ଛତ୍ରପୁର/ଗଞ୍ଜାମ(ଡି.ଏନ.ଏ)/ବ୍ରହ୍ମପୁର ଅଫିସ,୩।୮: ଗଞ୍ଜାମ ବ୍ଲକ ପାଳିବନ୍ଧ ପଞ୍ଚାୟତର ପୋଡମପେଟା ଗାଁ ଗଞ୍ଜାମ ମାନଚିତ୍ରରୁ ଲିଭିଯିବାକୁ ବସିଛି। ଦିନକୁ ଦିନ ସମୁଦ୍ର କୂଳ ଖାଉଥିବାରୁ ଏହି ଆଶଙ୍କା ଦେଖାଦେଇଛି ା ପୂର୍ବରୁ ସମୁଦ୍ର ଗାଁଠାରୁ ୨ କି.ମି. ଦୂରରେ ଥିବା ବେଳେ ବାରମ୍ବାର ଲଘୁଚାପ ବାତ୍ୟାରେ ଅଶାନ୍ତ ହୋଇ ଏବେ ଗାଁ ନିକଟବର୍ତ୍ତୀ ହେବାରେ ଲାଗିଛି।ତୁରନ୍ତ ରାଜ୍ୟ ସରକାର ଏବଂ ଜିଲା ପ୍ରଶାସନ ଏଥିପ୍ରତି ଦୃଷ୍ଟି ଦେବା ଆବଶ୍ୟକ ବୋଲି ଅଞ୍ଚଳବାସୀ କହିଛନ୍ତି। ସମୁଦ୍ରର ଉଚ୍ଚ ଲହଡି ମାଡ଼ରେ ପୋଡମପେଟାର ଗୋଟିଏ ପରେ ଗୋଟିଏ ଘର ଭୁଶୁଡି ସମୁଦ୍ର ଗର୍ଭରେ ଲୀନ ହେଉଛି। ପୂର୍ବରୁ ଏହି ଗାଁର ୩ଟି ସାହିର ୩୦ରୁ ଉର୍ଦ୍ଧ୍ୱ ଘର ଉଚ୍ଚ ଜୁଆରରେ ଭାଙ୍ଗି ସମୁଦ୍ରରେ ଲୀନ ହୋଇଯାଇଛି। ଗତ ଦୁଇ ମାସ ମଧ୍ୟରେ ଗାଁର ଆଉ ୨ଟି ସାହି ସମୁଦ୍ର ମଧ୍ୟକୁ ଚାଲିଯାଇଛି। ଏକଦା ଉକ୍ତ ଗାଁରେ ୫୦୦ରୁ ଉର୍ଦ୍ଧ୍ୱ ପରିବାର ବସବାସ କରିଆସୁଥିଲେ। ସମସ୍ତେ ମତ୍ସ୍ୟଜୀବୀ ପରିବାର। ସମୁଦ୍ରରେ ମାଛ ମାରିଲେ ଏମାନେ ପେଟ ପୋଷିଥାନ୍ତି। ହେଲେ ସମୁଦ୍ର ଗାଁ ମୁହଁା ହେବା ଏବଂ ଗୋଟିଏ ଘର ଏବେ ଗାଁରେ ମାତ୍ର ୩ ଟି ପରିବାର ଥିବାବେଳେ ସମ୍ପୂର୍ଣ୍ଣ ଗାଁ ଖାଁ ଖାଁ ହୋଇଛି।
ଗ୍ରାମଦେବୀଙ୍କ ରୋଷରୁ ଏପରି ହେଉଛି
ଗ୍ରାମଦେବତୀ ମା’ ପୋଲାମ୍ମା ଠାକୁରାଣୀଙ୍କ ପୂଜା ବନ୍ଦ ହେବାଠାରୁ ତାଙ୍କ ରୋଷ କାରଣରୁ ପୋଡମପେଟା ଗାଁ ସମୁଦ୍ର ଗର୍ଭରେ ଲୀନ ହେଉଥିବା ମହିଳା ପୂଜାରୀ ସିଏଚ୍. ପାଇଣ୍ଡି କହିଛନ୍ତି। ସମୁଦ୍ର କୂଳ ଖାଇ ଜନବସତି ଆଡକୁ ମୁହଁା ହେଉଥିବାରୁ ଲୋକେ ଅନ୍ୟତ୍ର ଚାଲି