର ଆୟୋଜନ କରାଯାଇଛି । ଏହା ପୂର୍ବରୁ ଭାରତରେ ଶେଷ ଥର ପାଇଁ ୧୯୯୭ରେ ଏହି ମହାସଭା ଆୟୋଜିତ ହୋଇଥିଲା ।