ନୂଆଦିଲ୍ଲୀ,୧୯।୭: ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ମାଇକ୍ରୋ ବ୍ଲଗିଙ୍ଗ ସାଇଟ୍ ଟୁଇଟରରେ ଆଉ ଏକ ସଫଳତା ପାଇଛନ୍ତି। ବେଳକୁ ବେଳ ଟୁଇଟରରେ ମୋଦିଙ୍କ ଲୋକପ୍ରିୟତା ବଢିବାରେ ଲାଗିଛି। ଏବେ ମୋଦିଙ୍କୁ ଟୁଇଟରରେ ପାଖାପାଖି ୬୦ ମିଲିୟନ ବା ୬ କୋଟି ଲୋକ ଫଲୋ କରୁଛନ୍ତି। ହେଲେ ମୋଦି କେବଳ ୨,୩୩୫ ଜଣଙ୍କୁ ଫଲୋ କରୁଥିବା ଜଣାପଡିଛି। ଏହାପୂର୍ବରୁ ସେପ୍ଟେମ୍ବର ୨୦୧୯ରେ ମୋଦିଙ୍କ ଫଲୋୟର୍ସଙ୍କ ସଂଖ୍ୟା ଥିଲା ୫ କୋଟି। ଆଉ ମାତ୍ର ୧୦ ମାସ ଭିତରେ ଏହି ସଂଖ୍ୟା ୧ କୋଟି ବୃଦ୍ଧି ଘଟିଛି। ପ୍ରଧାନମନ୍ତ୍ରୀ ମୋଦି ଟୁଇଟରରେ ବେଶ୍ ଆକ୍ଟିଭ। ସେ ଟୁଇଟର ମାଧ୍ୟମରେ ଦେଶବାସୀଙ୍କ ସହ ଯୋଡି ହେବା ଓ ବିଭିନ୍ନ ଗୁରୁତ୍ୱପୂର୍ଣ୍ଣ ଘୋଷଣା ମଧ୍ୟ କରିଥାଆନ୍ତି। ବିଶ୍ୱର ଯେଉଁ ନେତାମାନଙ୍କୁ ସୋସିଆଲ ମିଡିଆରେ ଅଧିକ ଫଲୋ କରାଯାଏ ସେଥିମଧ୍ୟରୁ ମୋଦି ଅନ୍ୟତମ। ୨୦୦୯ରେ ମୋଦି ଟୁଇଟରରେ ଯୋଗଦେଇଥିବା ବେଳେ କଂଗ୍ରେସ ନେତା ଶଶି ଥରୁର ମଧ୍ୟ ସେହି ସମୟରେ ଟୁଇଟରରେ ଯୋଗ ଦେଇଥିଲେ। ହେଲେ ଏବେ ମୋଦି ଥରୁରଙ୍କୁ ବହୁ ପଛରେ ପକାଇ ଦେଇଛନ୍ତି। ସେହିପରି ସ୍ବରାଷ୍ଟ୍ରମନ୍ତ୍ରୀ ଅମିତ ଶାହା ୨୦୧୩ରେ ଟୁଇଟରରେ ଯୋଗ ଦେଇଥିବା ବେଳେ ଏବେ ତାଙ୍କୁ ପ୍ରାୟ ୧୬ ଲକ୍ଷ ଲୋକ ଫଲୋ କରୁଛନ୍ତି।