ବାରିପଦା ଅଫିସ,୧୮ା୯-ଅନୁସୂଚିତ ଜାତି ଓ ଜନଜାତି ଉନ୍ନୟନ ବିଭାଗ(ଏସ୍ଏସ୍ଡି) ଅଧୀନରେ ଥିବା ୩ଶହ ଛାତ୍ର ଓ ୨ଶହ ଛାତ୍ରୀ ଶଯ୍ୟା ବିଶିଷ୍ଟ ସୀମାନ୍ତ ଉଚ୍ଚ ବିଦ୍ୟାଳୟ ବଣକାଟିର ଅନ୍ତେବାସୀଙ୍କୁ ପୋକରା ଚାଉଳ ଦିଆଯାଉଥିବା ଅଭିଯୋଗ ହୋଇଛି। ରାଜ୍ୟ ସରକାରଙ୍କ ଉନ୍ନୟନ ବିଭାଗର ନିର୍ଦ୍ଦେଶକଙ୍କ ପତ୍ରାଙ୍କ ନଂ. ୧୧୧୬୮ କ୍ରମେ ସ୍କୁଲରେ ବଳକା ଥିବା ଚାଉଳକୁ ଅନ୍ତେବାସୀଙ୍କ ମଧ୍ୟରେ ବଣ୍ଟନ କରିବା ସହିତ ନଷ୍ଟ ହୋଇଥିବା ଚାଉଳ ବଣ୍ଟନ ହେବ ନାହିଁ ବୋଲି ସ୍ପଷ୍ଟ ନିର୍ଦ୍ଦେଶ ରହିଛି। ଏହି ନିର୍ଦ୍ଦେଶକୁ ଅବମାନନା କରି ସମ୍ପୃକ୍ତ ସ୍କୁଲର ପ୍ରଧାନ ଶିକ୍ଷକ ଓ ସୁପରିଣ୍ଟେଣ୍ଡେଣ୍ଟ ମିଳିତ ଭାବେ ପୋକ ଲାଗିଥିବା ଚାଉଳକୁ ବଣ୍ଟନ କରୁଥିବାରୁ ଅଭିଭାବକଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି ା
କରୋନା ପାଇଁ ଦୀର୍ଘ ୬ମାସ ହେଲା ସ୍କୁଲଗୁଡ଼ିକ ବନ୍ଦ ରହିଛି। ସ୍କୁଲକୁ ଆସୁଥିବା ଚାଉଳ ନଷ୍ଟ ହେବା ପୂର୍ବରୁ ଅନ୍ତେବାସୀମାନଙ୍କୁ ପ୍ରଦାନ କରିବାକୁ ରାଜ୍ୟ ସରକାରଙ୍କ ଏସ୍ଏସ୍ଡି ନିର୍ଦ୍ଦେଶକଙ୍କ ପକ୍ଷରୁ ଜିଲା ମଙ୍ଗଳ ଅଧିକାରୀଙ୍କୁ ଚିଠି ମାଧ୍ୟମରେ ନିର୍ଦ୍ଦେଶ ଦିଆଯାଇଥିଲା। ଏହାକୁ ନେଇ ମଙ୍ଗଳ ଅଧିକାରୀଙ୍କ ଚିଠି ନଂ. ୨୯୦୮/୨ା୯ା୨୦ରେ ବଳକା ଥିବା ଚାଉଳକୁ ଅନ୍ତେବାସୀଙ୍କୁ ପ୍ରଦାନ କରିବାକୁ ନିର୍ଦ୍ଦେଶ ରହିଛି। ନଷ୍ଟ ହୋଇଯାଇଥିବା ଚାଉଳକୁ ବଣ୍ଟାଯିବ ନାହିଁ ବୋଲି ସମସ୍ତ ସୁପରିଣ୍ଟେଣ୍ଡେଣ୍ଟ ଓ ପ୍ରଧାନ ଶିକ୍ଷକମାନଙ୍କୁ କଡ଼ା ନିର୍ଦ୍ଦେଶ ରହିଛି। ତେବେ ସୀମାନ୍ତ ଉଚ୍ଚ ବିଦ୍ୟାଳୟ ଛାତ୍ରାବାସରେ ଥିବା ଅନ୍ତେବାସୀଙ୍କୁ ଏହି ଚାଉଳକୁ ପ୍ରଦାନ କରାଯାଉଛି। ଚାଉଳ ନେବାକୁ ଆସିଥିବା ଅଭିଭାବକ ରତନା ହାଁସଦା, ରଘୁନାଥ ହେମ୍ବ୍ରମ କୁହନ୍ତି, ୫୦କି.