ନୂଆଦିଲ୍ଲୀ,୧୩।୧୦: ଶୀତ ଆରମ୍ଭ ହେବା ସହିତ ରାଜଧାନୀ ଦିଲ୍ଲୀର ବାୟୁ ମଣ୍ଡଳର ଗୁଣବତ୍ତାମାନ ପ୍ରତିବର୍ଷ ଖରାପ ହେବାକୁ ଲାଗିଥାଏ। ପବନରେ ଜହର ଯୋଗୁ ରାଜଧାନୀର ୭୫ ପ୍ରତିଶତରୁ ଅଧିକ ପିଲା ଶ୍ୱାସରୁଦ୍ଧ ହେଉଛନ୍ତି। ସେମାନେ ନେବୁଲାଇଜର ଏବଂ ଅନ୍ୟାନ୍ୟ ବ୍ୟବସ୍ଥା ଗ୍ରହଣ କରୁଛନ୍ତି। ଶକ୍ତି ଏବଂ ସମ୍ବଳ ପ୍ରତିଷ୍ଠାନ (ଟିଇଆର୍ଆଇ) ଦ୍ୱାରା କରାଯାଇଥିବା ଏକ ଅଧ୍ୟୟନ ଉପରେ ଆଧାରିତ ଏକ ରିପୋର୍ଟରେ ଏସମ୍ପର୍କରେ ଉଲ୍ଲେଖ କରାଯାଇଛି।
୧୪ରୁ ୧୭ ବର୍ଷ ବୟସ୍କ ୪୧୩ ଜଣ ଶିଶୁଙ୍କ ଉପରେ ସ୍ବାସ୍ଥ୍ୟ ସର୍ଭେ କରାଯାଇଥିଲା। ସେଥିମଧ୍ୟରୁ ୭୫.୪ ପ୍ରତିଶତଙ୍କଠାରେ ନିଶ୍ୱାସ ପ୍ରଶ୍ୱାସ ନେବାରେ ସମସ୍ୟା ଅନୁଭବ କରିଥିବା କହିଛନ୍ତି। ସେହିପରି ୨୪.୨ ପ୍ରତିଶତଙ୍କ ଆଖି ସମସ୍ୟା, ୨୨.୩ ପ୍ରତିଶତଙ୍କୁ ନିୟମିତ ଛିଙ୍କ ହେବା ଅବା ସର୍ଦ୍ଦି ସମସ୍ୟା ଦେଖାଦେଇଛି। ଅପରପକ୍ଷରେ ୨୦.୯ ପ୍ରତିଶତ ଛୋଟପିଲାଙ୍କୁ ସକାଳେ କାଶ ହେଉଥିବା ରିପୋର୍ଟରେ ପ୍ରକାଶ ପାଇଛି। ବାୟୁ ପ୍ରଦୂଷଣ ଯୋଗୁ ପିଲାଙ୍କଠାରେ ଶ୍ୱାସକ୍ରିୟା ଏବଂ ହୃଦରୋଗ ସମସ୍ୟା ବଢ଼ିବାରେ ଲାଗିଛି।
ରାଜଧାନୀ ବାୟୁମଣ୍ଡଳରେ କ୍ୟାଡମିୟମ ଏବଂ ଆର୍ସେନିକର ପରିମାଣ ବୃଦ୍ଧି ପାଉଥିବାରୁ ଲୋକଙ୍କଠାରେ କର୍କଟ, କିଡନୀ ସମସ୍ୟା ଏବଂ ଉଚ୍ଚ ରକ୍ତଚାପ, ମଧୁମେହ ଏବଂ ହୃଦରୋଗର ଆଶଙ୍କା ଅଧିକ ଦେଖାଦେଉଛି ବୋଲି ଏହି ରିପୋର୍ଟରେ ଦର୍ଶାଯାଇଛି।
