ହାଇଦ୍ରାବାଦ,୨୬।୪: ଆଇପିଏଲ ୨୦୨୪ର ୪୧ତମ ମ୍ୟାଚରେ ରୟାଲ ଚ୍ୟାଲେଞ୍ଜର୍ସ ବେଙ୍ଗାଲୁରୁ ସନରାଇଜର୍ସ ହାଇଦ୍ରାବାଦକୁ ୩୫ ରନରେ ପରାସ୍ତ କରିଛି। ଏହି ସିଜିନ୍ରେ ଏହା ଆରସିବିର ଦ୍ୱିତୀୟ ବିଜୟ ଥିଲା। ତେବେ ଏହି ବିଜୟ ସହିତ ପଏଣ୍ଟ ଟେବୁଲରେ ଏକ ବଡ ପରିବର୍ତ୍ତନ ହୋଇଛି।
ଯଦିଓ ଆରସିବି ଦ୍ୱିତୀୟ ବିଜୟ ହାସଲ କରିଛି, କିନ୍ତୁ ପଏଣ୍ଟ ଟେବୁଲରେ କୌଣସି ସୁବିଧା ପାଇନାହିଁ। ହାଇଦ୍ରାବାଦ ବିପକ୍ଷରେ ବିଜୟ ହାସଲ କରିବା ପୂର୍ବରୁ ମଧ୍ୟ ବେଙ୍ଗାଲୁରୁ ଦଳ ଦଶମ ସ୍ଥାନରେ ଥିଲା ଏବଂ ଜିତିବା ପରେ ମଧ୍ୟ ଏହା ଦଶମ ସ୍ଥାନରେ ରହିଛି। ଯଦିଓ ତାଙ୍କ ପଏଣ୍ଟ ନିଶ୍ଚିତ ଭାବରେ ୨ ରୁ ୪କୁ ବୃଦ୍ଧି ପାଇଛି। ହାରିଥିବା ହାଇଦ୍ରାବାଦ ୧୦ ପଏଣ୍ଟ ଏବଂ ନେଟ ରନ ହାର +୦.୫୭୭ ସହିତ ତୃତୀୟ ସ୍ଥାନରେ ଅଛି।
ଟପ-୪ରେ ରାଜସ୍ଥାନ ରୟାଲ୍ସ ୧୪ ପଏଣ୍ଟ ସହ ଟେବୁଲ ଟପ୍ପର ହୋଇ ରହିଛି। ଏହା ପରେ କୋଲକାତା ନାଇଟ ରାଇଡର୍ସ, ସନରାଇଜର୍ସ ହାଇଦ୍ରାବାଦ ଏବଂ ଲକ୍ଷ୍ନୌ ସୁପର ଜାଏଣ୍ଟସ ଯଥାକ୍ରମେ ୧୦ ପଏଣ୍ଟ ପାଇ ଦ୍ୱିତୀୟ, ତୃତୀୟ ଏବଂ ଚତୁର୍ଥ ସ୍ଥାନରେ ଅଛନ୍ତି । ଚେନ୍ନାଇ ସୁପର କିଙ୍ଗ୍ସ, ଦିଲ୍ଲୀ କ୍ୟାପିଟାଲ୍ସ ଏବଂ ଗୁଜ୍ରାଟ ଟାଇଟାନ୍ସର ଦଳ ଯଥାକ୍ରମେ ପଞ୍ଚମ, ଷଷ୍ଠ ଏବଂ ସପ୍ତମ ସ୍ଥାନରେ ଅଛନ୍ତି। ନେଟ ରନ ହାର ଯୋଗୁ ସମସ୍ତ ଦଳର ସ୍ଥାନରେ ପାର୍ଥକ୍ୟ ଅଛି। ଏହା ପରେ ମୁମ୍ବାଇ ଇଣ୍ଡିଆନ୍ସ ୬ ପଏଣ୍ଟ ସହ ଅଷ୍ଟମ ସ୍ଥାନରେ ରହିଛି। ତା’ପରେ ପଞ୍ଜାବ କିଙ୍ଗ୍ସ ଏବଂ ରୟାଲ ଚ୍ୟାଲେଞ୍ଜର୍ସ ବେଙ୍ଗାଲୁରୁ ଯଥାକ୍ରମେ ୪-୪ ପଏଣ୍ଟ ସହ ନବମ ଏବଂ ଦଶମ ସ୍ଥାନରେ ରହିଛି।
ହାଇଦ୍ରାବାଦ ବିପକ୍ଷରେ ଖେଳାଯାଇଥିବା ମ୍ୟାଚ୍ରେ କୋହଲି ଅର୍ଦ୍ଧଶତକ (୫୧) ଖେଳି ଅରେଞ୍ଜ କ୍ୟାପ୍ରେ ରେସ୍ରେ ସର୍ବାଗ୍ରେ ଅଛନ୍ତି। କୋହଲି ଏପର୍ଯ୍ୟନ୍ତ ୯ଟି ମ୍ୟାଚରେ ୪୩୦ ରନ ସଂଗ୍ରହ କରିଛନ୍ତି। ଏହି ତାଲିକାର ଦ୍ୱିତୀୟ ନମ୍ବର ହେଉଛି ଋତୁରାଜ ଗାଇକ୍ୱାଡ, ଯିଏ ୩୪୯ ରନ ସ୍କୋର କରିଛନ୍ତି। ତା’ପରେ ୩୪୨ ରନ ସହ ରିଷଭ ପନ୍ତ ତୃତୀୟ ସ୍ଥାନରେ, ସାଇ ସୁଦର୍ଶନ ୩୩୪ ରନ ସହ ଚତୁର୍ଥ ସ୍ଥାନରେ ଏବଂ ଟ୍ରାଭିସ ହେଡ ୩୨୫ ରନ ସହ ପଞ୍ଚମ ସ୍ଥାନରେ ଅଛନ୍ତି ।
ମୁମ୍ବାଇ ଇଣ୍ଡିଆନ୍ସ ଫାଷ୍ଟ ବୋଲର ଜସପ୍ରୀତ ବୁମ୍ରା, ରାଜସ୍ଥାନ ରୟାଲ୍ସର ସ୍ପିନର ୟୁଜଭେନ୍ଦ୍ର ଚହଲ ଏବଂ ପଞ୍ଜାବ କିଙ୍ଗ୍ସର ପେସର ହର୍ଷଲ ପଟେଲଙ୍କ ମଧ୍ୟରେ ପର୍ପଲ କ୍ୟାପ ରେସ୍ରେ ଅଛନ୍ତି।