ନୂଆଦିଲ୍ଲୀ,୯।୧୨: ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଅଧ୍ୟକ୍ଷତାରେ ଅନୁଷ୍ଠିତ କେନ୍ଦ୍ର କ୍ୟାବିନେଟରେ ଗ୍ରାମ୍ୟ ଉନ୍ନୟନ ବିଭାଗର ପ୍ରସ୍ତାବକୁ ମଞ୍ଜୁରୀ ପ୍ରଦାନ କରାଯାଇ ମାର୍ଚ୍ଚ ୨୦୨୧ ପରେ ମଧ୍ୟ ଜାରି ରଖିବାକୁ ନିଷ୍ପତ୍ତି ଗ୍ରହଣ କରାଯାଇଛି। ପର୍ଯ୍ୟନ୍ତ ପ୍ରଧାନମନ୍ତ୍ରୀ ଆୱାସ ଯୋଜନା-ଗ୍ରାମିନ (ପିଏମ୍ଏଓ୍ବାଇ-ଜି ) ଜାରି ରଖିବା ପ୍ରସ୍ତାବକୁ ଅନୁମୋଦନ କରାଯାଇଛି। ମିଳିଥିବା ସୂଚନା ଅନୁଯାୟୀ, ୨.୯୫ କୋଟି ଘର ନିର୍ମାଣ ଲକ୍ଷ୍ୟ ଅନ୍ତର୍ଗତ ଅବଶିଷ୍ଟ ୧୫୫.୭୫ ଲକ୍ଷ ଘର ତିଆରି ପାଇଁ ଆର୍ଥିକ ସହାୟତା ଯୋଗାଇ ଦିଆଯିବ। ସମ୍ପ୍ରତି କ୍ୟାବିନେଟ ଅନୁମୋଦନ ଅନୁଯାୟୀ ଗୃହ ନିର୍ମାଣ କାର୍ଯ୍ୟ ମାର୍ଚ୍ଚ ୨୦୨୪ ପର୍ଯ୍ୟନ୍ତ ଜାରି ରହିବ।
ଏହି ପରିପ୍ରେକ୍ଷୀରେ ଗ୍ରାମ୍ୟ ଉନ୍ନୟନ ମନ୍ତ୍ରଣାଳୟ କହିଛି ଯେ ପିଏମ୍ଏଓ୍ବାଇ-ଜି ଅନ୍ତର୍ଗତ ଗ୍ରାମାଞ୍ଚଳରେ ୨.୯୫ କୋଟି ଘର ଧାର୍ଯ୍ୟ ହାସଲ କରିବା ପାଇଁ ଅବଶିଷ୍ଟ ୧୫୫.୭୫ ଲକ୍ଷ ନିର୍ମାଣ ପାଇଁ ମୋଟ ୨,୧୭,୨୫୭ କୋଟି ଟଙ୍କାର ବ୍ୟୟ ଅଟକଳ କରାଯାଇଥିଲା। ସେଥିମଧ୍ୟରୁ କେନ୍ଦ୍ର ସରକାର ୧,୨୫,୧୦୬ କୋଟି ଟଙ୍କା ଯୋଗାଇ ଦେଉଥିବାବେଳେ ରାଜ୍ୟ ସରକାର ୭୩,୪୭୫ କୋଟି ଟଙ୍କା ଯୋଗାଇଦେବେ। ଅପରପକ୍ଷରେ, ସୁଧ ବାବଦରେ ନାବାର୍ଡକୁ ୧୮,୬୭୬ କୋଟି ଟଙ୍କା ପରିଶୋଧ କରିବାର ଅତିରିକ୍ତ ଆବଶ୍ୟକତା ରହିଛି ।
ମନ୍ତ୍ରଣାଳୟ କହିଛି ଯେ ମୋଟ ବଜେଟ ସହାୟତା (ଜିବିଏସ) ମାଧ୍ୟମରେ ସମଗ୍ର ଯୋଜନା ପାଇଁ ଅର୍ଥ ବ୍ୟବସ୍ଥା କରିବା, ନିମନ୍ତେ ପର୍ଯ୍ୟାୟ କ୍ରମେ ଅର୍ଥ ମନ୍ତ୍ରଣାଳୟର ଇବିଆର୍ ପରାମର୍ଶ ନିଆଯିବ।
ପିଏମ୍ଏଓ୍ବାଇ-ଜି ଅନ୍ତର୍ଗତ ୨.୯୫ କୋଟି ଘର ନିର୍ମାଣ ଲକ୍ଷ୍ୟ ଧାର୍ଯ୍ୟ ହୋଇଛି। ୨୯ ନଭେମ୍ବର ୨୦୨୧ ପର୍ଯ୍ୟନ୍ତ ୧.୬୫ କୋଟି ଘର ନିର୍ମିତ ହୋଇଛି। ତେଣୁ, ଅନୁମାନ କରାଯାଇଛି ଯେ ଏସ୍ଇସିସି ୨୦୧୧ ଡାଟାବେସ ଉପରେ ଆଧାରିତ ୨.୦୨ କୋଟି ଘର ନିର୍ମାଣ କାର୍ଯ୍ୟ, ୨୦୨୨ ଅଗଷ୍ଟ ୧୫ ସୁଦ୍ଧା ସମ୍ପୂର୍ଣ୍ଣ ହେବ। ତେଣୁ ୨.୯୫ କୋଟି ଘରର ସାମଗ୍ରିକ ଲକ୍ଷ୍ୟ ହାସଲ କରିବାକୁ ମାର୍ଚ୍ଚ ୨୦୨୪ ପର୍ଯ୍ୟନ୍ତ ଏହି ଯୋଜନା ଜାରି ରଖିବା ଆବଶ୍ୟକ ବୋଲି କ୍ୟାବିନେଟ୍ରେ କୁହାଯାଇଛି।