ଯାଇ ଥଇଥାନ ହେଲେ। ହେଲେ ଗ୍ରାମଦେବତୀଙ୍କୁ ସାଙ୍ଗରେ ନେବାକୁ ଭୁଲି ଯାଇଥିଲେ। ମରିଯିବି ପଛେ ଏହି ଗାଁରୁ ଗ୍ରାମଦେବତୀଙ୍କୁ ସାଥୀରେ ନ ନେଇ ଫେରିବିନି। ଯେ ପର୍ଯ୍ୟନ୍ତ ପୋଲାମା ଠାକୁରାଣୀ ଗାଁରେ ଅଛନ୍ତି ସେ ପର୍ଯ୍ୟନ୍ତ ପୁରା ଗାଁକୁ ସମୁଦ୍ର ନିଶ୍ଚିହ୍ନ କରିପାରିବନି ବୋଲି ସେ କହିଛନ୍ତି।
– ସିଏଚ୍.ପାଇଣ୍ଡି
ଘର ନ ଛାଡ଼ି ଯିବିନାହିଁ
ପୂର୍ବରୁ ଏହି ସମୁଦ୍ର କୂଳରେ ରହି ଜୀବିକା ଅର୍ଜନ କରୁଥିଲୁ। ବର୍ତ୍ତମାନ ସମୁଦ୍ର କୂଳ ଲଂଘୁଥିବାରୁ ପ୍ରଶାସନ ଆମକୁ ଏହି ଅଞ୍ଚଳରୁ ଉଠାଇଦେଇଛି। କିନ୍ତୁ ମୁଁ ଏହି ଘର ଛାଡି ଯିବିନି। ଏଭଳି ଭାବେ ଗମ୍ଭୀର ସ୍ବରରେ ବୟସ୍କା ବୃଦ୍ଧା ବି. ଆଉଟି କହିଛନ୍ତି। ଆମର ପୂର୍ବ ପୁରୁଷ ଏଠାରେ ରହି ମାଛ ମାରୁଥିଲେ। ମୁଁ ଏହି ଘର ଛାଡିବିନି। ସମୁଦ୍ର ଆମ ଦେବତା। ଏଣୁ ସମୁଦ୍ରକୁ ଛାଡି ମୁଁ କୁଆଡେ ଯିବିନି। ଏହି ଘର ମଧ୍ୟରେ ଲକ୍ଷାଧିକ ଟଙ୍କାର ଜାଲ ରହିଛି। ପୁଅମାନେ ଏଠାକୁ ଆସି ମାଛ ଧରୁଛନ୍ତି।
– ବି.ଆଉଟି
ସରକାର ସ୍ଥାୟୀ ପ୍ରତିକାର କରନ୍ତୁ
ମସତ୍ୟଜୀବୀଙ୍କ ଘର ସମୁଦ୍ରରେ ମିଶିଯାଇଛି। ଏଠାର ସ୍ଥାନୀୟ ଅଞ୍ଚଳବାସୀଙ୍କ ଚାଷ ଜମି ମଧ୍ୟ ପ୍ରଭାବିତ ହୋଇଛି ା ଏଥିସହ ମୟରପଦା, କଣ୍ଟିଆଗଡ ଓ ନୀଳାଦ୍ରିପୁର ଗାଁର କାଜୁ ଜଙ୍ଗଲ ନଷ୍ଟ ହେଉଛି ା ଏଣୁ ରାଜ୍ୟ ସରକାର ସ୍ଥାୟୀ ପ୍ରତିକାର ବ୍ୟବସ୍ଥା କରିବାକୁ ପୂର୍ବତନ ସରପଞ୍ଚ ଦିଲୀପ ଛୋଟରାୟ କହଛନ୍ତି।
ଦିଲୀପ କୁମାର ଛୋଟରାୟ
୧୨ ଗ୍ରାମବାସୀ ଭୟଭୀତ