ମି ଦୂର କଇଁଚିଶୋଳ ଗ୍ରାମରୁ ଏକ ଅଟୋକୁ ହଜାରେ ଟଙ୍କାରେ ଭଡ଼ା କରି ଆସିଛୁ। ଚାଉଳରେ ପୋକ ଥିବା ବେଳେ ନିରୁପାୟ ହୋଇ ଏହାକୁ ନେବାକୁ ବାଧ୍ୟ ହେଉଛୁ। ସେହିପରି ଛାତ୍ର ମଦନ ହାଁସଦା, ଲାଲ ମୋହନ ମୁର୍ମୁ, ସନାତନ ହାଁସଦା କୁହନ୍ତି ପୂର୍ବରୁ ଟୋକନ ମାଧ୍ୟମରେ ଚାଉଳ ପ୍ରଦାନ କରାଯାଇଥିଲା ା ଆମେ ଟୋକନ ଦେଖାଇ ଗାଁରୁ ଚାଉଳ ପାଇଥିଲୁ। ମାତ୍ର ସରକାରଙ୍କ ଏଭଳି ବ୍ୟବସ୍ଥା ଯୋଗୁ ବହୁ ଦୂରରୁ ଆସି ଚାଉଳ ନେବାକୁ ପଡୁଛି ବୋଲି କହିଛନ୍ତି। ଏ ସମ୍ପର୍କରେ ପ୍ରଧାନ ଶିକ୍ଷକ ଅନାଦି ଚରଣ ବେହେରା କୁହନ୍ତି, ବିଭାଗୀୟ ଅଧିକାରୀଙ୍କ ନିର୍ଦ୍ଦେଶକ୍ରମେ ବଳକା ଥିବା ଚାଉଳକୁ ପ୍ରଦାନ କରାଯାଉଛି ା ଦୂରଦୂରାନ୍ତରୁ ଆସୁଥିବା ଅନ୍ତେବାସୀମାନଙ୍କୁ ସେହି ପୋକ ଲାଗିଥିବା ଚାଉଳ ବଣ୍ଟନ କରାଯାଉଛି।
ଉଲ୍ଲେଖଯୋଗ୍ୟ ଯେ, ଏହି ପୋକରା ଚାଉଳ ନେବା ପାଇଁ ବିଶୋଇ ଥାନା ଅନ୍ତର୍ଗତ ଦୁପଟା ଗ୍ରାମର ୪ ଅନ୍ତେବାସୀଙ୍କ ସହିତ ଅଭିଭାବକମାନେ ଅଟୋ ଯୋଗେ ଆସୁଥିବା ବେଳେ ବୁଧବାର ସଡ଼କ ଦୁର୍ଘଟଣାର ସମ୍ମୁଖୀନ ହୋଇଥିଲେ। ସେମାନଙ୍କ ମଧ୍ୟରୁ ଜଣେ ଅନ୍ତେବାସୀଙ୍କ ସମେତ ୩ଜଣଙ୍କର ମୃତ୍ୟୁ ଘଟିଥିଲା ଓ ୯ ଜଣ ଗୁରୁତର ଆହତ ହୋଇଥିଲେ। ପୋକରା ଚାଉଳ ପାଇଁ ପରିବାର ଲୋକେ ପୁଅକୁ ହରାଇଛନ୍ତି ବୋଲି କୋହଭରା କଣ୍ଠରେ ପ୍ରକାଶ କରିଛନ୍ତି। ତେବେ କରୋନା କଟକଣା ସମୟରେ ସ୍କୁଲ ବନ୍ଦ ହେବା ପୂର୍ବରୁ ଏହି ବ୍ୟବସ୍ଥା କରାଯାଇଥିଲେ ଚାଉଳ ନଷ୍ଟ ହେବା ଓ ଦୁର୍ଦ୍ଦଶା ଭୋଗିବାକୁ ପଡ଼ି ନ ଥାନ୍ତା ନାହିଁ ବୋଲି ସାଧାରଣରେ ଆଲୋଚନା ହେଉଛି ା