ନୂଆଦିଲ୍ଲୀ,୯।୫: ବୁଧବାର ଅର୍ଥାତ୍ ମେ ୧୦ରେ ହେବାକୁ ଯାଉଛି କର୍ନାଟକ ବିଧାନସଭା ନିର୍ବାଚନ। ରାଜ୍ୟରେ ୩୮ବର୍ଷ ଧରି ଚାଲିଆସୁଥିବା ବିରୋଧୀ ଲହରକୁ ଭାଙ୍ଗି ଲଗାତାର ଦ୍ୱିତୀୟ ଥର ବିଜୟୀ ହେବାକୁ ଶାସକ ଭାରତୀୟ ଜନତା ପାର୍ଟି(ଭାଜପା) ଲକ୍ଷ୍ୟ ରଖିଛି। ଏହି ସମୟରେ କର୍ନାଟକ ବିଧାନସଭା ର୍ନିବାଚନର ଗୋଟିଏ ଦିନ ପୂର୍ବରୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ରାଜ୍ୟବାସୀଙ୍କୁ ଏକ ଚିଠି ଦେଇଛନ୍ତି। ମୋଦି ଏହାକୁ ତାଙ୍କ ଅଫିସିଆଲ ଟୁଇଟର ହ୍ୟାଣ୍ଡେଲ ସହ ଶେୟାର କରିଛନ୍ତି। ଏହା ବ୍ୟତୀତ ସେ ଏକ ଭିଡିଓ ମାଧ୍ୟମରେ ଭୋଟ ଦେବାକୁ ମଧ୍ୟ ନିବେଦନ କରିଛନ୍ତି।
ପ୍ରଧାନମନ୍ତ୍ରୀ ମୋଦି ତାଙ୍କ ଚିଠିରେ ଲେଖିଛନ୍ତି, ଆପଣମାନେ ମୋତେ ସର୍ବଦା ଭଲପାଇବା ଏବଂ ସ୍ନେହରେ ବାନ୍ଧି ରଖିଛନ୍ତି। ଏହା ମୋ ପାଇଁ ଏକ ଈଶ୍ୱରୀୟ ଆଶୀର୍ବାଦ ପରି ଲାଗୁଛି । ‘ସ୍ବାଧିନତାର ଅମୃତକାଳ’ରେ ଆମେ ଭାରତୀୟମାନେ ଆମର ପ୍ରିୟ ଦେଶକୁ ଏକ ବିକଶିତ ରାଷ୍ଟ୍ର କରିବା ପାଇଁ ଲକ୍ଷ୍ୟ ରଖିଛୁ। କର୍ନାଟକ ଏହାର ଦୂରଦୃଷ୍ଟି ସାକାର କରିବାକୁ ଏହି ଆନ୍ଦୋଳନକୁ ଆଗେଇ ନେବାକୁ ଆଗ୍ରହୀ ।
ଭାରତ ହେଉଛି ପଞ୍ଚମ ବୃହତ୍ତମ ଅର୍ଥନୀତି। ଆମର ପରବର୍ତ୍ତୀ ଲକ୍ଷ୍ୟ ହେଉଛି ଶୀର୍ଷ ତିନିରେ ପହଞ୍ଚିବା । ଏହା ସମ୍ଭବ ଯେତେବେଳେ କର୍ନାଟକ ଦ୍ରୁତ ଗତିରେ ୧ ଟ୍ରିଲିୟନ ଡଲାରର ଅର୍ଥନୀତିରେ ପହଞ୍ଚିବ। ସେ ତାଙ୍କ ଚିଠିରେ କର୍ନାଟକବାସୀଙ୍କ ପ୍ରତି ଦଳର ପ୍ରତିବଦ୍ଧତା ଉପରେ ଆଲୋକପାତ କରିଛନ୍ତି।
