ଭୁବନେଶ୍ବର,୪।୨(ବ୍ୟୁରୋ): ପ୍ରଧାନମନ୍ତ୍ରୀ ଗରିବ କଲ୍ୟାଣ ଅନ୍ନ ଯୋଜନା(ପିଏମ୍ଜିକେଏୱାଇ)ରେ ପ୍ରତ୍ୟେକ ବ୍ୟକ୍ତିଙ୍କ ପାଇଁ ୫ କିଲୋଗ୍ରାମ ଚାଉଳ ବ୍ୟତୀତ ଅତିରିକ୍ତ ଭାବେ ଆଉ ୫ କିଲୋଗ୍ରାମ ମାଗଣା ଚାଉଳ ଯୋଗାଇ ଦିଆଯାଉଥିଲା। ଏହାକୁ କେନ୍ଦ୍ର ସରକାର ବନ୍ଦ କରିବା ଦ୍ୱାରା ଗରିବ ଏବଂ କୃଷକ ପରିବାରଙ୍କ ଖାଦ୍ୟ ସୁରକ୍ଷା ପ୍ରଭାବିତ ହେବ। ତେଣୁ କେନ୍ଦ୍ର ସରକାର ତୁରନ୍ତ ପିଏମ୍ଜିକେଏୱାଇରେ ଗରିବ ଲୋକଙ୍କୁ ଚାଉଳ ଯୋଗାଇଦେଉ ବୋଲି ବିଜେଡି ପକ୍ଷରୁ ଦାବି କରାଯାଇଛି।
ବିଜୁ ଯୁବ ଜନତା ଦଳ ରାଜ୍ୟ କାର୍ଯ୍ୟାଳୟଠାରେ ଶୁକ୍ରବାର ଆୟୋଜିତ ଖବରଦାତା ସମ୍ମିଳନୀରେ ବିଜେଡି ବିଧାୟକ ଦେବୀପ୍ରସାଦ ମିଶ୍ର କହିଛନ୍ତି, ନିକଟରେ ଆଗତ କେନ୍ଦ୍ର ବଜେଟରେ ୨୦୨୧-୨୨ରେ କେନ୍ଦ୍ର ଖର୍ଚ୍ଚ କରିଥିବା ପରିମାଣ ତୁଳନାରେ ଖାଦ୍ୟ ସବ୍ସିଡିରେ ପ୍ରାୟ ୭୧,୦୦୦ କୋଟି ଟଙ୍କା ହ୍ରାସ ପାଇଛି। ଏହି ହ୍ରାସ ମୁଖ୍ୟତଃ ପିଏମ୍ଜିକେଏୱାଇ ବନ୍ଦ ଯୋଗୁ ହୋଇଛି। ଏହା ଦ୍ୱାରା ଗରିବ ଲୋକେ ପ୍ରଭାବିତ ହେବେ। ୨୦୨୧-୨୨ ତୁଳନାରେ ଖାଦ୍ୟ ସାମଗ୍ରୀ କିଣିବାରେ କେନ୍ଦ୍ର ଚଳିତ ବଜେଟରେ ପ୍ରାୟ ୨୦,୦୦୦ କୋଟି ଟଙ୍କା ହ୍ରାସ କରିଛି। ଏହା ପୁଣି ପିଏମ୍ଜିକେଏୱାଇ ବନ୍ଦ ହେବା ଏବଂ କୃଷକଙ୍କ ଠାରୁ କ୍ରୟ ହ୍ରାସ ଯୋଗୁ ହୋଇଛି। କ୍ରୟ ହ୍ରାସ କାରଣରୁ କୃଷକମାନେ ଖାଦ୍ୟଶସ୍ୟ ବିକ୍ରି ପାଇଁ ସର୍ବନିମ୍ନ ସହାୟକ ମୂଲ୍ୟ (ଏମ୍ଏସ୍ପି) ପାଇବାକୁ ମଧ୍ୟ ବଞ୍ଚିତ ହେବେ। ଗରିବ ଏବଂ କୃଷକଙ୍କ ସ୍ବାର୍ଥକୁ ଦୃଷ୍ଟିରେ ରଖି ପିଏମ୍ଜିକେଏୱାଇ କାର୍ଯ୍ୟକ୍ରମକୁ ପୁନଃ ଆରମ୍ଭ କରିବାକୁ ଆମେ କେନ୍ଦ୍ରକୁ ନିବେଦନ କରୁଛୁ ବୋଲି ଦେବୀ କହିଛନ୍ତି। ସେ ଆହୁରି କହିଛନ୍ତି, ଭାଜପା ଏମ୍ପିମାନେ କେନ୍ଦ୍ରରେ ସେମାନଙ୍କ ଦଳ ନେତୃତ୍ୱରେ ଥିବା ସରକାରଙ୍କ ସମ୍ମୁଖରେ ଏହି ପ୍ରସଙ୍ଗ ଉଠାନ୍ତୁ।
ବିଜେଡି ଖବରଦାତା ସମ୍ମିଳନୀ ଉପରେ ପ୍ରତିକ୍ରିୟା ରଖି ଭାଜପା ନେତା ଦିଲୀପ ମଲିକ କହିଛନ୍ତି, ସତ୍ୟକୁ ବିଜେଡି ଭୟ କରୁଛି। ଏନେଇ ବିଜେଡିର ମନ୍ତ୍ରୀ, ବିଧାୟକ ଓ ନେତା ମିଥ୍ୟା ତଥ୍ୟ ରଖି ରାଜ୍ୟବାସୀଙ୍କୁ ଭୁଆଁ ବୁଲାଉଛନ୍ତି। ୨୩ ବର୍ଷ ଶାସନରେ ବିଜେଡି ଓଡ଼ିଶାର ଚାଷୀକୁଳକୁ କୌଣସି ସୁବିଧା ଯୋଗାଇ ନାହିଁ। କିନ୍ତୁ ବିଜେଡିର ବରିଷ୍ଠ ନେତା ଦେବୀ ମିଶ୍ର ତାଙ୍କର ସତ୍ୟ ଅନୁଭବକୁ ପ୍ରକାଶ ନ କରି ରାଜନୈତିକ ବାଧ୍ୟବାଧକତା ଯୋଗୁ ପ୍ରଶାସନିକ ଅଧିକାରୀମାନେ ଦେଉଥିବା ଚିଠାକୁ ଗଣମାଧ୍ୟମ ଆଗରେ ପଢ଼ୁଛନ୍ତି ବୋଲି ଦିଲୀପ କହିଛନ୍ତି।