ସମୁଦ୍ର କୂଳ ଖାଉଥିବାରୁ ପୋଡମପେଟା ଗାଁ ନିଶ୍ଚିହ୍ନ ହେବାକୁ ବସିଲାଣି। ନିକଟରେ ଥିବା ୧୨ ଖଣ୍ଡ ଗାଁ ପ୍ରତି ମଧ୍ୟ ବିପଦ ମାଡି ଆସୁଛି।ଏନେଇ ଉକ୍ତ ଗାଁ ଗୁଡିକର ଲୋକେ ଭୟଭୀତ ଅବସ୍ଥାରେ ଅଛନ୍ତି। ଏଣୁ ଜିଲା ପ୍ରଶାସନ ଓ ରାଜ୍ୟ ସରକାର ତୁରନ୍ତ ଏକ ପଥର ବନ୍ଧ ନିର୍ମାଣ କରନ୍ତୁ। ଯାହାଫଳରେ ୧୨ ଟି ଗାଁବାସୀଙ୍କ ଭୟ ଓ ପୋଡମପେଟା ଗାଁକୁ ସମୁଦ୍ରରେ ମିଶିବାକୁ ରୋକାଯାଇପାରିବ ା ଏଥିସହ ସ୍ଥାୟୀ ପ୍ରତିକାର କରିବାକୁ କଣ୍ଟିଆଗଡ ଗାଁର ଶିବରାମ ପଲେଇ କହିଛନ୍ତି। ଆମକୁ ବିସ୍ଥାପିତ କରିବ ବୋଲି ପ୍ରଶାସନ କହୁଛି। ମାତ୍ର କାଜୁ ଜଙ୍ଗଲ ଉପରେ ନିର୍ଭର କରି ବଞ୍ଚୁଛୁ। ଏଣୁ କିଭଳି ଆମେ ଏହା ଛାଡି ଯିବୁ ବୋଲି ସେ ପ୍ରଶ୍ନ କରିଛନ୍ତି।
ଶିବରାମ ପଲେଇ
ଫାଇଲିନ୍ କ୍ଷତିପୂରଣ ମିଳିନି
ଫାଇଲିନ୍ ବାତ୍ୟା ରେ ବହୁ ଡଙ୍ଗା ଓ ଜାଲ ନଷ୍ଟ ହୋଇଥିଲା। ଏନେଇ ସର୍ଭେ ମଧ୍ୟ ହୋଇଛି ଏବଂ କ୍ଷତିପୂରଣ ଦେବାକୁ ପ୍ରତିଶ୍ରୁୃତି ମିଳିଥିଲା। ମାତ୍ର ଏଯାବତ କ୍ଷତି ପୂରଣ ମିଳିନଥିବା ପୂର୍ବତନ ୱାର୍ଡମେମ୍ବର ଏଲ. ଆସରିଗା କହିଛନ୍ତି।
ଏଲ. ଆସରିଗା
ପାଣି ସମସ୍ୟା ଲାଗି ରହିଛି
ପୋଡମପେଟା ଓଡିଆରପି କଲୋନୀ-୨ ରେ ପାଣି ସମସ୍ୟା ଲାଗି ରହିଛି। ଗତ ୧୦ ଦିନ ହେଲା ସମସ୍ୟା ଆହୁରି ଉକତ୍ଟ ହୋଇଛି। ଏଠାରେ ଉଭରହେଡ ଟ୍ୟାଙ୍କ ନିର୍ମାଣ କରି ପାଣି ଗଛିତ ରଖି ଯୋଗାଣ କରିବାକୁ ଏଠାର ବାସିନ୍ଦା ସିଏଚ୍. ଗାରେୟା କହିଛନ୍ତି।
ସିଏଚ୍. ଗାରେୟା
ଆଦର୍ଶ କଲୋନୀ ସ୍ଥାପନ ଯୋଜନା
ସମୁଦ୍ର କୂଳ ଲଂଘୁଥିବା ଏବଂ ଜନବସତି ପ୍ରତି ବିପଦ ଥିବାରୁ ଏକ ଆଦର୍ଶ କଲୋନୀ କରାଯିବା ପାଇଁ ଜିଲା ପ୍ରଶାସନ ପକ୍ଷରୁ ଏକ ପ୍ଲାନ କରାଯାଇଛି ବୋଲି ଜିଲାପାଳ ଦିବ୍ୟଜ୍ୟୋତି ପରିଡା କହିଛନ୍ତି।
ଦିବ୍ୟଜ୍ୟୋତି ପରିଡ଼ା,ଜିଲାପାଳ, ଗଞ୍ଜାମ