ଭୁବନ, ୩।୧(ଡି.ଏନ.ଏ.): ଢେଙ୍କାନାଳ ଜିଲା ଭୁବନ ବରିଷ୍ଠ ନାଗରିକ ସଭାଗୃହରେ ରବିବାର ଆଞ୍ଚଳିକ ସାହିତ୍ୟ କଳାସେବା ପରିଷଦର ସାରସ୍ବତ ସମାବେଶ ଓ କବିତା ପାଠୋତ୍ସବ ଅନୁଷ୍ଠିତ ହୋଇଯାଇଛି। ବରିଷ୍ଠ ସାହିତି୍ୟକ ତଥା ବରିଷ୍ଠ ପ୍ରଶାସକ ହରିଶ ଚନ୍ଦ୍ର ବେହେରା ଏହାକୁ ଉଦ୍ଘାଟନ କରି କହିଲେ, ସମକାଳୀନ ସମାଜର ସମସ୍ୟା ସମାଧାନ କରିବାରେ ସାହିତି୍ୟକଙ୍କ ଭୂମିକା ଗୁରୁତ୍ୱପୂର୍ଣ୍ଣ। ତୋଷାମତ ଛାଡ଼ି ନିର୍ଭୀକ ଭାବେ କଲମ ଚଳାଇବା ପାଇଁ ସେ ପରାମର୍ଶ ଦେଇଥିଲେ।
ମୁଖ୍ୟବକ୍ତା ଭାବେ ଓଡ଼ିଶା ସାହିତ୍ୟ ଏକାଡେମୀର ସାଧାରଣ ପରିଷଦ ସଦସ୍ୟ ପ୍ରଫେସର ଡ. ବିବେକାନନ୍ଦ ପାଣିଗ୍ରାହୀ କହିଲେ, ଭୁବନ ଶାସନର କେଶବ ମିଶ୍ରଙ୍କ ଜ୍ୟୋତିଷ ଶିକ୍ଷା ପୁସ୍ତକ ଏବେ ବି ଚହଳ ସୃଷ୍ଟି କରୁଛି। ସେହିପରି ଗଡ଼ଜାତ ପ୍ରଜା ଆନ୍ଦୋଳନରେ ପଣ୍ଡିତ ଗଙ୍ଗାଧର ମିଶ୍ର, ପଣ୍ଡିତ ପଦ୍ମନାଭ ମିଶ୍ର, ନାଟ୍ୟକାର ପୀତାମ୍ବର ମିଶ୍ର, ସାହିତି୍ୟକ କୃପାସାଗର ସାହୁ, ଶାଳବଣର କବି ଗିରୀଶ ଚନ୍ଦ୍ର ନନ୍ଦଙ୍କ ଅବଦାନ ଅନସ୍ବୀକାର୍ଯ୍ୟ। ସ୍ବାଧୀନତା ସଂଗ୍ରାମରେ ଶହୀଦ ବାଜି ରାଉତଙ୍କ ବଳିଦାନ ଏହି ମାଟିକୁ ଗୌରବାନ୍ବିତ କରିଛି। ଏହି ଧାରା ଆଗକୁ ନେବାକୁ ସେ ପରାମର୍ଶ ଦେଇଥିଲେ। ସମ୍ମାନିତ ଅତିଥି ଭାବେ ଭୁବନ ମହିଳା କଲେଜର ଅଧ୍ୟକ୍ଷ ଦିଲୀପ ଦାସ, ନବ ନିର୍ମାଣ କୃଷକ ସମାଜ ସଭାପତି ବିପ୍ରବର ସାହୁ, ସାହିତି୍ୟକ ଡା. ରବୀନ୍ଦ୍ର କୁମାର ସାହୁ, ଓଡ଼ିଶା ବିକାଶ ପରିଷଦର ଆବାହକ ରାଜନାରାୟଣ ତ୍ରିପାଠୀ ପ୍ରମୁଖ ଯୋଗଦେଇ ଢେଙ୍କାନାଳର ସାରସ୍ବତ ସାଧକଙ୍କ ରଚନାବଳୀଙ୍କୁ ନେଇ ଏକ ପୁସ୍ତକ ପ୍ରକାଶ କରିବାକୁ ମତବ୍ୟକ୍ତ କରିଥିଲେ।
ଅନୁଷ୍ଠାନର ମୁଖ୍ୟ ସମ୍ପାଦକ ତଥା ବରିଷ୍ଠ ପାଲା ଗାୟକ ଅଶୋକ କୁମାର ସାମଲ, ଚିତ୍ରଶିଳ୍ପୀ ନାରାୟଣ ସାହୁ, ନାରୀକବି ବିଳାସିନୀ ପୃଷ୍ଟି, ବିଳାସିନୀ ମିଶ୍ରଙ୍କ ସମେତ ବହୁ କବି କବିତା ପାଠ କରିଥିଲେ। ସାହିତି୍ୟକ ପଣ୍ଡିତ ପ୍ରମୋଦ କୁମାର ମିଶ୍ର ସଭାପତିତ୍ୱ କରିଥିବାବେଳେ ସଙ୍ଗଠନ ସମ୍ପାଦକ ସୁରେନ୍ଦ୍ର କୁମାର ପୃଷ୍ଟି ଧନ୍ୟବାଦ ଅର୍ପଣ କରିଥିଲେ।